Padčas apieracyi.
Biełaruskija dziciačyja kardyjachirurhi ŭpieršyniu ŭ krainie ździejśnili apieracyju pa zamienie kłapana lohačnaj arteryi prazskurnym dostupam praz praśviet sasuda, pieradaje BiełTA.
Pieršym pacyjentam, jakomu praviali takoje ŭmiašańnie, staŭ 12-hadovy chłopčyk sa składanym pryrodžanym parokam serca. Jon pieranios užo čatyry apieracyi na adkrytym sercy. Čarhovaja apieracyja, zroblenaja pa novaj technałohii, prajšła hładka, biez uskładnieńniaŭ.
Pacyjent praz paŭtary hadziny paśla apieracyi.
Zahadčyk renthienapieracyjnaj RNPC dziciačaj chirurhii Pavieł Čarnahłaz rastłumačyŭ, što takija apieracyi, jak praviła, robiać pacyjentam, jakija pieranieśli raniej šmatlikija etapnyja ŭmiašańni i ŭ jakich impłantavany kanduit (pratez sasuda z kłapanam). Z časam takija pratezy praktyčna va ŭsich pacyjentaŭ pierastajuć vykonvać svaju funkcyju. Da taho ž dzicia vyrastaje, a pratez zastajecca taho ž pamieru. Adzinym rašeńniem źjaŭlajecca paŭtornaja adkrytaja apieracyja na serca ź impłantacyjaj novaha kanduita. Heta supravadžajecca razrezam hrudnoj kletki, spynieńniem serca pacyjenta i jaho padklučeńniem da aparata štučnaha krovazvarotu. Apieracyja składanaja technična, dastatkova traŭmatyčnaja i spałučanaja z vysokaj ryzykaj dla pacyjenta.
Pavieł Čarnahłaz.
Novaja technałohija dazvalaje paźbiehnuć paŭtornaha chirurhičnaha ŭmiašańnia. Prazskurnym dostupam (praź vienu) kłapan uvodzicca va ŭžo impłantavany kanduit, pašyrajecca śpiecyjalnym bałonam i zastajecca ŭ pazicyi. Heta dazvalaje adterminavać na mnohija hady nastupnaje chirurhičnaje ŭmiašańnie.
Pierš, čym asvoić novuju apieracyju, biełaruskija kardyjachirurhi prajšli stažyroŭku ŭ italjanskich kaleh. Pieršaja ŭ Biełarusi takaja apieracyja była zroblena pad kiraŭnictvam suśvietna viadomaha miedyka, prafiesara Maryjo Karminaci, jaki ŭ klinicy ŭ Miłanie ŭznačalvaje adździeł pryrodžanych parokaŭ serca.
Pa słovach zahadčyka kardyjachirurhičnaha adździaleńnia №2 Juryja Lińnika, u vypadku raźvićcia stenozu prateza pacyjenty mohuć adčuvać źnižeńnie ŭstojlivaści da fizičnaj nahruzki, narastaje dychavica, sercu ciažka pracavać.
U niekatorych vypadkach endavaskularnaja chirurhija źjaŭlajecca bolš efiektyŭnaj, čym adkrytyja apieracyi. Jana dazvalaje małainvaziŭnym dostupam papiaredzić raźvićcio ciažkaj patałohii ŭ bolš rannija terminy.
