Abrany prezident ZŠA Donald Tramp na pieršaj paśla vybaraŭ pres-kanfierencyi dapuściŭ, što jamu nie ŭdasca naładzić adnosiny z rasijskim prezidentam Uładzimiram Pucinym. Adnak jon spadziajecca na heta i spakojna stavicca da rasijskich kibieratak, piša VVS.
Getty
«Kali Pucinu padabajecca Donald Tramp, ja liču, što heta aktyŭ, a nie abaviazacielstva, bo ŭ nas žudasnyja adnosiny z Rasijaj», — skazaŭ Tramp, adkazvajučy na pytańni žurnalistaŭ na pieršaj paśla listapadaŭskich vybaraŭ pres-kanfierencyi ŭ Ńju-Jorku.
Da hetaha času Tramp adkazvaŭ na pytańni, u tym liku ŭ suviazi z mahčymym umiašańniem Rasii ŭ vybarčuju kampaniju ŭ ZŠA, vyklučna ŭ svaim tvitary.
«Ja nie viedaju, ci ŭdasca mnie zładzić z Uładzimiram Pucinym. Ja spadziajusia, što zmahu. Ale jość vialikaja imaviernaść, što nie zmahu», — zajaviŭ Tramp na fonie paviedamleńniaŭ ab tym, što rasijskija śpiecsłužby mahli źbirać kampramat nie tolki na jaho supiernicu na vybarach Chiłary Klintan, ale i na jaho samoha.
Kamientujučy vysnovy śpiecsłužbaŭ ZŠA ab datyčnaści rasijskich uładaŭ i asabista Pucina da kibieratak i ŭmiašańni ŭ amierykanskuju vybarčuju kampaniju, Tramp zajaviŭ, što chakierskija ataki ažyćciaŭlaje nie tolki Rasija, i paabiacaŭ pryniać miery pa abaronie krainy ad chakierskich napadaŭ.
«U nas jość najlepšyja ŭ śviecie śpiecyjalisty pa kampjuternych technałohijach. My budziem pracavać nad tym, kab zabiaśpiečyć abaronu», — skazaŭ jon.
Tramp taksama skazaŭ, što supracoŭnictva z uładami Rasii možna naładzić u baraćbie z «Isłamskaj dziaržavaj».
