Centralny matč treciaha tura čempijanatu Biełarusi pa futbole prachodziŭ na «Barysaŭ-Arenie», dzie miascovy BATE prymaŭ bresckaje «Dynama».
Tyja, kamu nadakučyła šmathadovaje znachodžańnie BATE na viaršyni nacyjanalnaha pieršynstva, pastajanna ahučvajuć, chto ž narešcie pierarvie hiehiemoniju hranda. U hetym siezonie najčaściej zhadvajecca bresckaje «Dynama», jakoje sabrała ŭ siabie Hutara, Niachajčyka, Savickaha, Vieraciłu, a taksama zusim nie aby-jakich lehijanieraŭ. Plus da ŭsiaho hrošy na paŭdniovym zachadzie krainy majucca.
Adnak pramaja hulnia kankurentaŭ prademanstravała, što bieraściejcam pakul rana dumać pra čempijonstva. Im by choć za miedali začapicca. BATE całkam pierajhraŭ svaich apanientaŭ pa ŭsich pakaźnikach. Momanty, jakija ŭźnikali la varot Ščarbickaha čaściej za ŭsio śviedčyli pra pamyłki abarony BATE, a nie pra majsterstva haściej.
Pieršy tajm skončyŭsia ź likam 0:0, a druhi pačaŭsia z hoła ŭ bresckija varoty. Sierbski lehijanier-navičok Filipavič abkraŭ abaroncu i dakładna adpasavaŭ na Michaiła Hardziejčuka, jaki adznačyŭsia pieršym hołam paśla traŭmy.
Druhi hoł u hetaj sustrečy zabiŭ Mirka Ivanič, jaki vydatna razyhraŭ miač ź Iharam Stasievičam. Zdavałasia, što Hutar usio ž zafiksavaŭ miač, ale jon prašmyhnuŭ u varoty — 2:0.
Hulnia jašče adznačyłasia viartańniem na biełaruskija pali Alaksandra Hleba, jaki vyjšaŭ na zamienu ŭ siaredzinie druhoha tajma. Zrešty, prajavić siabie lehiendarny paŭabaronca nie paśpieŭ.
Paśla hetaj pieramohi BATE adzinasobna ŭznačaliŭ turnirnuju tablicu. Sprava ŭ tym, što mahiloŭski «Dniapro» siońnia ž zhulaŭ 0:0 z hrodzienskim «Niomanam». Učora «Pramień» sastupiŭ «Viciebsku» 0:2, a salihorski «Šachcior» siensacyjna prajhraŭ doma «Słucku» 1:0.
