Razam ź biełaruskim hramadstvam da Dnia Voli praciahvajuć rychtavacca i rasijskija čarnasociency.
Na rasijskim sajcie «Fond stratiehičieskoj kultury» vyjšaŭ novy artykuł pra śviatkavańnie 100-hodździa abviaščeńnia niezaležnaści BNR. Kali raniej rasijskija čarnasociency krytykavali tolki ŭmoŭnych «nacyjanalistaŭ» i biełaruskija ŭłady, to ciapier jany dabralisia i da Katalickaha Kaścioła ŭ Biełarusi.
Nahadajem, što katalickija biskupy zaklikali pamalicca z nahody 100-hodździa abviaščeńnia Biełaruskaj Narodnaj Respubliki padčas usich nabaženstvaŭ 25 sakavika. «Fond stratiehičieskoj kultury» nie abminuŭ uvahaj hety fakt.
Čarnasociency nazyvajuć BNR «maryjanietačnaj chimieraj», a taksama paŭtarajuć jak mantru tradycyjnyja mify pra BNR. Nibyta BNR, jak i inšyja častki byłoj Rasijskaj Impieryi, była hatovaja stać častkaj Niamieččyny, i faktyčna źjaŭlałasia kajzieraŭskim prajektam.
«Urad BNR pierabiraŭsia śledam za niemcami, usia ŭłada hetaha «ŭrada» trymałasia na niamieckich štykach. Historyja BNR biassłaŭna skončyłasia razam z razhromam i kapitulacyjaj Niamieččyny», — pišuć prapahandysty z «Fonda stratiehičieskoj kultury».
Nastupnym etapam, na dumku čarnasociencaŭ, była toje, što BNR «addałasia palakam».
Na dumku «Fonda stratiehičieskoj kultury», dyviersijny bataljon «Dalvitc» byŭ stvorany z prychilnikaŭ Biełaruskaj Narodnaj Respubliki.
«Dyk za kaho prapanuje malicca katalickaja carkva Biełarusi? Za kałabaracyjanistaŭ — saŭdzielnikaŭ złačynstvaŭ Treciaha rejcha?»
— padsumoŭvajuć čarnasociency.