U Minsku na minułym tydni ŭ mikrarajonie Zachad adbyłosia ŭzharańnie ŭ adnoj z kvater. Niezvyčajnaje ŭ hetaj historyi toje, što pažarnyja vyjazdžali pa hetym ža adrasie ŭžo treci raz za miesiac. Chto tam žyvie, čamu nasamreč adbyvajucca pažary i jakoje žyć pa susiedstvie z takoj siamjoj — u materyjale tut.by.
U kvateru na pieršym paviersie na Adzincova pažarnyja ŭ hetym miesiacy vyjazdžali trojčy: 5, 11 i 23 lipienia. Sa zvodak viadoma, što tam žyvuć piensijaniery — mužčyna invalid i jaho žonka. Ratavalniki kožny raz hasiać matrac, a mierkavanaja pryčyna ŭzharańnia — nieaściarožnaść pry kureńni. Taksama sa zvodak viadoma, što siamja znachodzicca na ŭliku, abodva pjuć i palać.
Paśla čarhovaha ŭzharańnia na vychodnych siamju zabrali ŭ balnicu. A my schadzili na Adzincova i pahutaryli z susiedziami paharelcaŭ. Jany nam raspaviali — jakija miery ŭžo pryniali i jak spraŭlajucca ź situacyjaj.
Susiedzi: «Jon padpalvaje kvateru znarok»
U domie na Adzincova paśla pažaru jašče niekalki dzion adčynienyja ŭvachodnyja dźviery — da hetaha času vyvietryvajecca pach dymu. Paśla ŭvahi presy da niebiaśpiečnych žycharoŭ susiedzi trochi pabojvajucca raspaviadać historyi pra žyćcio ŭ takim domie i bolš za ŭsio žadajuć prosta vyrašyć hetuju prablemu raz i nazaŭždy.
Adzin z susiedziaŭ raspaviadaje nam pra Ihara i Vieru, u kvatery jakich adbyvajucca pažary.
Raniej Viera pracavała dyktaram na radyjo. Niekalki hadoŭ tamu vyjšła na piensiju. Pieraniesła insult. Kožny raz padčas padpału jana zastajecca ŭ kvatery, bo nie moža chadzić. U Viery jość dačka, ale z maci jana nie padtrymlivaje adnosin užo šmat hadoŭ.
Ihar siadzieŭ u turmie i kala 10 hadoŭ prapracavaŭ raźbiarom pa drevie, paśla čaho — žyŭ na piensiju invalida i piŭ.
Pryčyny častych pažaraŭ susied nazyvaje zusim nie tyja, što paznačany ŭ zvodcy.
— Dy nijakija jany nie pjanicy! Jany ŭžo pić nie mohuć. Jon padpalvaje kvateru znarok i ŭ hety čas sam vyjazdžaje na vazku ŭ kalidor.
U pieršy raz, kažuć susiedzi, kvateru Ihar padpaliŭ, kali piŭ z rabotnikam pa dohladzie. Sam vyjechaŭ, a žonka i hość spali ŭ kvatery.
— Viedajecie, jon prosta choča ŭvahi, jamu padabajecca, što jaho zabiaruć, dzie ŭsio čysta, i pakormiać, — dadaje mužčyna.
Natalla žyvie nad paharelcami i pakutuje ad takoha susiedstva, mahčyma, bolš za inšych žycharoŭ doma. Nie raz užo jaje muž vyklikaŭ sam pažarnych.
— Ihar moh pačać pa batarejach stukać, kryčać. My ŭsio heta vykładali ŭ zvarotach, učastkovamu, ale nam dali zrazumieć, što ŭ dziaržsłužbaŭ vielmi mała pravoŭ i adkaznaści, kab siamju vysielić. Učastkovy skazaŭ, što sprabavali na Ihara zavieści kryminalnuju spravu, ale jon invalid, tamu nijakaha pakarańnia jon nie atrymaje.
Natalla kaža, što Viera i Ihar sapraŭdy časta pili i raźviali ŭ kvatery antysanitaryju. Za što na ich padali ŭ sud.
— Im tady ŭsiaho tolki dali štraf! Tady sacyjalnyja słužby rajona padklučylisia i zrabili ŭ kvatery sanapracoŭku — prusaki prapali.
Susiedzi zaŭvažyli, što pažar Ihar robić, kali viartajecca ź lakarni. Naprykład, 11 čysła, kali było čarhovaje ŭzharańnie, jaho tolki dastavili dadomu.
Usim žycharam doma kažuć, što padpalščyk adekvatny. Ale susiedzi ŭsio ž paprasili pravieści psichanieŭrałahičnuju ekśpiertyzu Ihara.
— Zdarovy čałaviek nie moža try razy padpalvać svajo žyllo, — dadaje Natalla.
Žančyna tłumačyć nam, što susiedzi ŭžo dumali pra toje, kab strachavać žyllo.
— Ale što nam strachavaja kampanija pakryje? 30% koštu žylla? Jany realna nie pakryjuć zatraty, — kaža Natalla i tłumačyć, što ciapier susiedzi chočuć vyrašyć pytańnie ź siamjoj praz administracyju rajona.
— Usie ŭžo stamilisia! Nam kažuć: «Čaho vy žyviacie z hetaj pamyjnicaj i ničoha nie robicie?» My chadzili, my prasili, ale ničoha nie robicca!
Piensijanierka Nina žyvie ŭ tambury pa susiedstvie z paharelcami. Žančyna kaža, što dla zvarotu ŭ administracyju padpisalisia dva padjezdy.
— Jon vychodzić, skandalić — ja adrazu vyklikaju milicyju abo chutkuju! U hety raz ja vyjšła, kali pačuła dym, a jon u kalidory tut staić. Ahniu tady nie było, tolki dym.
Usie žychary sychodziacca ŭ adnym: treba damahčysia vysialeńnia niebiaśpiečnaj siamji z domu praź lubyja instancyi.
Dyrektar saccentra: «Kali adpraŭlajem jaho ŭ internat — prosić soniečny pakoj na dvaich»
Pa kamientar pra paharelcaŭ na Adzincova my źviarnulisia ŭ centr sacyjalnaha absłuhoŭvańnia nasielnictva Frunzienskaha rajona. Dyrektar Alena Śviryd raspaviała historyju siamji.
— Usie słužby rajona kantralujuć situacyju ŭžo bolš za 10 hadoŭ. U kvatery vialikija zapazyčanaści pa kamunalnych płaciažach, para znachodzicca na ŭliku ŭ milicyi, u ratavalnikaŭ. Ihar vielmi ahresiŭny. Niekalki hadoŭ tamu jon patelefanavaŭ u milicyju i skazaŭ, što zaminiravaŭ dom.
Takija dziejańni mužčyny taksama tłumačać tym, što jon lubić uvahu.
Śviryd paćviardžaje i toje, što mužčyna ździajśniaje padpał i prosta vyjazdžaje na kalascy čakać ratavalnikaŭ. A ad ustalavańnia pažarnaha apaviaščalnika siamja štohod admaŭlajecca.
Mužčyna kožny raz nie padpisvaje dakumienty — kaža, što jon ślapy. Ja nazirała ślapych, ja razumieju, kali čałaviek nie bačyć. Ihar ślapy tolki na adno voka, druhim jon usio bačyć. I jon moža stajać na nahach.
Tak jak aboje ŭ siamji invalidy, Iharu i Viery dapamahajuć roznyja słužby. 8 hadoŭ para znachodzicca pad apiekaj Čyrvonaha Kryža. Dapamohu im akazvaje i sacyjalnaja słužba rajona — adnaŭlali dakumienty, afarmlali ŭ internat, apracoŭvali kvateru ad prusakoŭ, pryvodzili jaje ŭ paradak paśla pažaraŭ, zrabili hrupy invalidnaści, znajšli dla siamji rečy i meblu.
— Ihar vielmi chitry čałaviek, jon viedaje, kamu, što i kali havaryć. Telefanavaŭ mnie niejak i havaryŭ pra žonku: «Jana ž tam lehła i prykinułasia, jana ž lanivaja». Jon jaje źbivaŭ, ale Viera hetaha niekalki hadoŭ nie pryznavała.
A Viera, pa słovach kiraŭnika centra, źviazałasia ź Iharam jašče ŭ maładości: pryjšła da byłoha viaźnia z dačkoj ad pieršaha šlubu. Aboje pačali pić.
— Jon nastolki Vieru padmiaŭ pad siabie! Što jana zabyła rodnuju dačku. U razmovie z dačkoj prahučała fraza pra toje, što ŭ 11 hadoŭ jaje dziacinstva skončyłasia.
Pry hetym dačka Viery sprabavała vyrašyć prablemu i pamirycca ź siamjoj. Jana z synam prapisanaja ŭ hetaj kvatery i dva hady tamu prapanavała pryvatyzavać žyllo, prybracca i dalej akazvać siamji dapamohu. Ale z umovaj, što kvatera piarojdzie joj abo synu ŭ spadčynu. Ihar na takuju prapanovu adkazaŭ kateharyčnaj admovaj.
Tak dačka Viery vyrašyła bolš nikoli nie źviazvacca z maci i jaje sužycielem. Joju apiekavałasia žančyna-sacrabotnik.
Taksama my paprasili rastłumačyć situacyju z nakiravańniem Ihara ŭ internat.
— Pakiet dakumientaŭ my ŭžo rychtavali niekalki razoŭ. Kolki razoŭ ni pisali, što jon zanadta ahresiŭny, apisvali vypadki padpałaŭ, «miniravańnie doma» — jamu dajuć ahulny typ internata.
Heta značyć, što na abśledavańni psichijatram mužčynu pryznajuć adekvatnym. Śviryd kaža, što kožny raz pry praviercy Ihar supakojvajecca i pavodzić siabie narmalna. A kab patrapić u internat, jamu treba tolki dać svaju zhodu i padpisać dakumienty. Ale tut akazałasia nie ŭsio tak prosta.
— Mužčyna vystaŭlaje ŭmovy — prosić soniečnaje pakoj na dvaich z dvuchspalnym łožkam. A kali jamu prynosiać dakumienty — jon upirajecca, kaža, što ślapy i ničoha nie bačyć.
Ciapier jon znachodzicca ŭ balnicy chutkaj dapamohi. Dalej jaho znoŭ buduć nakiroŭvać u internat. U hety raz mužčyna ŭsio-taki daŭ zhodu i pastaviŭ svoj podpis u nieabchodnych dakumientach.
Vieru, jak stała viadoma, pakul pakłali ŭ chośpis. Jana maje patrebu ŭ pastajannym dohladzie, tamu dalej jaje nakirujuć u dom-internat psichanieŭrałahičnaha profilu.
MNS: «Materyjały dla śledstva nakiravany ŭ RUUS»
U MNS paviedamili, što ŭsie materyjały pa hetych troch uzharańniaŭ nakiravanyja ŭ RUUS Frunzienskaha rajona.
Za košt dziaržavy ŭ kvatery na Adzincova moža być ustalavany aŭtanomny pažarny apaviaščalnik, patłumačyła pres-sakratar staličnaha ŭpraŭleńnia MNS Volha Mielčanka. Ale dla hetaha, zrazumieła, treba zhoda haspadara.
U RUUS Frunzienskaha rajona tut.by rastłumačyli, što kryminalnyja spravy zaviedzienyja nie byli, tolki pravodzilisia pravierki. Na ŭliku ŭ milicyi hetaja kvatera ličycca jak pryton.
Susiedziam, jakija nazirajuć padobnyja situacyi ŭ inšych damach, rajać źviartacca ŭ administracyju rajona, u MNS i RUUS.
Nahadajem, što ŭ Biełarusi pavodziny žycharoŭ u šmatkvaternym domie rehulujucca Žyllovym kodeksam Respubliki Biełaruś i pastanovaj Saŭmina №399 ab praviłach karystańnia žyłymi pamiaškańniami, utrymańni žyłych i dapamožnych pamiaškańniaŭ. Kali hetyja praviły parušać, to praduhledžana pakarańnie ŭ vyhladzie štrafu da 30 bazavych vieličyń. Kali administracyjnaje parušeńnie fiksujuć try razy za hod, to ŽKH maje prava padavać u sud na žychara i tam buduć vyrašać pytańnie ab jaho vysialeńni.
