Milicyja zatrymała žychara Čačerskaha rajona, jaki zdaŭ traktar «MTZ» na mietałałom.
TraktorBook.com
Jak paviedamiŭ BiełaPAN aficyjny pradstaŭnik UUS Homielskaha abłvykankama Vital Prystromaŭ, dyrektar pryvatnaj firmy, jakaja zajmajecca narychtoŭkaj lesu ŭ Čačerskim rajonie, uziaŭ na pracu 42-hadovaha žychara vioski Bialajeŭka, zaklučyŭ dahavor materyjalnaj adkaznaści i zamacavaŭ za traktaram «MTZ-80». Mužčyna rasčyščaŭ na im darohi, adciahvaŭ biarvieńnie.
«U pačatku lutaha paśla asvajeńnia čarhovaj dzialanki kiraŭnik raspłaciŭsia z traktarystam i prapanavaŭ pakinuć techniku ŭ taho na pastoj. Viečaram za butelkaj śpirtnoha mužčyna razhavaryŭsia z adnaviaskoŭcam. Maŭlaŭ, načalnik płacić mała, a ja pracuju pa-čornamu. Nieparadak, chaču pradać «stalovaha kania» ŭ Rasiju na mietałałom. Sabutelnik pahadziŭsia z dovadami siabra i prapanavaŭ pakazać darohu da bližejšaj rasijskaj vioski ŭ 25 kiłamietrach, dzie možna chutka «šturchnuć tavar», — skazaŭ Prystromaŭ.
Na nastupny dzień mužčyna pryhnaŭ traktar da rasijskaha punkta skupki mietału i zapytaŭ za jaho 35 tysiač rubloŭ (kala 580 dalaraŭ). Skupščyk pahadziŭsia i addaŭ sumu. Pradaviec adpraviŭsia dadomu, razdaŭ pazyki i zładziŭ zastolle, a pakupnik, hramadzianin Biełarusi, jaki patelefanavaŭ u Čačerski RAUS, raspavioŭ ab dziŭnaj kupli i prapanavaŭ pierahnać traktar nazad. Milicyjanty źviazalisia z kalehami z rasijskaj palicyi, paprasiŭšy prakantralavać situacyju. Palicyjanty prybyli ŭ viosku, znajšli punkt skupki mietału, i pačaŭsia praces viartańnia.
«U hety čas dyrektar lesanarychtoŭčaj firmy pryjechaŭ da traktarystu klikać na pracu. «MTZ-80» na padvorku nie było. Zatoje haspadar, jaki dobra pryniaŭ na hrudzi, skazaŭ, što, pakul šef nie zapłacić jamu, «Biełarusa» jamu nie vidać. Kiraŭnik nie staŭ tarhavacca, a adrazu źviarnuŭsia ŭ milicyju. Da hetaha momantu traktar užo viarnuli ŭ krainu», — dadaŭ pradstaŭnik UUS.
Raspačataja kryminalnaja sprava pa č. 1 art. 211 KK (prysvajeńnie abo rastrata majomaści asobaj, jakoj jano davierana). Padazravanamu pahražaje pazbaŭleńnie voli na termin da čatyroch hadoŭ sa štrafam abo biez štrafu i z pazbaŭleńniem prava zajmać peŭnyja pasady.
