U Kanstytucyju Biełarusi mohuć być uniesieny źmieny, kali taho zapatrabuje raźvićcio ŭzajemaadnosin u hramadstvie i dziaržavie. Pra heta zajaviŭ staršynia Kanstytucyjnaha suda Piotr Mikłaševič, adkazvajučy na pytańnie BiełaPAN 20 studzienia na pres-kanfierencyi ŭ Minsku.
Kanstytucyja, adznačyŭ Mikłaševič, źjaŭlajecca «svojeasablivaj hramadskaj damovaj ab ładzie dziaržavy, ab uzajemaadnosinach u hramadstvie i dziaržavie». Ad taho, jak buduć raźvivacca adnosiny, ličyć jon, moža paŭstać i nieabchodnaść uniasieńnia źmianieńniaŭ u Kanstytucyju.
«U jakoj miery, jakija heta buduć papraŭki — dla hetaha buduć pravodzicca abmierkavańni, stvaracca adpaviednaja kamisija, kab vypracavać prapanovy. Na hetym etapie Kanstytucyjny sud nie ŭdzielničaje ŭ hetym pracesie. Naša hałoŭnaja zadača siońnia ŭ tym, kab achoŭvać dziejnuju Kanstytucyju», — padkreśliŭ kiraŭnik Kanstytucyjnaha suda.
Jon taksama dadaŭ, što Biełaruś «paśladoŭna raźvivajecca na kanstytucyjnaj asnovie jak demakratyčnaja, sacyjalnaja, pravavaja dziaržava». «Pavodle mižnarodnych acenak, u našaj Kanstytucyi znajšli naležnaje zamacavańnie ŭsie asnoŭnyja pravy i svabody čałavieka, Asnoŭny zakon adpaviadaje mižnarodnym standartam», — zajaviŭ Mikłaševič.
Ab mahčymych źmienach u Asnoŭny zakon zajaŭlaŭ Alaksandr Łukašenka, vystupajučy 7 kastryčnika na sustrečy z deputatami Pałaty pradstaŭnikoŭ i členami Savieta Respubliki Nacyjanalnaha schodu 5-ha i 6-ha sklikańniaŭ. Pavodle jaho słoŭ, nastaŭ čas dla praviadzieńnia analizu Kanstytucyi. «Pasprabujem padyści da hetaha pytańnia z roznych bakoŭ — akuratna, kab nie zrabić horš. Źjavilisia novyja prablemy, vykliki, dy i čas, napeŭna, patrabuje čahości novaha. I pačynać treba z hałoŭnaha, kali my advažymsia na heta. Nam treba stvaryć hrupu mudracoŭ, jurystaŭ, jakija praanalizujuć Asnoŭny zakon. I kali treba budzie, my na heta pojdziem», — skazaŭ kiraŭnik dziaržavy, nie kankretyzujučy sutnaść mahčymych źmianieńniaŭ.
Za hady prezidenctva Alaksandra Łukašenki Asnoŭny zakon źmianiaŭsia dvojčy. U 1996 hodzie była pryniata novaja redakcyja Kanstytucyi, jakaja istotna pašyryła paŭnamoctvy prezidenta, u 2004-m — admienieny abmiežavańni prezidenckich terminaŭ.
