Nočču 26 lutaha ŭ vioscy Nioŭda pry sprobie vyciahnuć žančynu z pałajučaha doma na vyratavalnika abrynulisia belki pierakryćcia. Mužčynu dastavili ŭ reanimacyju, ale rana ranicaj jon pamior. Pra heta paviedamlaje pres-słužba MNS.
U paniadziełak u 01.48 u MNS ad vidavočcy pastupiła paviedamleńnie ab pažary ŭ žyłym domie ŭ vioscy Nioŭda Navahrudskaha rajona. Kali ratavalniki prybyli na miesca vykliku, dach budynka byŭ całkam achopleny ahniom. Susiedzi raspaviali, što ŭ domie moža znachodzicca žančyna.
U toj momant, kali ratavalniki znachodzilisia ŭnutry doma, belki pierakryćcia abvalilisia, jak i komin piečy. Kamandzir adździaleńnia staršy praparščyk unutranaj słužby Dźmitryj Zajko apynuŭsia zacisnutym budaŭničymi kanstrukcyjami. Kalehi vyciahnuli jaho z-pad abłomkaŭ, mužčynu adrazu ž dastavili ŭ reanimacyjnaje adździaleńnie balnicy. U 06.19 vyratavalnik pamior.
«Dźmitryj słužyŭ u orhanach i padraździaleńniach pa nadzvyčajnych situacyjach z 1996 hoda, usie havorać pra jaho jak pra daśviedčanaha ratavalnika, nadziejnaha siabra», — raspaviali ŭ MNS.
