11-razovy čempijon śvietu pa muaj-taj Vital Hurkoŭ, jaki na chatnim pieršynstvie płaniety ŭ mai vybyŭ užo ŭ čverćfinale paśla parazy ad partuhalca Dyjoha Kaładu, uziaŭ revanš u supiernika na X Suśvietnych hulniach u polskim Urocłavie, piša Tut.by.
Jak i ŭ Minsku, los źvioŭ biełarusa i partuhalca ŭžo ŭ startavym dvuboi. Boj atrymaŭsia takim ža napružanym, ale na hety raz zaviaršyŭsia pieramohaj Vitala Hurkova — 29:28.
Na ČS u Minsku lik byŭ takim ža, ale ŭ karyść partuhalca.
Ciapier u paŭfinale vahavaj katehoryi da 75 kh supiernikam Vitala Hurkova budzie Troj-Tory Džons z ZŠA.
Na Suśvietnyja hulni va Urocłaŭ adpravilisia jašče 5 pradstaŭnikoŭ Biełarusi.
Maksim Žuk (63,5 kh) u startavym dvuboi sastupiŭ Oskaru Zihiertu z Polščy (28:29), Pavieł Hryšanovič (67 kh) — Anujenhu Chatchamarašry (boj spynieny pa rašeńni sudździaŭ u 2-m raŭndzie), Pavieł Dzialendzik (71 kh) vyjšaŭ u paŭfinał z-za niajaŭki sapiernika, Mikita Šostak (81 kh) pieramoh iranca Ajuba Saki (30:27), a Ludmiła Čysłava vybyła paśla parazy ŭ startavym pajadynku suprać Habryeły Kuzavińskaj z Polščy (28:29).
Suśvietnyja hulni pravodziacca kožnyja 4 hady, na nastupny hod paśla praviadzieńnia Alimpijad. Spartsmieny spaborničajuć u dyscyplinach, jakija nie ŭvachodziać u prahramu Alimpijskich hulniaŭ. Va Urocłavie vystupiać bolš za 3500 tysiač atletaŭ z 100 krain u 31 vidzie sportu.
U Hulniach va Urocłavie voźmuć udzieł 88 bajcoŭ muaj-taj ŭ 11 vahavych katehoryjach. Buduć razyhranyja 11 kamplektaŭ uznaharod.
