U kancercie taksama voźmie ŭdzieł papularny biełaruski hurt Akute.
Padarunkam dla aŭtaamataraŭ stanie zona aŭtatarmažeńnia Volvo Cars na vulicy Zybickaj, dzie možna budzie samomu aprabavać novuju sistemu City Safety.
Śviata dla minčan i haściej stalicy arhanizuje Pasolstva Šviecyi ŭ Biełarusi sumiesna ź Minharvykankamam pry padtrymcy šviedskich i biełaruskich kampanij. Hienieralnymi sponsarami Dnia Šviecyi vystupajuć Volvo Cars i JETS-Bieł.
Dla ŭsich amataraŭ šviedskaj kultury z hałoŭnaj sceny ciaham dnia prahučyć šviedskaja muzyka ŭ vykanańni chora Concordia. Ulubionyja chity ABBA i Roxette vykanaje kavier-bend Piatra Klujeva. Tancavalny hurt Madcaps zapalić publiku brejk- i chip-chop kampazicyjami ŭ sučasnych rytmach. Hości śviata taksama zmohuć uziać udzieł u «Śpieŭnym schodzie» i zaśpiavać pa-šviedsku razam z hurtom «Vuraj». Usich čakajuć raznastajnyja interaktyŭnyja hulni i viktaryny z kaštoŭnymi pryzami ad sponsaraŭ.
Udzielnikami śviata ŭ Minsku sioleta buduć pradstaŭniki aficyjnaha sajta Šviecyi Sweden.ru, jakija padrychtavali dla haściej Dnia Šviecyi śpiecyjalnuju prahramu, kulminacyjaj jakoj stanie vystup na scenie papularnaha šviedskaha śpievaka Jay-Jay Johanson. Huru kulinarnaha majsterstva Anastasija Łundkvist padzielicca z haściami śviata sakretami šviedskaj kuchni. A na kulturna-adukacyjnaj placoŭcy budzie ŭstalavany šacior, dzie možna budzie ciaham dnia pry dapamozie akularaŭ virtualnaj realnaści paznajomicca sa Šviecyjaj z vyšyni ptušynaha palotu.
Akramia hałoŭnaj sceny, na płoščy taksama buduć dziejničać i inšyja placoŭki: kulturna-adukacyjnaja, infarmacyjnaja, dziciačaja, spartovaja, aŭtamabilnaja, industryjalnaja.
Na kulturna-adukacyjnaj placoŭcy «Spaznaj Šviecyju» (uvachod u zadni dvoryk hatela «Manastyrski» z vulicy Hiercena) adbudziecca prezientacyja navučalnych prahram Šviedskaha Instytuta. Luby achvotny zmoža naviedać majstar-kłas pa tradycyjach śviatkavańnia Siaredziny leta ŭ Šviecyi z hulniami i pieśniami, a taksama razmalavać draŭlanyja fihurki łasia abo dałarnskaha konika. Možna budzie taksama patrapić na ŭrok šviedskaj movy i paspytać ščaścia ŭ viktarynie. Važnuju adukacyjnuju rolu budzie vykonvać stancyja pa sartavańni śmiećcia jak značny elemient sučasnaj šviedskaj palityki ŭstojlivaha raźvićcia.
Na dziciačaj placoŭcy (art-terasa kancertnaj zały «Vierchni horad») pry padtrymcy kampanii IKIEA adbuducca dziciačyja śpiektakli i kancerty pavodle šviedskich kazak. Maleńkija hledačy zmohuć pahladzieć kazku pra karovu Mamu Mu i jaje siabra Krumkača, pasłuchać muzyčnuju historyju pra staroha Petsana i jaho kocika Findusa dy paśpiavać razam piesieńki pra Małoha i Miadźviedzika. Na placoŭcy dzietak taksama čakajuć cikavyja majstar-kłasy «Zrabi łosika» i «Namaluj Šviecyju». A šviedskaja kampanija Oriflame pry dapamozie akvahrymu pieratvoryć małych u ich ulubionych kazačnych hierojaŭ. Tut ža možna budzie nabyć šviedskija dziciačyja knižki ŭ pierakładzie na biełaruskuju movu, sfatahrafavacca ź piersanažami šviedskich kazak i natchnicca vystavaj Šviedskaha Instytuta «17 pryčyn čytać dziciačyja knihi».
U aŭtamabilnaj zonie (na parkinhu z ahladnaj placoŭkaj) hrupa kampanij Volvo Cars, VolvoTrucks, VolvoConstructionEquipmenti Scania prademanstrujuć haściam śviata apošnija madeli aŭtamabilaŭ, hruzavikoŭ i ekskavatara. Aŭtaamatary zmohuć paznajomicca z Volvo XC40, jaki byŭ pryznany «Aŭtamabilem hoda 2018» u Jeŭropie.
Na industryjalnaj placoŭcy (z boku vulicy Lenina) kampanija Husqvarna prademanstruje robata-hazonakasiłku, a taksama hulniavuju zonu z televizaram i šlemam virtualnaj realnaści, pry dapamozie jakoha možna budzie paŭdzielničać u spabornictvie pa abrezcy sučča. SKF prapanuje aznajomicca sa svajoj pradukcyjaj u demanstracyjnym hruzaviku. Pobač raźmieścicca interaktyŭny stend kampanii Bahco Bisov, jakaja vyrablaje piłainstrumient. Elfa (kala Ratušy) paznajomić z sučasnymi šviedskimi sistemami zachoŭvańnia adzieńnia, abutku i inšych chatnich rečaŭ.
U centralnym dvoryku hatela «Manastyrski» (uvachod z vulicy Kiryły i Miefodyja) fłahman šviedskaj bytavoj techniki Electrolux va ŭłasnym hastranamičnym teatry praviadzie majstar-kłasy pa pryhatavańni ježy z dehustacyjaj na abstalavańni kampanii.
Zonu pryhažości stvoryć kampanija Oriflame (kala Ratušy nasuprać sceny), jakaja paznajomić haściej z novaj kaśmietyčnaj pradukcyjaj i daść mahčymaść usim, chto zacikavicca, pasprabavać jaje.
Na infarmacyjnaj placoŭcy (kala hałoŭnaj sceny) možna budzie atrymać kartu mierapryjemstva, a taksama materyjały, pryśviečanyja historyi, kultury i tradycyjam Šviecyi.
Zaprašajem usich amataraŭ aktyŭnych hulniaŭ na spartovuju placoŭku (pierad restaranam «Reniesans») paŭdzielničać u majstar-kłasie pa fłorbole, uziać udzieł u adkrytym čempijanacie pa nastolnym chakiei, futbole i tenisie, a taksama pazajmacca nadzvyčaj papularnaj siońnia skandynaŭskaj chadoj.
Pamiž haradskimi vahami i fantanam «Spadčyna» raskiniecca dziciačaja placoŭka fabryki cacak «Paleśsie», dzie samyja maleńkija znojduć sabie zaniatak pa dušy.
Ciaham śviata na płoščy Svabody budzie pracavać fudkort sa šviedskimi tradycyjnymi stravami. Zrobim naša śviata bolš ekałahičnym, sartyrujučy śmiećcie ŭ śpiecyjalnyja kantejniery ad hrupy kampanij «Ekałohija horada». A dla źnižeńnia kolkaści płastyku možna budzie atrymać na fudkorcie napoi va ŭłasnyja kubki. Toj, chto voźmie ŭdzieł u konkursach na našych placoŭkach, zmoža vyjhrać kubački šviedskaha dyzajnu šmatrazovaha vykarystańnia.
Uładalnikaŭ sabak moža zacikavić pradukcyja kampanii Magnusson Petfood — korm dla sabak, vyrableny pa ŭnikalnaj technałohii.
Dniu Šviecyi budzie papiaredničać Tydzień Šviecyi ŭ Minsku, u miežach jakoha zapłanavany ceły šerah mierapryjemstvaŭ.
25-27 traŭnia ŭ ramkach «Fashion Idea Festival» na art-prastory «OK 16» (vuł. Kastryčnickaja,16) budzie demanstravacca fotavystava «Historyja šviedskaj mody», a taksama projdzie pakaz kalekcyi šviedskaha brenda AMA AWE i buduć arhanizavanyja majstar-kłasy pa Slow Fashion z udziełam šviedskaj dyzajnierki Juchanny Suksen.
Uvahu amataraŭ kino abaviazkova pryciahnie štohadovy Fiestyval šviedskaha kino, jaki sioleta projdzie z 28 traŭnia pa 1 červienia ŭ kinateatry «Pijanier». Padčas fiestyvalu hledačy zmohuć ubačyć stužki apošnich hod: «Surjoznaja hulnia», «Ščaślivych čortavych Kaladaŭ», «Nieśmiarotnyja», «Cacyki, tata i aliŭkavaja vajna», «Honar złodziejaŭ». Pačatak sieansaŭ a 19.00, kvitki možna budzie atrymać biaspłatna ŭ kasie kinateatra ŭ dzień pakazu. U faje kinateatra budzie demanstravacca fotavystava «Šviedskija taty». U ramkach vystavy adbudziecca ekśpiertnaja panelnaja dyskusija na temu «Być baćkam: abaviazak abo ščaście?».
Bolš infarmacyi na sajcie Pasolstva Šviecyi.
