Zatrymany pry vyjeździe ź Biełarusi va Ŭkrainu, Žalan Vijo (Jolan Viaud) mieŭ u kišeni kulu, jakuju jamu padaravaŭ u Varšavie polski siabar u jakaści suvenira, piša radyjo «Svaboda».
Sud nad zatrymanym maje adbycca praź niekalki tydniaŭ. Jamu pahražaje ad troch da siami hadoŭ turmy za niezadeklaravany pravoz bojeprypasaŭ praź miažu.
Pra heta paviedamlajecca na sajcie paŭdniovafrancuskaj hazety La Depèche.
Małady francuz raniej sioleta vypraviŭsia ŭ padarožža pa Eŭropie. 21 vieraśnia, kali jon vyjaždžaŭ ź Biełarusi va Ŭkrainu, jon byŭ zatrymany na miažy. Pryčynaj stała kula, jakuju jon trymaŭ u kišeni jak suvenir, jaki padaravaŭ jamu Paveł, u jakoha padarožnik spyniaŭsia ŭ Varšavie. Pra heta zatrymany paviedamiŭ u liście, jaki jamu ŭdałosia pierasłać siam'i ŭ Francyju praz try tydni paśla zatrymańnia.
Žalan Vijo raskazvaje što, nie čakajučy pytańniaŭ mytnika, jon pakazaŭ kulu sam, kab daviedacca, ci jaje možna pravieźci. Adnak mytniki havaryli tolki pa-rasiejsku, i tamu «dyjaloh byŭ niemahčymy». «Kali b ja viedaŭ, što heta zabaroniena, ja b jaje nia ŭziaŭ abo lepš by schavaŭ», — piša Žalan Vijo ŭ liście.
Vijo byŭ zatrymany i źmieščany ŭ SIZA. Tam jon sutyknuŭsia ź «nialudzkimi ŭmovami, uskładnienymi biełaruskim klimatam». Spačatku jaho mučyli choładam, nie dajučy koŭdry i ciopłaha adzieńnia, jamu zabaranili kantakt ź siamjoj, paśla prymusili zhalić baradu. Aficyjna pryznačanaja advakatka nie havoryć ni pa-francusku, ni pa-anhielsku. Urešcie, u minułuju subotu, bolš čym praź miesiac paśla zatrymańnia, jamu dazvalajuć napisać siamji.
Siamja Žalana Vijo raspačała kampaniju ŭ sacyjalnych sietkach za jahonaje vyzvaleńnie i źbiraje hrošy na novaha advakata.
Dziažurny Homielskaha śledčaha izalatara paćvierdziŭ staršyni haradzkoj arhanizacyi Biełaruskaj asacyjacyi žurnalistaŭ Anatolu Hatoŭčycu, što zatrymany pry vyjeździe ź Biełarusi va Ŭkrainu Žalan Vijo sapraŭdy znachodzicca u SIZA pad vartaju. Nijakaj inšaj infarmacyi dziažurny nia daŭ.
Pavodle słovaŭ Hatoŭčyca, homielskaja arhanizacyi BAŽ źbiraje charčovuju pieradaču dla francuzkaha kalehi.
