Chakiery z hrupy TheShadowBrokers raskryli dakumienty, ź jakich vynikaje, što amierykanskaja vyviedka mahła ŭmiešvacca ŭ finansavuju sistemu krain Blizkaha Uschodu i Łacinskaj Amieryki, pieradaje RBK sa spasyłkaj na Reuters.
Jak raspavioŭ ahienctvu kansultant pa kibierbiaśpiecy Šejn Šuk, jaki dapamoh bankam rasśledavać parušeńni svaich sistem SWIFT, u reliz uzłomščykaŭ byŭ uklučany kampjutarny prahramny kod, jaki moža być adaptavany złačyncami dla ŭzłomu siervieraŭ mižbankaŭskaj sistemy abmienu finansavymi paviedamleńniami z metaj kantrolu za aktyŭnaściu kredytnych arhanizacyj.
Reuters adznačaje, što na niekatorych vypuščanych chakierskaj hrupaj dakumientach staić aficyjnaja piačatka Ahienctva nacyjanalnaj biaśpieki ZŠA. Ich sapraŭdnaść ahienctva paćvierdzić nie moža. U padraździaleńni amierykanskaj vyviedki infarmacyju ŚMI pakul nie prakamientavali.
U pres-słužbie SWIFT ahienctvu zajavili, što ŭ ciapierašni čas jany nie majuć dokazaŭ niezakonnaha dostupu da sistemy.
Na dumku Šejna Šuka, apublikavanyja chakierami danyja mohuć stać padstavaj da novych machlarstvaŭ nakštałt tych, jakija adbylisia ŭ sakaviku 2016 hoda ŭ Banhładeš, kali złamyśniki pasprabavali vyvieści z rachunku Centrabanka krainy $951 młn. Vialikaja častka apieracyj była zabłakavanaja, adnak $81 młn paśpieli pieravieści na rachunki ŭ Filipinach. U datyčnaści da kradziažu srodkaŭ śledčyja zapadozryli chakieraŭ z Rasii, Małdovy i Kazachstana.
Ahienctva Associated Press adznačaje, što ANB mahło skamprametavać pracu dubajskaha ofisa kampanii EastNets, jakaja śpiecyjalizujecca na baraćbie z admyvańniem hrošaj i akazańni finansavych pasłuh.
Zasnavalnik kampanii Comae Technologies Met Siuiš, jaki sačyŭ za dziejnaściu TheShadowBrokers ŭ 2016 hodzie, u svaim błohu napisaŭ, što ANB udałosia ŭzłamać tysiačy kampjutaraŭ i akaŭntaŭ supracoŭnikaŭ EastNets. Celami amierykanskich vyviednikaŭ, pavodle danych kiraŭnika kampanii, byli banki ŭ Kuviejcie, Bachrejnie i Palestynie.
