Amal hod tamu biełaruski błohier Eduard Palčys, jaki vystupaŭ u internecie pad mianuškaj Džon Silver, byŭ aryštavany ŭ Rasiei i vydadzieny Biełarusi.
Potym jon pradstaŭ pierad sudom pa abvinavačańni ŭ raspalvańni mižnacyjanalnaj varožaści. Voś jak Edurad Palčys prakamentavaŭ źviestki pra zatrymańni Juryja Paŭłaŭca i Dźmitryja Alimkina pavodle taho ž abvinavačańnia.
— Adznaču najpierš, što narešcie biełaruskija ŭłady ŭvohule stali reahavać na toje, pra što ja pisaŭ jašče 2 hady — što ŭ internecie dziejničajuć ludzi, jakija sapraŭdy pracujuć na raspalvańnie varožaści. Ale miarkuju, paraleli z majoj sprava ŭsio ž nie zusim dakładnyja, bo ź ich boku heta nijakaja nie svaboda słova, nie vykazvańnie dumak. Jany prosta za hrošy stvarali na zamovu peŭny kantent dla varožych adnosna Biełarusi rasiejskich sajtaŭ. Užo jość u internecie skrynšoty ich pierapiski z zamoŭcami, pa jakich vydatna bačna, jak imi manipulavali, jak apłačvali hetyja ich razvažańni pra toje, što Biełarusi nibyta niedadziaržava, što biełaruskaj movy niama, što treba Biełaruś dałučyć i hetak dalej. Heta była sapraŭdnaja infarmacyjnaja baraćba z našaj niezaležnaściu, z suverenitetam Biełarusi i, vidać, navat naš KDB heta ŭžo dastała. Vy ž viedajecie, što ŭ nas prosta prarasiejskich ludziej nie čapajuć, a tut…
— Ale, navat kali im zamaŭlali peŭny kantent i jany atrymlivali za heta hrošy, heta nia ich prava — vykazvacca? I chiba aryšt za heta nia jość aryštam i za svabodu słova?
— Nie, usio ž sa svabodaj słova tut mała ahulnaha. Hetak možna i vykazvańnie Kisialova pra «jadzierny popieł», jakim jon pahražaŭ inšym krainam, ličyć svabodaj słova. Ci ličyć svabodaj słova prydumku pra raśpiataha ŭ Słaviansku chłopčyka, z-za jakoj šmat ludziej, u tym liku ź Biełarusi, pajechali na vajnu ŭ Danbas i zahinuli. Kali ŭ Niamieččynie kazać pra toje, što Hałakostu nie było ci słavić Hitlera — heta złačynstva, čamu ŭ nas stvarać materyjały suproć niezaležnaści i suverenitetu Biełarusi — heta svaboda słova? Nie, svaboda słova i padbuchtorvańnie da vajny — heta, na maju dumku, roznyja rečy.
