Akijanahrafičny karabiel USNS Bowditch pravodziŭ daśledavanńni ŭ Paŭdniova-Kitajskim mory. Fota: US NAVY
Bieśpiłotnik trapiŭ da kitajskich VMS 15 śniežnia. Incydent adbyŭsia ŭ Paŭdniova-Kitajskim mory, na adlehłaści ŭ 50 marskich mil (bolš za 90 km) na paŭnočny zachad ad filipinskaha zaliva Subik-Bej.
USNS Bowditch pravodziŭ u hetym rajonie daśledavańni, paviedamlajuć u ZŠA. Pad vadu byŭ spuščany daśledčy bieśpiłotnik.
Ułady KNR zajavili, što vajskoŭcy z kitajskaha karabla zaŭvažyli nieviadomy padvodny abjekt i vyrašyli padniać jaho, kab praduchilić niebiaśpiečnuju situacyju. Tolki potym vajskoŭcy zaŭvažyli, što heta amierykanski bieśpiłotnik, śćviardžajuć kitajskija ŭłady.
Minabarony KNR nie havoryć adkryta, ci znachodziŭsia bieśpiłotnik ŭ vodach, jakija Kitaj ličyć svaimi. U zajavie tolki vykazvajecca pratest suprać daśledčaj pracy amerykanskich samalotaŭ i sudoŭ pablizu kitajskich vod.
U zajavie minabarony KNR havorycca, što amierykanski i kitajski baki byli na suviazi z nahody hetaha incydentu z samaha pačatku. Kitaj adrazu vyrašyŭ viarnuć bieśpiłotnik, ale zajavy z boku ZŠA pačali nahniatać situacyju, śćviardžaje minabarony KNR.
ZŠA śćviardžajuć, što daśledčyki dziejničali zakonna. Nienazvany čynoŭnik zajaviŭ Rojterz, što bieśpiłotnik vykonvaŭ vajennyja daśledavańni i na im było napisana pa-anhlijsku, što jaho nielha vyciahvać z vady i što heta ŭłasnaść ZŠA.
Aficyjna amierykanskija ŭłady paviedamlajuć, što bieśpiłotnikam kiravaŭ cyvilny padradčyk, jaki pravodzić akijanahrafičnaje daśledavańnie. USNS Bowditch ŭvachodzić u skład VMS ZŠA.
«Jon [bieśpiłotnik] naš, i na im heta jasna napisana. My b chacieli viarnuć jaho i chacieli b, kab takoje bolš nie zdarałasia», — zajaviŭ na bryfinhu pres-sakratar Pientahonu Džef Devis.
Incydent taksama prakamientavaŭ abrany prezident ZŠA Donald Tramp. Jon napisaŭ u «Tvitery», što Kitaj skraŭ bieśpiłotnik. Tramp taksama zrabiŭ pamyłku druku i nazvaŭ toje, što adbyłosia «biesprezidentnym aktam». Paśla jon vydaliŭ hety tvit i apublikavaŭ novy — biez pamyłki.
Tak vyhladaŭ vydaleny tvit
Zachop bieśpiłotnika — samy surjozny vajenny incydent pamiž ZŠA i Kitajem za apošnija 15 hadoŭ. Da hetaha ŭ 2001 hodzie ŭ pavietry sutyknulisia amierykanski samalot-špijon i kitajski źniščalnik. U vyniku kitajski piłot zahinuŭ.
KNR pretenduje na vialikuju častku astravoŭ i ryfaŭ u Paŭdniova-Kitajskim mory. Inšyja krainy ŭ rehijonie z hetym niazhodnyja. Kitajskija ŭłady taksama razharnuli maštabny prajekt pa pašyreńni nievialikich astravoŭ archipiełaha Spratli. Na hetych astravach KNR raźmiaščaje vajennuju infrastrukturu.
