U sud Navabielickaha rajona Homiela pastupiŭ na razhlad administracyjny pratakoł, składzieny administracyjaj rajona ŭ dačynieńni da žychara abłasnoha centra, jaki abraźliva vykazaŭsia pra biełaruskuju movu.
Fota z sacsietak
Havorka idzie pra byłoha supracoŭnika departamienta achovy MUS Vasila Varuščanku, jaki staŭ viadomy dziakujučy skandalnym vykazvańniam i fatahrafijam u internecie. U pabliku partała «Silnyje novosti» ŭ sacyjalnaj sietcy «UKantakcie» Varuščanka pakinuŭ kamientaryj: «Biełaruskaja mova — heta trup, što raskładajecca i zahnivaje, jaki ŭžo daŭno treba zakapać hłybiej!»
Hramadski aktyvist Ihar Słučak, inicyjatar kampanii «Spravavodstva pa-biełarusku», nakiravaŭ zajavu ŭ Homielski harvykankam z prośbaj pryciahnuć da adkaznaści hramadzianina, jaki abraziŭ biełaruskuju movu. Aktyvist paličyŭ, što hetym vykazvańniem aŭtar parušyŭ zakanadaŭstva ab movach (artykuł 9.22 KoAP), publična abraziŭšy biełaruskuju movu.
Materyjały z harvykankama byli pieradadzienyja na razhlad u administracyju Navabielickaha rajona. Paśla pravierki, praviedzienaj AUS, administracyja rajona skłała ŭ dačynieńni da žychara Homiela pratakoł na padstavie artykuła 9.22 KoAP.
Namieśnik kiraŭnika administracyi Navabielickaha rajona Vasil Zubiec paviedamiŭ, što kamientaryj hramadzianina pra biełaruskuju movu jak «hniły trup» byŭ nakiravany na ekśpiertyzu z pytańniem, ci možna ličyć takoje vykazvańnie abraźlivym dla biełaruskaj movy. «Ekśpierty dali zaklučeńnie, što tak, sapraŭdy, takaja fraza abražaje biełaruskuju movu. I ŭ suviazi z hetym administracyjaj rajona byŭ składzieny pratakoł ab administracyjnym parušeńni. Pratakoł budzie razhledžany ŭ sudzie», — prakamientavaŭ Zubiec.
Jon adznačyŭ, što za čas jaho pracy ŭ administracyi heta pieršy pratakoł na padstavie artykuła 9.22 KoAP (publičnaja abraza, hańbavańnie dziaržaŭnych i inšych nacyjanalnych moŭ, stvareńnie pieraškod i abmiežavańniaŭ u karystańni imi, propaviedź varožaści na moŭnaj hlebie).
Ihar Słučak ličyć, što ŭ administracyjna-pracesualny kodeks varta ŭnieści źmieny, zhodna ź jakimi vieści administracyjny praces na padstavie artykuła 9.22 KoAP i składać pratakoły zmohuć nie tolki administracyi rajonaŭ i vykankamy, ale i milicyja. «Tamu što ŭ vykankamach abjektyŭna niama takich mahčymaściaŭ, jak u MUS, i ŭsio roŭna administracyjam rajonaŭ i vykankamam davodzicca ŭzajemadziejničać z MUS, jak było ŭ hetym vypadku, a praz heta hublajecca čas i moža stacca tak, što vinavatyja mohuć paźbiehnuć adkaznaści, bo na pryciahnieńnie da administracyjnaj adkaznaści dajecca dva miesiacy», — adznačyŭ hramadski aktyvist.
Jon zadavoleny, što ekśpiertyza pryznała słovy Varuščanki źniavahaj: «zdajecca, inšaha vyniku i być nie mahło». «Spadziajusia, heta budzie dobrym urokam dla tych, chto jašče nie zrazumieŭ, što mierkavańnie i abraza — zusim roznyja rečy, i abraz nie tolki biełaruskaj movy, ale i naohuł stanie mienš», — skazaŭ Słučak.
U vieraśni 2016 hoda, upieršyniu z 1999 hoda, u Biełarusi byŭ pryciahnuty da administracyjnaj adkaznaści hramadzianin, jaki abražaŭ rodnuju movu, čym parušyŭ artykuł 9.22 KoAP. Pakarańnia dla žychara Mazyra Dźmitryja Ščarbatych taksama damohsia Słučak. Aktyvist piša mahistarskuju dysiertacyju na temu «Pravavyja asnovy dziaržaŭnaj moŭnaj palityki ŭ Respublicy Biełaruś», tamu, akramia adstojvańnia nacyjanalnych kaštoŭnaściaŭ, jamu byŭ cikavy jurydyčny bok kanfliktu jak častka jaho navukovaj pracy. Kanflikt, što skončyŭsia dla byłoha supracoŭnika sajta offside.by Ščarbatych štrafam u čatyry bazavyja vieličyni, pačaŭsia ź jaho abraźlivaha kamientaryja na staroncy ŭ sacsietkach, dzie abmiarkoŭvaŭsia novy biłbord mazyrskaha futbolnaha kłuba «Słavija» z nadpisami na biełaruskaj movie.
