Kolki i jakoj Rasiei ŭ biełaruskich ŚMI? Čamu biełaruskija medyja i aŭdytoryja «žyvuć žyćciom inšaj dziaržavy»? Słuchaj, čytaj, hladzi, abmiarkoŭvaj biełaruskaje — ci mohuć dać plon takija zakliki? Hetyja pytańni ŭ Praskim akcencie na Radyjo Svaboda abmiarkoŭvajuć hałoŭny redaktar partału TUT.BY Maryna Zołatava, namieśnik redaktara hazety «Naša niva» Źmicier Pankaviec i redaktar vydańnia REFORMATION Siarhiej Charytonaŭ.
Pavał Jakubovič suprać Ksienii Sabčak
Drakachrust: Padčas apošniaj pieradačy «Klubu redaktaraŭ» redaktar SB Pavał Jakubovič na prapanovu abmierkavać vyłučeńnie Ksienii Sabčak adkazaŭ rezkaj vodpaviedździu:
«Čas nam, hramadzianam Biełarusi, mienš žyć žyćciom inšaj dziaržavy…. Da čaho ja zaklikaju? Usie my, hramadzianie Biełarusi, pavinny ŭsio bolš i bolš razumieć, što ŭžo 25 hadoŭ my — niezaležnaja eŭrapiejskaja dziaržava. A my ŭsio žyviom drobnymi žarściami niejkich maskoŭskich aktoraŭ, niejkimi skandalčykami, niejkimi Sabčak. … Ja hatovy havaryć pra kaleh Labiedźku, Statkieviča i inšych z našmat bolšaj cikavaściu, čym historyi Sabčak, naradžeńnie ci hibiel niejkaj zorki ŭ Rasii. My pavinny ŭrešcie razumieć, što my kraina».
Davajcie napačatku pra kanstatacyju — ci sapraŭdy Rasieja zajmaje ŭ biełaruskaj infarmacyjnaj prastory takoje niepraparcyjna vialikaje miesca? I ja navat nie pra rasiejskija ŚMI, najpierš telekanały, a pra biełaruskija. Ci miesca naležnaje, adekvatnaje, bo Rasieja — vialiki susied, sajuźnik, kulturny mahnit, tak by mović? Nu i pryciahvaje. Ci ŭsio ž Jakubovič maje racyju — zanadta ŭžo medyja-prastora Biełarusi «žyvie žyćciom inšaj dziaržavy»?
Pankaviec: Vielmi pryhožyja słovy Paŭła Izotaviča i, zdajecca, možna było b pahadzicca. Ale tak voś atrymałasia, što absalutna vypadkova pierad samym efiram ja ŭvajšoŭ uva VKontaktie, ja tam padpisany na supołku «Sovietskoj Biełoruśsii», i pieršaja navina, jakaja vyskačyła, heta pra toje, što matacykł z Macildaj pradali tam za niejkuju sumu. Druhaja navina ŭ stužcy hazety VKontaktie — śmierć aktora Marjanava. Prabačcie, ja nia viedaju, chto taki rasiejski aktor Marjanaŭ. Mnie heta absalutna niajasna. I prosta tut hetyja słovy Paŭła Izotaviča razychodziacca z realnymi spravami.
Mnie zdajecca, što adkaz na pytańnie, ci šmat Rasiei — šmat. Ale pytańnie trochi z sehmentacyjaj. Kali my kažam pra takija sfery, jak palityka, to ŭvahu pryciahvajuć prezydenckija vybary ŭ Rasiei. Ale dakładna hetak ža biełarusy sačyli za pryhodami Makrona, za Trampam, hetak ža ŭvažliva buduć sačyć i za vybarami nastupnaha hodu. Ale kali brać inšyja aspekty rasiejskaha palityčnaha žyćcia — dziejnaść partyjaŭ, pryznačeńni ministraŭ, to heta biełarusaŭ usio mienš i mienš cikavić. Być moža i całkam nie cikavić. Sfera rasiejskaha sportu taksama ŭsio mienš cikavić.
Zastajecca tolki sfera šoŭ-biznesu, jakoj u nas u Biełarusi svajoj paŭnavartasnaj niama. I ŭ hetym sehmencie šoŭ-biznesu i kultury Rasieja sapraŭdy daminuje ŭ infarmacyjnaj prastory Biełarusi.
Na BT ja časam łaŭlu siabie na dumcy, što Rasieja prysutničaje tolki ŭ niejkich apakaliptyčnych padziejach — pažary, ziemlatrusy, katastrofy. A voś na BIEŁTA zachodziš u rubryku «Kalejdaskop» i pra što jany tam pišuć uvohule? Viečnyja Kirkoravy, Hazmanavy i h.d. Tamu ja kažu, što ŭ pytańniach palityki, sportu, kryminalnych zdareńniaŭ Rasieja stanovicca ŭsio mienš cikavaj, a voś u šoŭ-biznesie i kultury jana trymaje mocnyja pazycyi ŭ biełaruskaj infarmacyjnaj prastory.
Drakachrust: Maryna, a jak vašyja adčuvańni? Ci nie zanadta šmat Rasiei ŭ biełaruskaj infarmacyjnaj prastory? I ŭłasna na vašym partale, jaki ŭ svaim sehmencie biezumoŭny lider, i vy zadajecie i modu, i ŭzor. Voś u vas niama adčuvańnia, što mnahavata Rasiei ci jak raz stolki, kolki i treba?
Zołatava: Ja b nie skazała, što jaje zamnoha, ale ja tut pahadžusia sa Źmitrom u tym pytańni, što sapraŭdy jość niejki pierakos u cikavaści da šoŭ-biznesu. Biełarusy bačać šmat rasiejskich zorak na biełaruskich telekanałach, pa-pieršaje. Pa druhoje, pakul jašče nia vyraśli svaje zorki šoŭ-biznesu takoha kštałtu, jak, naprykład, Ivan Urhant albo taja ž Ksienija Sabčak.
Maryna Zołatava, fota baj.by
A kab skazać, ci nie zanadta šmat, ja navat uziała i razdrukavała najbolš papularnyja naviny, jakija čytali karystalniki našaha partału z pačatku vosieni. I absalutnaja bolšaść ź ich heta, zrazumieła, lakalnyja naviny, i ŭ cikaŭnaści mienavita da ich biełarusy nie adroźnivajucca ad žycharoŭ inšych krainaŭ. Najpierš ludziej cikavić toje, što pobač ź imi i što moža paŭpłyvać na ich žyćcio.
Zrazumieła, dźvie temy daminavali: heta trahičny vypadak u Piečach i jak hetyja padziei raźvivalisia, i pošuki chłopčyka u Biełavieskaj puščy. Što da padziejaŭ suśvietnaha maštabu, to tut siarod našaha topu tolki Łas Viehas — terakt, u vyniku jakoha zahinuła prynamsi piaćdziesiat čałaviek zahinuli.
Što da zorak rasiejskaha šoŭ-biznesu, to siarod piacidziesiaci top-navinaŭ u nas na partale niedzie piać ci šeść byli pryśviečanyja im.
Drakachrust: Siarhiej, Jakubovič mieŭ peŭnuju racyju?
Sierž Charytonaŭ
Charytonaŭ: Pavał Izotavič davoli talenavity čałaviek, jon dobra adčuvaje biełaruskija trendy, u tym liku trendy siarod pradstaŭnikoŭ biełaruskaha narodu na vysokim uzroŭni. Mnie ciažka skazać, ci heta było niejkaje razdražnieńnie persanalnaje ci nasamreč sytuacyja takaja, ale z taho, što ja baču, na samoj spravie ŭ Biełarusi davoli šmat ludziej, jakija pa-raniejšamu žyvuć u rasiejskaj infarmacyjnaj prastory.
I heta adbyvajecca z-za taho, što ŭ nas daminuje rasiejskaje telebačańnie ci ludzi čytajuć rasiejskija vebsajty. Ja dumaju, sprava jašče ŭ tym, što biełarusy nia mohuć zaraz prapanavać niejkija kankurentazdolnyja prajekty ŭ sfery šoŭ-biznesu, ab jakich užo raniej kazaŭ spadar Pankaviec.
Nu što takoje biełaruskija telekanały? U nas jość taki termin «sacyjalny pakiet telekanałaŭ». I što my tam majem? My majem «Biełaruś 1», my majem retranślacyju rasiejskaha «Pieršaha kanału», heta ONT, majem kanał «Mir», jaki stvorany krainami SND, majem kanał «Rośsija», i dalej staličnaje telebačańnie i adnatypnyja «Biełaruś 2, 3, 5»… Voś heta biełaruskija telekanały.
I mnie zdajecca, što paradak dnia zadajecca ŭ pieršuju čarhu telebačańniem, a nie hazetami ci vebsajtami. Tamu ja dumaju, što davoli vialikuju rolu ŭ hetym adyhryvaje i biełaruskaje telebačańnie, u tym, što ludzi praciahvajuć žyć žyćciom inšaj dziaržavy.
Voś ja haradzieniec i pa pierakanańniach, i pa pašparcie. I dla mianie Rasieja — heta takaja ž zamiežnaja kraina, jak Litva, Łatvija, Polšča i Ukraina navat. Ale ja nie razumieju, čamu Horadnia kožny hod žyvie paŭhoda pa maskoŭskim časie z roźnicaj u dźvie hadziny ad miaścinaŭ, jakija znachodziacca ŭ tryccaci kilametrach ad majho horada. Tamu ja sa spadarom Jakubovičam całkam zhodny. My žyviem dvaccać piać hadoŭ u niezaležnaj krainie i čas užo vybudoŭvać infarmacyjnuju niebiaśpieku. Asabliva ŭličvajučy tyja pravakacyi, jakija adbylisia padčas vučeńniaŭ «Zachadu-2017».
Drakachrust: A voś jak vy ličycie, heta dysbalans vyklikany abjektyŭnymi acenkami, ci sprava ŭ tym, što BT abjektyŭna bolš ubohaje, čym Pieršy kanał Rasiei, ci heta peŭny biełaruski pohlad? Bo miarkuju, što i, skažam, aŭstryjskaje telebačańnie nie takoje mocnaje, jak niamieckaje, belhijskaje telebačańnie na francuskaj movie słabiej, čym francuskaje z Paryžu. Ale belhijcy, niahledziačy na hety abjektyŭny dysbalans, hladziać svajo, aŭstryjcy hladziać svajo. A biełarusy hladziać rasiejskaje. Tamu što jano abjektyŭna lepš ci z pryčyny ŭstanoŭki — «z samoj Maskvy skazali (ci pakazali)»?
Charytonaŭ: Možna adznačyć, i vy heta pravilna kažacie, što ŭ Biełarusi davoli pravincyjnaja miedyjaprastora, i kožny kamentar pra Biełaruś, jaki prychodzić z Rasiei, stanovicca navinoj usiebiełaruskaha maštabu. Heta davoli drenna. I ja dumaju, heta zachoŭvajecca jašče i tamu, što my isnujom u rasiejskamoŭnaj prastory. U našaj krainie dakładna bolš ludziej, jakija razmaŭlajuć pa-rasiejsku. A najvialikšaja kraina, jakaja razmaŭlaje pa-rasiejsku, heta Rasieja.
Kali my paraŭnajem heta z anhłamoŭnym śvietam, dyk tam i Złučanyja Štaty, i Vialikabrytanija, i Aŭstralija, i inšyja krainy — tam jość svaje standarty dla telebačańnia, ź jakimi možna paraŭnoŭvać. Infarmacyja, jakaja prychodzić pa-anhielsku ŭ sučasnym śviecie, davoli vysokaj jakaści. Na žal, Biełaruś u dadzieny momant nia moža prapanavać pradukt takoha ž uzroŭniu, jaki byŭ by zrobleny na rasiejskaj movie ci na biełaruskaj. Na žal. Ja dumaju, heta prosta vybar, jaki robiać ludzi na karyść bolš vysokaj jakaści kantentu.
Rasiejski kantent — štučny ci naturalny?
Drakachrust: Kalehi, my ŭžo pačali pra heta havaryć — u jakich biełaruskich ŚMI Rasiei bolš — u dziaržaŭnych ci ŭ niedziaržaŭnych? I ŭ jakich jakoj Rasiei bolš, tak by mović? Skažam, u SB pra apošni raman Pialevina ci stužku Sakurava nie napišuć. A ŭ KUKU — mohuć i napisać. Ci ŭ klub Aleksijevič zaprasić. Voś Aleksijevič Sakurava i zaprasiła. Ź inšaha boku, u dziaržaŭnych ŚMI jość linija: Rasieja — siabra, brat i h.d. Jak by nielha zabyvać. Dyk u kaho jaje bolš i jakoj?
Zołatava: Ja specyjalna, kaniešnie, nie analizavała hetaje pytańnie. Kali kazać pra bolšuju ŭvahu, to heta datyčycca ŭ pieršuju čarhu šoŭ-biznesu. I ja miarkuju, što ŭ dziaržaŭnych ŚMI hetaj infarmacyi bolš. Ale ja nie mahu być upeŭnienaj. Asablivy status navinaŭ, jakija datyčać zorak, całkam tłumačycca abjektyŭnymi pryčynami: pieršaje, heta status našych telekanałaŭ, jakija tranślujuć rasiejski kantent, a druhoje, heta toje, što my jašče nia vyraścili ci ŭ nas nie źjavilisia svaje asoby maštabu Urhanta.
Naŭrad ci budzie pravilnym krokam, kali my budziem ahresiŭna nakidać i sprabavać znachodzić štučna niejkich svaich asobaŭ, jakija mahli b zamianić rasiejskich. Tamu što intaresy ludziej ad hetaha nie pamianiajucca, bo kali im cikavy Kirkoraŭ, to jany buduć čytać hetyja naviny na rasiejskich resursach ci ŭ niejkich inšych krynicach, ale jany nie pačnuć ad hetaha čytać pra biełaruskich zorak. To bok treba šukać niejkaje inšaje vyjście z hetaha. Ci moža i ŭvohule nia treba, a hety praces pavinien iści naturalna.
Drakachrust: Siarhiej, a jak vy adkazvajecie na hetaje pytańnie? Ja pahladzieŭ reakcyju publiki na demarš Jakuboviča ŭ majoj stužcy ŭ FB. Cikava, što ludzi «ruskaha śvietu» nijak nie adreahavali. A voś adna z ahladalnic KUKU adreahavała vielmi ahresiŭna i napisała, maŭlaŭ, Jakubovič nas vučyć budzie? My sami vyznačym, pra što nam pisać. Budziem chacieć havaryć pra Rasieju, budziem havaryć pra Rasieju stolki, kolki treba.
Voś heta mnie było vielmi cikava: ludzi, jakija pa idei pavinnyja byli stać haroj na abaronu svajoj Rasiei, im heta abyjakava prajšło. A čałaviek, jaki nie taki ŭžo adept Rasiei, tym nia mienš staŭ na bok nie skažu, što Rasiei, ale svajho ŭłasnaha intaresu. Ja razumieju, što hety test davoli ŭmoŭny, ale tym nia mienš: u kaho bolš Rasiei i jakoj?
Charytonaŭ: Ja dumaju, što ŭ dziaržaŭnych ŚMI Biełarusi Rasieja dakładna pradstaŭlajecca bratami, viernymi sajuźnikami. U Rasiei budzie vielmi pazytyŭny imidž. Kaniešnie, heta źmianiajecca padčas kryzysaŭ, kali pačynajucca niejkija hazavyja, małočnyja ci inšyja vojny pamiž Biełaruśsiu i Rasiejaj. Ale možna skazać, što heta pazytyŭna-neŭtralny imidž.
U niezaležnych ŚMI Rasieja, kaniešnie, budzie pradstaŭlacca jak apłot varožaści i apošniaja dyktatura śvietu, navat kali heta nia tak. Ja liču, što nieabchodna stvarać niejki balans i nieabchodna, kab biełarusy razumieli, što za miažoj nia vielmi šmat ludziej, jakim my cikavyja, i navat u samoj Rasiei my nia vielmi cikavaja kraina, u ich chapaje svaich unutranych prablemaŭ.
Biełarusy ŭsio ž niejak sprabujuć raŭniacca na Rasieju, i heta šmat u čym źviazana z adukacyjaj, jakuju biełarusy atrymoŭvajuć. Tamu što bolšaść adukacyi ŭ nas rasiejskamoŭnaja, ludzi ŭ asnoŭnym čytajuć biełaruska- albo rasiejskamoŭnyja medyja, chočacca rabić niejkija kalki, niejkija kopii rasiejskich prajektaŭ.
I voś my pačynajem paraŭnovać adnych biełarusaŭ z Dudziom, druhich — z Navalnym, trecich — z Sabčak. Kali my kažam pra intervijujeraŭ, to hladzim na Ivana Urhanta ci Juryja Dudzia. Ale byli i jość Džoni Karsan i Džymi Fełan, adnak my davoli redka čujem paraŭnańni z takimi ludźmi. Heta z-za taho, što my isnujom u rasiejskaj infarmacyjnaj prastory. Kali kazać pra KUKU ŭ hetaj sytuacyi, to treba spytać u hetaj dziaŭčyny, čamu jana vykazała svaju pazycyju mienavita tak. Ja dumaju, što heta taksama źviazana z tym, što pierš za ŭsio z Rasiei prychodziać niejkija naviny, jakija cikavyja biełarusam. Usio ž KUKU — heta kamercyjny prajekt, jon pracuje dla aŭdytoryi. I jak kažuć, klijent zaŭždy maje racyju.
Drakachrust: Źmicier, i vaša acenka, dzie jakoj Rasiei bolš? Ja ŭžo pryhadaŭ hetuju źjavu — klub Aleksijevič, pra jaje naviednikaŭ pišuć vyklučna niezaležnyja ŚMI, ale pišuć. Usie pišuć, i vy navat pišacie. Inšaja sprava, što vy možacie rachmana vykazać pažadańnie, kab nobeleŭskaja laŭreatka zaprašała čaściej haściej nia tolki z adnoj krainaj, navat vielmi joj lubimaj. Ale ŭsio roŭna vy napišycie. Tamu jakaja praporcyja, na vaš pohlad?
Pankaviec: Ja nie skažu, što tut jość čyjaści pieravaha, u dziaržaŭnych ci niedziaržaŭnych. Viedajecie, mnie navat zdajecca, što ŭ niedziaržaŭnych ŚMI Rasiei bolej, i mnie zdajecca, što heta absalutna lahična i vytłumačalna. Bo što dziaržaŭnyja ŚMI mohuć skazać pra Rasieju?
Darečy, adnu remaračku zrablu: «Sovietskaja Biełoruśsija» akurat taki napisała pra novy raman Pielevina, a KUKU ničoha nie napisała. Tak što vy tut pamylilisia.
Ale ŭ dziaržaŭnych ŚMI Rasieja nijak inakš nie paŭstaje, akramia niejkich niaščasnych zdareńniaŭ albo katastrofaŭ, skažam, samalot raźbiŭsia, les zahareŭsia. I šoŭ-biznes: Kirkoraŭ ci Buzava, što jany novaha tam natvaryli. Niejkaj bolš hłybokaj Rasiei ŭ dziaržaŭnych ŚMI niama.
Budziem kazać ščyra, što i ŭ niedziaržaŭnych ŚMI bolš hłybokaj Rasiei vielmi mała i razumieńnia jaje nie chapaje. Ja ŭvohule časam łaŭlu siabie na dumcy, što Rasieja dla mnohich biełarusaŭ — heta kraina, jakuju my viedajem vyklučna z televizara. Nu, moža być, nie dla ŭsich biełarusaŭ, ale jak žychar Miensku ja skažu: dla mienčukoŭ — heta kraina z televizara. Mnohija ludzi abjeździli Litvu, Polšču. A čym žyvie Rasieja, čym tam žyvuć ludzi — chto viedaje? Nichto nia viedaje. I heta taki dysbalans: nibyta Rasiei šmat, a nibyta jaje i zusim niama. Čym tam žyvie, skažam, Tuła ci Astrachań, ja dumaju, mała chto viedaje ŭ Biełarusi.
I ŭ hetym planie pra Rasieju taksama treba pisać bolš hłyboka i pradumana. Što tyčycca rasiejskaj kultury, Sakurava ci Pialevina — hetaha taksama, na moj pohlad, nie chapaje ŭ niedziaržaŭnaj presie, jak nie chapaje ŭ pryncypie i publikacyjaŭ pra biełaruskuju kulturu, bo kultura — pradukt małaspažyvalny čytačami. Šmat vydańniaŭ, i «Naša Niva» ŭ tym liku, apošnim časam stali ŭsio mienš nadavać uvahi biełaruskaj kultury, jak i rasiejskaj. Takija voś zapyty čytačoŭ.
Ci pasłuchajucca biełarusy zakliku «słuchaj svajo»?
Drakachrust: Kalehi, vy ŭžo ŭsie kazali pra adno i toje ž: vy, Źmicier, skazali pra zapyty čytačoŭ, vy, Siarhiej, što pakupnik zaŭsiody maje racyju, vy, Maryna, što jość ža aŭdytoryja i jaje patreby.
Dyk voś u suviazi z hetym, mahčyma, hetyja zakliki «tvaram da Biełarusi», choć by ad Jakuboviča, choć by ad kaho inšaha, moža jany absalutna daremnyja? Cikavić ludziej Rasieja, dyk buduć cikavicca joj. Buduć cikavicca Biełaruśsiu, jakoj jany ŭsio ž taki pavodle vašych słovaŭ pieravažna i cikaviacca, i im heta buduć davać ŚMI. Ale nie tamu što tak paraiŭ ci zahadaŭ Jakubovič, ci Łukašenka, ci niechta inšy. I ŭ hetym sensie ŚMI iduć za svajoj aŭdytoryjaj i heta narmalna.
Ci ŚMI ŭsio ž taki pavinnyja nia tolki iści za aŭdytoryjaj, ale i niejkim čynam vieści jaje ŭ takim nakirunku, što my ŭsio ž taki kraina. I nieabaviazkova pramymi pavučeńniami, ale i pošukam mienavita biełaruskich temaŭ, pošukam rakursu ich aśviatleńnia?
Charytonaŭ: Ja dumaju, što heta dakładna vartaja sprava. I mienavita biełarusacentryčna my sprabujem pradastaŭlać infarmacyju na našym partale. Viedajecie, u čym sprava? My nia zmožam aŭdytoryi skazać, što joj čytać, bo jana zaŭsiody budzie čytać toje, što joj cikava. I ja dumaju, što našaja rola, jak menedžeraŭ, ci žurnalistaŭ, ci prosta biełarusaŭ u tym, kab stvarać niejkija rečy, jakija buduć sapraŭdy cikavyja ludziam i asabliva moładzi.
Tamu što my majem z čym paraŭnoŭvać. Užo navat i šaścidziesiaci- i siamidziesiacihadovyja ludzi majuć internet u chacie, i starejšaje pakaleńnie taksama moža paraŭnać biełaruski kantent z zamiežnym. Tamu ja dumaju, što jak tolki my zmožam pierajści ad navinaŭ kštałtu rep-batła Stasia Karpava i Antona Rudaka, ci pošuku kvatery Antonam Matolkam, ci raspoviadami pra inšych «śvieckich ilvoŭ» na «Našaj Nivie», ja dumaju, ludziam budzie cikava čytać i pra Biełaruś.
Na samoj spravie davoli šmat roznych cikavych rečaŭ adbyvajecca, jość šmat cikavych artystaŭ i talenavitych ludziej, jakija žyvuć u Biełarusi i jakich možna časam nie zaŭvažać, jak heta robiać niekatoryja dziaržaŭnyja ŚMI. Ale, ź inšaha boku, takaja palityka «rukaniepaciskalnaści» isnuje i ŭ niedziaržaŭnych ŚMI. I ja dumaju, što aproč taho, kab stvarać sapraŭdy cikavy i inavacyjny kantent, treba jašče i pierajści praz taki vakuŭm, u jakim isnujuć i dziaržaŭnyja, i niezaležnyja medyja.
Drakachrust: Źmicier, a jak vy adkazvajecie na hetaje pytańnie? Što ludzi chočuć, pra toje i treba pisać? Ci medyja pavinnyja rasstaŭlać akcenty, krychu pavaročvać hetuju liniju? Kali, umoŭna kažučy, jość dylema napisać pra niejkaha pradstaŭnika biełaruskaha šoŭbiza i pra rasiejskaha, a z punktu hledžańnia samoha aŭtara jany prykładna adnolkavyja, lepš pra biełaruskaha napisać? To bok pavinna być niejkaja linija ci pakupnik zaŭsiody maje racyju?
Pankaviec: Naturalna, lepš pisać pra biełaruskaha, tut sumnievaŭ nijakich niama. Tut Siarhiej užo adznačyŭ, što «Naša Niva» užo davoli doŭhi čas viadzie metanakiravanuju palityku — pisać pra biełaruskich selebryci. I ja tut krychu paspračajusia z Marynaj, jakaja kaža, što nielha štučna vyhadavać niejkich ludziej, pra jakich potym buduć pisać.
A što, Dzijana Šuryhina — heta nie štučna vyhadavany pradukt rasiejskaj infarmacyjnaj prastory? Absalutna štučna vyhadavany. I nielha kazać, što heta niejki naturalny intares rasiejskaha i biełaruskaha hramadztva da hetaj Šuryhinaj. I ŭmoŭna kažučy, čym toj ža Ivan Šyła, Anton Matolka ci Volha Harapučyk adroźnivajucca ad hetych Šuryhinych i Buzavych? Ničym, absalutna.
Ci ŭmoŭna kažučy, čym adroźnivajecca Saładucha ad Kirkorava? Taksama ničym. I pra Saładuchu čytajuć naviny, ja dumaju, i na TUT.BY čytajuć, i na Biełcie, i na «Našaj Nivie» vydatna čytajuć. Nijakaj tut roźnicy niama. I darečy, kali kazać pra tyja naviny, za jakija nas vielmi šmat krytykujuć, jany zaŭsiody nabirajuć vydatnyja prahlady. I kazać, što heta ludziam niecikava, nie vypadaje? Cikava hladzieć, čym zajmajucca takija niezvyčajnyja biełaruskija asoby.
Drakachrust: A moža cikava tolki na «Našaj Nivie»? A, skažam, na TUT.BY było by niecikava.
Pankaviec: Chaj by TUT.BY pasprabavaŭ, cikava było by pahladzieć, jakaja ŭ ich była by reakcyja. Ale viedajecie, što značyć cikava na «Našaj Nivie»? Umoŭna kažučy, trynaccać-piatnaccać tysiač prahladaŭ — heta nia tolki žychary Fejsbuku. Niekatoryja ž ludzi žyvuć pa-za miežami Fejsbuku.
Zołatava: Pa-pieršaje, tut treba adznačyć, što kožnaje vydańnie pavinna samastojna vyznačać svaje pryjarytety. I ja dumaju, što ŭ reakcyi dziaŭčyny z KUKU na toje, što skazaŭ Jakubovič, jana jak raz heta i mieła na ŭvazie — što kožny samastojna rasstaŭlaje pryjarytety.
Dla nas važnyja try asnoŭnyja kryteryi: važna, karysna i cikava. I voś zychodziačy z hetaha my i pišam pra tyja ci inšyja źjavy. My zaraz robim staŭku na toje, kab i mižnarodnyja padziei my aśviatlali nie tak, jak rabili raniej, prosta robiačy kopipast z rasiejskich medyjaŭ, bo ŭ nas nie było svajho resursu, kab analizavać usio heta samastojna. Naprykład, na važnyja mižnarodnyja padziei, jak siońniašniaja hadavina Karybskaha kryzysu — u nas svoj punkt hledžańnia na hetuju temu. Ci referendum u Katalonii — kab heta było niešta svajo.
Što da Šuryhinaj, to ja dumaju, što paračku navinaŭ vy znojdziecie ŭ nas pra jaje, ale ja zhodnaja z tym, što heta dakładna štučna zrobleny persanaž, i tamu hetuju temu my nia budziem raźvivać.
Što da cikaŭnaści da Saładuchi i Kirkorava, to ja mahu skazać, što pra Kirkorava ŭ razy bolš čytajuć, čym pra Saładuchu. U Saładuchi kolki ŭsiaho zapisanych albomaŭ?
Drakachrust: To bok ja tak razumieju, što pisać treba bolš pra Kirkorava, čym pra Saładuchu adpaviedna?
Zołatava: Pisać treba pra taho, chto na dadzieny momant daje novuju nahodu, kab pra jaho pisać, a nie tady, kali nahody niama, a davajcie my napišam što-niebudź pra biełaruskaha selebryci. Naprykład, učora ŭ nas vychodziła navina pra Kirkorava čamu? Tamu što kali jon pryjaždžaŭ siudy z kancertam, jon zastaŭsia ŭ niejkaj ahrasiadzibie ŭ Bieraściejskaj vobłaści i tam dva dni žyŭ. I tamu, zrazumieła, ludzi pra heta čytali i tut była niejkaja zaŭvažnaja nahoda. I čytali vielmi dobra — bolš za sto tysiač prahladaŭ było ŭ hetaj naviny.
