Ministerstva infarmacyi ŭdakładniła śpis pretenzij da sajta Chartyja'97. Nahadajem, što 24 studzienia viedamstvam na padstavie padpunkta 1.2 punkta 1 artykuła 51-1 Zakona «Ab ŚMI» pryniata rašeńnie ab abmiežavańni dostupu da hetaha infarmacyjnaha resursu.
Rašeńnie pryniata ŭ suviazi z raźmiaščeńniem na resursie infarmacyi, raspaŭsiudžvańnie jakoj zabaroniena artykułam 38 Zakona Respubliki Biełaruś «Ab ŚMI», adznačajecca ŭ paviedamleńni
U pryvatnaści, na infarmacyjnym resursie publikavalisia materyjały, jakija źmiaščajuć infarmacyju, raspaŭsiud jakoj zdolny nanieści škodu nacyjanalnym intaresam Biełarusi.
U adpaviednaści z Kancepcyjaj nacyjanalnaj biaśpieki pad nacyjanalnymi intaresami majecca na ŭvazie sukupnaść patreb dziaržavy pa realizacyi zbałansavanych intaresaŭ asoby, hramadstva i dziaržavy, jakija dazvalajuć zabiaśpiečvać kanstytucyjnyja pravy, svabody, vysokuju jakaść žyćcia hramadzian, niezaležnaść, terytaryjalnuju cełasnaść, suvierenitet i ŭstojlivaje raźvićcio Respubliki Biełaruś.
Akramia taho, na resursie raźmiaščalisia artykuły z ukazańniem daty i miesca praviadzieńnia masavaha mierapryjemstva, dazvoł na praviadzieńnie jakoha na momant raźmiaščeńnia publikacyi atrymana nie było.
Pry hetym zhodna z artykułam 8 Zakona Respubliki Biełaruś «Ab masavych mierapryjemstvach» da atrymańnia dazvołu na praviadzieńnie masavaha mierapryjemstva jaho arhanizatar (arhanizatary), a taksama inšyja asoby nie majuć prava abviaščać u ŚMI, internecie abo inšych infarmacyjnych sietkach ab dacie, miescy i časie jaho praviadzieńnia, vyrablać i raspaŭsiudžvać z hetaj metaj ŭlotki, płakaty i inšyja materyjały.
Taksama adnoj z padstavaŭ dla pryniaćcia rašeńnia ab abmiežavańni dostupu stała raspaŭsiudžvańnie praz charter97.org infarmacyjnaj pradukcyi resursu, jaki rašeńniem suda pryznany ekstremisckim materyjałam i ŭniesieny ŭ respublikanski śpis ekstremisckich materyjałaŭ, adznačajecca ŭ pres-relizie Mininfarma.
Što za materyjały, nie ŭdakładniajecca.
