Słabadskaja vybarčaja akruha №28 — admietnaja. Heta adzinaja akruha ŭ Minsku, dzie siarod kandydataŭ niama nivodnaha admietnaha pradstaŭnika dziaržavy — ni nastaŭnika, ni doktara, ni navat jakoha-nijakoha dyrektara zavoda.
Dyrektar TAA «Vipoint» Pavieł Bačarnikaŭ — samy bahaty kandydat. Jon mieŭ bolš za $20 tysiač na miesiac, ale kali biznesmienaŭ puskali ŭ Minharsaviet?
Aproč jaho, bałatujucca dva apazicyjaniery — Juraś Mielaškievič ad BNF i Ała Tołkač ad «Havary praŭdu». Jany źbirali podpisy miascovych žycharoŭ, ale ŭ cełym ich ahitacyjnaja kampanija była nadzvyčaj pasiŭnaja. Zrešty, mienavita takaja stratehija — niezaŭvažnaść — dazvoliła Hańnie Kanapackaj ad AHP trapić pazaletaś u parłamient.
Jašče dva kandydaty — spuščanyja pa partyjnych śpisach markietołah Taćciana Patockaja ad ŁDPB i kiroŭca-kamunist Viktar Šaciła.
Dla vas vidavočna, chto ź ich budzie pryznačany ŭ Minharsaviet? Dla mianie — nie zusim.
57 kandydataŭ, jakija buduć abranyja ŭ Minharsaviet — praviercie śpis paśla vybaraŭ PRAHNOZ «NN»
…Ja na ŭčastku №104 u škole №205 na vulicy Jasienina, heta spalny rajon stalicy. Učastak nie admietny ab-sa-lut-na ničym. Naadvarot, jon samy typovy — usie dzieviać členaŭ kamisii pracujuć u adnoj i hetaj samaj škole.
Kali pahladzieć na skład kamisii, pra heta i nie zdahadaješsia. Farmalna niechta vyłučaŭsia ad ahrarnaj partyi, niechta — ad abjadnańnia vieteranaŭ. Jość i Sajuz žančyn, i BRSM.
Staršynia kamisii — Nina Džabier, namieśnica dyrektara pa navučalnaj rabocie i nastaŭnica hieahrafii. Pabačyŭšy svoj zdymak u administratyŭnaj paneli sajta «Našaj Nivy», jana raschvalavałasia i paklikała na dapamohu naziralnicu ź inšaha ŭčastka. Boj-babula zakaciła skandał: chto heta karystajecca internetam na ŭčastku?
Nina Džabier.
Adna z členaŭ kamisii papiaredžvaje: nie śmiejcie mianie fatahrafavać biez dazvołu. «A što, kali vy sfatahrafujecie mianie ŭ parku — publičnym miescy — i vystavicie na pornasajt?» Kali jana ŭstaje, na nazie vidna zahadkavaja tatuiroŭka ŭ vyhladzie kotki.
Na samim učastku №104 naziralnicy tolki dźvie. Abiedźvie jany vyłučalisia «ad hramadzian». Ale abiedźvie pracujuć u hetaj samaj škole, što i ŭsia kamisija.
Jany z chodu nie mohuć uzhadać, na jakoj akruzie pracujuć. I rasstrojvajucca, kali daviedvajucca, što ja źbirajusia znachodzicca na ŭčastku da apošniaha.
Ni Mielaškievič, ni Tołkač svaich naziralnikaŭ nie vystaŭlali.
Tamu spraŭdzić ličby jaŭki niama ŭ kaho. Pavodle aficyjnych padlikaŭ, daterminova prahałasavali 786 čałaviek z 2200 zapisanych. Heta 35,7%.
Chto pieramoža pa vynikach padliku hałasoŭ? Budzie abnoŭlena paśla 20:00.
* * *
20:05. Nievykarystanych biuleteniaŭ zastałosia 959. Značycca, u dzień hałasavańnia na ŭčastki pryjšli 455 čałaviek — tolki 20,6% vybarcaŭ.
20:10. Adna naziralnica tym časam pierapisvaje ŭ inšaj spravazdaču ab adsutnaści parušeńniaŭ padčas vybaraŭ.
20:15. Členy kamisii pa adnym padnosiać stosiki ź biuleteniami daterminovaha hałasavańnia na staršyni kamisii i sakratara Viktoryja Sakolčyk. Nichto inšy ahulnaj karciny nie bačyć.
20:20. Za 20 chvilin členy kamisii dali rady sotniam biuleteniaŭ daterminovaha hałasavańnia. Miechanizm adpracavany nadzvyčaj dobra. Vyniki abiacajuć nazvać paśla — pakul sakratar padbivaje ličby.
Adznaču, što ahulnych stosaŭ ź biuleteniami za taho ci inšaha kandydata niama, tamu pabačyć pa vyšyni stosika, što ŭmoŭny Mielaškievič pieramahaje, niemahčyma navat tearetyčna.
20:30. Heta fijaska. Pa vynikach daterminovaha hałasavańnia biznesmien Bačarnikaŭ atrymaŭ 494 hałasoŭ, u Tołkač — 42 hałasy, u Mielaškieviča — 34. Kandydatcy ad ŁDPB naličyli 34 hałasy, a kamunistu — 23.
20:50. A ciapier jość i vynikovyja padliki.
- Bačarnikaŭ — 715 (57,6%)
- Suprać usich — 183 (14,7%)
- Patockaja (ŁDPB) — 94 (7,6%)
- Tołkač (Havary praŭdu) — 87 (7%)
- Mielaškievič (BNF) — 75 (6%)
- Šaciła (Kampartyja) — 64 (5,2%)
