Abjadnanyja ŭzbrojenyja siły Zachodniaj Afryki abviaścili, što vajennaja apieracyja, jakaja pačałasia ŭ čaćvier dla vyrašeńnia prezidenckaha kryzisu ŭ Hambii, prypynienaja dla taho, kab zrabić apošniuju sprobu pry mižnarodnym pasiarednictvie mirna ŭrehulavać situacyju.
Novy prezident Hambii Adama Berou
Novyja pasiarednickija pieramovy projduć u piatnicu. Ich uznačalić prezident Hviniei Alfa Konde, bo pieramovy pamiž prezidentam Hambii Jachja Džamu i prezidentam Maŭrytanii Machamiedam uld Abdel Azizam pozna ŭviečary ŭ čaćvier zajšli ŭ tupik.
Raniej rehijanalny błok Zachodniaj Afryki EKAVAS (Ekanamičnaja supolnaść zachodnieafrykanskich dziaržaŭ) padoŭžyŭ termin dziejańnia ŭltymatumu Džamu da apoŭdnia piatnicy i pryhraziŭ paśla hetaha siłaj prymusić Džamu syści.
U čaćvier Uzbrojenyja siły Sieniehała abviaścili pra pačatak vajennaha ŭvarvańnia ŭ susiedniuju Hambiju, kab zabiaśpiečyć pieradaču ŭłady Adamu Berou. Jak paviedamlała ŭ čaćvier viečaram ahienctva Rejter sa spasyłkaj na pradstaŭnika sieniehalskich vajennych, vojski pierajšli miažu ŭ čaćvier.
Heta było zroblena na fonie adnahałosnaha rašeńnia Rady Biaśpieki AAN padtrymać interviencyju Sieniehała ŭ Hambiju. U rezalucyi asudžajecca niežadańnie dziejučaha kiraŭnika dziaržavy Jachji Džamu pakinuć prezidenckuju pasadu. Za dakumient prahałasavali ŭsie 15 dziaržaŭ — členaŭ Rady Biaśpieki, u tym liku Rasija.
Rehularnyja ŭzbrojenyja siły Sieniehała naličvajuć kala 20 tysiač čałaviek, a vajenny biudžet krainy składaje prykładna 300 młn dalaraŭ u hod. Kolkaść uzbrojenych sił Hambii aceńvajecca ŭ 2,5 tysiačy čałaviek.