Łondanskaja palicyja paviedamiła, što zahinułymi ŭ vyniku pažaru ŭ łondanskim šmatpaviarchovym domie Hrenfieł-taŭer ličacca pa mienšaj miery 58 čałaviek, u ich liku i tyja, kaho pakul nie ŭdałosia znajści.
Fota AFP
U palicyi zajaŭlajuć, što faktyčna niama nijakich šancaŭ znajści žyvymi tych, chto pakul ličycca źnikłym bieź viestak. U piatnicu paviedamlałasia, što kolkaść achviar pažaru dasiahnuła 30. Siarod tych, kaho nie ŭdałosia znajści, — cełyja siemji.
Pa słovach pradstaŭnika palicyi Ściuarta Kandzi, kolkaść achviar pažaru moža jašče vyraści, a pošukavaja apieracyja budzie praciahvacca niekalki tydniaŭ.
Jak stała viadoma Bi-bi-si, kolkaść zahinuŭšych u vyniku pažaru moža dasiahnuć 70 čałaviek.
Raniej, kali aficyjnaja kolkaść zahinuŭšych składała 17 čałaviek, paviedamlałasia, što ŭ budynku, jaki całkam zhasili tolki da ranicy čaćviarha, mohuć zastavacca dziasiatki ludziej.
Pažar u 24-paviarchovym budynku Hrenfieł-taŭer u rajonie Paŭnočny Kiensinhton pačaŭsia ŭ noč na sieradu. Pavodle źviestak uładaŭ, da pačatku ŭzharańnia ŭ budynku mahli znachodzicca da 600 čałaviek.
U sieradu z ahniom zmahalisia kala 200 pažarnych, na miesca prybyła 40 pažarnych mašyn.
Hrenfieł-taŭer byŭ pabudavany ŭ 1978 hodzie, u im kala 200 kvater. Uratavanyja žychary kažuć, što ŭ domie nie pracavała pažarnaja sihnalizacyja. Taksama adznačajecca, što ŭ brytanskich vysotkach nie ŭstaloŭvajucca sistemy dla tušeńnia pažaraŭ.
Pryčyna ŭzharańnia zastajecca niavyśvietlenaj. Siarod viersij, jakija źjavilisia ŭ ŚMI — defiekt elektrapravodki, vybuch hazu i ŭzharańnie chaładzilnika ŭ adnoj z kvater. Šerah ekśpiertaŭ ličyć, što pažar mahła ŭzmacnić ašaloŭka budynka, u jakoj utrymlivajecca cynk.
U piatnicu premjer-ministr Brytanii Tereza Mej rasparadziłasia pravieści poŭnamaštabnaje adkrytaje rasśledavańnie pryčyn pažaru.
