U NAN Biełarusi adbyłasia prezientacyja «Histaryčnaha słoŭnika biełaruskaj movy» ŭ 37 vypuskach, stvoranaha ŭ Instytucie movaznaŭstva imia Jakuba Kołasa NAN Biełarusi, pieradaje karespandent ahienctva «Minsk-naviny».
Fota Siarhieja Pažohi
— Unikalnaść «Histaryčnaha słoŭnika biełaruskaj movy» ŭ tym, što heta pieršy i adziny daviednik, jaki z maksimalnaj paŭnatoj adlustroŭvaje bahaćcie słoŭnikavaha fondu biełaruskaj movy XIV—XVIII stahodździaŭ, — padkreśliŭ dyrektar Instytuta movaznaŭstva imia Jakuba Kołasa NAN Biełarusi Ihar Kapyłoŭ. — U im atrymali detalovuju leksikahrafičnuju apracoŭku bolš za 75 tysiač słoŭ, zafiksavanych u hramatach, damovach, statutach, letapisach, chronikach, chranohrafach, voinskich i rycarskich ramanach i apovieściach, miemuarnych, publicystyčnych, navukovych i relihijnych tvorach. «Histaryčny słoŭnik biełaruskaj movy» — nadziejnaja krynica źviestak pra minułaje Biełarusi, jon ŭtrymlivaje najbahaciejšuju infarmacyju ab sacyjalna-ekanamičnym žyćci, materyjalnaj i duchoŭnaj kultury biełaruskaha naroda na praciahu 500 hadoŭ.
— «Histaryčny słoŭnik biełaruskaj movy» možna nazvać sapraŭdnym prajektam stahodździa biełaruskaj humanitarnaj navuki, — kaža zahadčyca adździeła historyi biełaruskaj movy Centra daśledavańniaŭ biełaruskaj kultury, movy i litaratury NAN Biełarusi Natalla Palaščuk. — Raspracoŭka kancepcyi hetaha ŭnikalnaha vydańnia, stvareńnie jaho bazavaj kartateki, padrychtoŭka słoŭnikavych artykułaŭ vialisia z 60-ch hadoŭ minułaha stahodździa ŭ Instytucie movaznaŭstva imia Jakuba Kołasa NAN Biełarusi pad kiraŭnictvam daktaroŭ fiłałahičnych navuk, členaŭ-karespandentaŭ NAN Biełarusi Arkadzia Iosifaviča Žuraŭskaha i Alaksandra Mikałajeviča Bułyki.
Ajčynnyja linhvisty stvaryli šyrokuju kartateku, jakaja składajecca bolš čym z 1 młn kartak, jakuju taksama možna ličyć kulturnym i navukovym abjektam nacyjanalnaha značeńnia. «Histaryčny słoŭnik biełaruskaj movy» raźličany jak na śpiecyjalistaŭ (linhvistaŭ, historykaŭ, litaraturaznaŭcaŭ), tak i na ŭsich, chto cikavicca minułym svajoj krainy. Z časam dla bolšaj dastupnaści 37-tomnaha słoŭnika jaho aŭtary płanujuć raspracavać elektronnuju viersiju.
