Stali viadomyja imiony ŭsich 11 biełarusaŭ, jakija, pavodle Słužby biaśpieki Ukrainy, vajavali ŭ šerahach tak zvanaj pryvatnaj vajennaj kampanii «Vahnera». Raniej ukrainskija śpiecsłužby ahučyli imiony tolki šaści bajcoŭ. Belsat.eu raźbiraŭsia, dzie ciapier znachodziacca biełarusy-vahneraŭcy i što pra ich viadoma.
26 lipienia Słužba biaśpieki Ukrainy apublikavała dakład, pryśviečany «PVK Vahnera» — de-fakta sakretnamu padraździaleńniu rasiejskaha vojska, jakoje nieaficyjna padnačalena Hienštabu RF. Siarod inšaha, SBU zajaviła, što ŭ «Vahnera» słužyli 11 hramadzianaŭ Biełarusi. Imiony 6 ź ich byli apublikavanyja ŭ adkrytaj častcy dakładu: heta Alaksandr Stupnicki, Siarhiej Sazanaŭ, Kanstancin Hirs, Vadzim Juškievič, Edvard Davydaŭ i Rusłan Babinin.
Skrynšot ź lipieńskaha dakładu SBU
Belsat.eu źviarnuŭsia ŭ pres-słužbu SBU z aficyjnym zapytam, prosiačy pradastavić imiony 5 biełarusaŭ-vahneraŭcaŭ, što nie trapili ŭ dakład.
Žyvyja i miortvyja
Pavodle Słužby biaśpieki Ukrainy, akramia ŭžo nazvanych bajevikoŭ, u šerahach «PVK Vahnera» vajavali (abo vajujuć):
- Andrej Bakunovič, 40 hadoŭ. Kamandzir hrupy snajpieraŭ u «PVK Vahnera», maje hramadzianstva i Biełarusi, i RF;
- Siarhiej Kuźniacoŭ, 44 hady. Raźviedčyk 1-ha adździaleńnia 2-ha vyviedvalna-šturmavoha ŭzvodu 1-j vyviedvalna-šturmavoj roty;
- Uładzimir Kurynienka, 42 hady. Kamandzir 1-ha ŭzvoda 3-j vyviedvalna-šturmavoj roty;
- Vadzim Alaksandravič Vasileŭski, 34 hady. Pazyŭny «Miadźviedź». Zahinuŭ 3 lipienia 2015 hoda kala siała Rajoŭka Łuhanskaj vobłaści;
- Vadzim Klimienćjevič Vasileŭski, 44 hady. Pazyŭny «Maršał». Zahinuŭ 31 žniŭnia 2014 hoda padčas bajoŭ u Łuhanskim aeraporcie. Mieŭ hramadzianstva i Biełarusi, i RF.
Pra śmierć na Danbasie dvuch Vasileŭskich (jany nie svajaki, a prosta ciozki) było viadoma daŭno. Vadzim Klimienćjevič Vasileŭski naradziŭsia ŭ Miensku, ale praciahły čas žyŭ u Kalininhradzie, mieŭ rasiejski pašpart. Pavodle jahonych tavaryšaŭ — słužyŭ u rasiejskim śpiecyjalnym atradzie chutkaha reahavańnia. Ale pachavali Vasileŭskaha pad Mienskam, na Zachodnich mohiłkach.
Vadzim Alaksandravič Vasileŭski nie mienš za piać hadoŭ prasłužyŭ u 5-j asobnaj bryhadzie śpiecnazu ŭ Marjinaj Horcy, syšoŭ u zapas u zvańni majoru. Potym pracavaŭ instruktaram u fizkulturna-azdaraŭlenčym tavarystvie «Dynama», dy ŭ firmie, što pradavała aŭtazapčastki. U jaho zastalisia syn i starejšaja dačka, jakoj užo 14 hadoŭ. Pachavali Vadzima Vasileŭskaha ŭ vioscy Zarečča Staŭbcoŭskaha rajonu — letam 2015 hoda ŭ efiry «Biełsatu» vyjšaŭ pra heta siužet.
Adnak pra datyčnaść zahinułych biełarusaŭ da «PVK Vahnera» tady nie było viadoma. Što nie dziŭna: pra isnavańnie «PVK Vahnera» šyrokaja aŭdytoryja naohuł daviedajecca tolki ŭ sakaviku 2016 hoda.
Nijakich śladoŭ Uładzimira Kurynienki ŭ internecie naohuł niama. Pra Siarhieja Kuźniacova viadoma tolki toje, što naradziŭsia jon u Ivacevičach. Pavodle słužby daviedki, na čałavieka z takimi dadzienymi ŭ Ivacevičach zarehistravany chatni telefon, adnak niekalki sprobaŭ belsat.eu pahutaryć z Kuźniacovym skančalisia ničym: pačuŭšy, što my chočam pahutaryć ź Siarhiejem Mikałajevičam, žančyna na druhim kancy drotu adrazu kidała słuchaŭku.
Snajpier-rekardsmen
Bolš źviestak možna znajści pra Andreja Bakunoviča. Naradziŭsia jon u Biełarusi, jahonyja svajaki pa linii maci žyvuć u Kalinkavičach. Svajaki pa linii baćki žyvuć u Rasiei, a sam jon, kali vieryć sajtu «Miratvorac», prapisany ŭ horadzie Lantor Ciumienskaj vobłaści.
Niekatory čas tamu va ŭkrainskija ŚMI trapiŭ rapart kamandzira snajpierskaha ŭzvoda ad sakavika 2015 hoda, dzie Andrej Bakunoviča pradstaŭlajuć da rasiejskaha «Ordena Mužnaści» za «vykonvańnie bajavych zadač» pad Debalcavam. Praŭda, na hetym dakumiencie imia Bakunoviča i jašče adnaho bajca vykraśleny — mahčyma, mienavita tamu, što jany nie z Rasiei.
Rapart na ŭznaharodžańnie. Krynica — supołka «Ichtamniet_m0209»
Nieviadoma, kali Andrej Bakunovič dałučyŭsia da «PVK Vahnera». Ale jašče ŭ 2014 hodzie jon, vidać, słužyŭ pa kantrakcie ŭ rasiejskaj armii. Jak pisali rasiejskija ŚMI, na vajskovych spabornictvach pa stralbie ŭ červieni 2014 hoda snajpier Andrej Bakunovič ź pieršaha vystrału trapiŭ u 5-rublovuju manietu sa 100 mietraŭ.
Pahutaryć sa svajakam Bakunoviča ŭ Kalinkavičach nie atrymałasia — usio jany kateharyčna admaŭlajucca adkazvać na lubyja pytańni nakont Andreja. Dzie ciapier znachodzicca sam snajpier — nieviadoma. Adnak čas ad času Biełaruś jon dakładna naviedvaje — na staroncy jahonaj maci ŭ «Adnakłaśnikach» možna znajści ahulnaje siamiejnaje fota z udziełam Andreja Bakunoviča, zroblenaje ŭ vieraśni 2015 hoda ŭ Kalinkavičach. To bok, užo paśla taho, jak jon pavajavaŭ suprać ukraincaŭ pad Debalcava.
Andrejej Bakunovič (treci sprava) ź siamjoj u Kalinkavičach. Fota — «Adnakłaśniki»
Akaŭnty ŭ sacsietkach Andreja Bakunoviča, jahonaj žonki, brata žonki i cieščy byli vydaleny nieŭzabavie paśla taho, jak spasyłki na ich źjavilisia na «Miratvorcy». Pry sprobie źviazacca z žonkaj Bakunoviča Lilijaj praź jaje novy akaŭnt u «Vkontaktie» karespandent belsat.eu adrazu trapiŭ u «čorny śpis».
Ci była kampiensacyja za zahinułych?
Pavodle šerahu krynicaŭ, za zahinułaha ŭ baju vahneraŭca siemjam vypłačvajuć hrašovuju kampiensacyju pamieram ad 3 da 5 młn. rasiejskich rubloŭ (kala 45-75 tys. dołaraŭ). Ale ci atrymali takija kampiensacyi siemji biełaruskich najmitaŭ? I ci viedali jany naohuł pra toje, što ich blizkija vajavali ŭ składzie «PVK Vahnera».
Mahiła Vadzima Vasileŭskaha. Jon zahinuŭ na Danbasie
Baćki Vadzima Alaksandraviča Vasileŭskaha razmaŭlać z žurnalistami admovilisia. Jahonaja maci, spadarynia Ludmiła, patłumačyła, što śmierć syna dahetul zastajecca vializarnym bolem i jana prosta nie moža kazać pra heta. Kali žurnalist belsat.eu zapytaŭsia ŭ baćki, ci viedaŭ jon pra toje, što syn vajavaŭ u «Vahnera», spadar Alaksandr naohuł adreahavaŭ vielmi rezka — praŭda, ź jahonaj reakcyi stała zrazumieła, što pra datyčnaść Vadzima da «PVK Vahnera» jon čuje nie ŭpieršyniu:
«Ja nie chaču bolš čuć hetyja kazki! Chto vy taki, kab zadavać mnie takija pytańni?».
Pieršaja žonka Vadzima Vasileŭskaha Anastasija pryznajecca: chacia paśla razvodu jany padtrymlivali siabroŭskija stasunki, pra toje, što Vadzim pajechaŭ na Danbas, jana daviedałasia ŭžo paśla jaho śmierci.
«Mnie patelefanavali jahonyja baćki i skazali, što Vadzim zahinuŭ. Maci raspaviała, što jon pavioz na Danbas humanitarnuju dapamohu i pa darozie jahonaja mašyna ŭzarvałasia, — pryhadvaje Anastasija, — A pra «PVK Vahnera» ja čuju ŭpieršyniu, pra hrašovuju kampiensacyju taksama. Da mianie dakładna nichto nie źviartaŭsia pa hetym pytańni. Moža baćki niešta viedajuć?..»
Vadzim Vasileŭski byŭ pachavany pobač sa svajakami ŭ vioscy Zarečča
Toje, što Vadzim Vasileŭski vaziŭ na Danbas «humanitarku» — heta viersija, jakoj starajucca prytrymlivacca ŭsie jahonyja svajaki. Adnak siabra Vadzima Alaksiej Šabunievič, były siłavik, nie sumniajecca ŭ tym, što Vasileŭski na Danbasie vajavaŭ. Praŭda, paćvierdzić abo źniapraŭdzić infarmacyju, što vajavaŭ jon mienavita ŭ «Vahnera», Šabunievič nie moža.
«Ja daviedaŭsia pra toje, što Vadzim pajechaŭ vajavać nie adrazu. Jon telefanavaŭ mnie niekalki razoŭ i z razmovy ja zrazumieŭ, što jon na Danbasie. Ja nie raspytvaŭ padrabiaznaści — u našym asiarodździ nie pryniata zadavać šmat pytańniaŭ u takich vypadkaŭ, ciabie ž mohuć słuchać i svaje, i čužyja. Jak ja pastaviŭsia da rašeńnia Vadzima? Mnohija z tych, chto słužyŭ, potym nie znajšoŭ siabie ŭ cyvilnym žyćci. Voś jon vyrašyŭ znajści siabie ŭ «haračaj kropcy». Tamu pastaviŭsia da hetaha spakojna», — raspaviadaje jon.
Detali śmierci Vadzima Vasileŭskaha Šabunievič daviedaŭsia ad jahonych tavaryšaŭ pa Danbasu:
«Jany jechali pa trasie, ukrainskija bieśpiłotniki naviali artyleryju i jon trapiŭ pad abstreł. Było naŭprostavaje trapleńnie — ad jaho ničoha nie zastałosia. Pareštki Vadzima apaznali pa kavałku nakołki VDV, jakaja była ŭ jaho na ciele».
Mahiła Vadzima Vasileŭskaha. Jon zahinuŭ na Danbasie
Da taho, što baćki Vasileŭskaha nie chočuć razmaŭlać z žurnalistam Šabunievič stavicca z razumieńniem:
«U Biełarusi jość artykuł ab najmictvie. Nie viedaju, ci traplali dziejańni Vadzima pad hety artykuł. Ale ja razumieju baćkoŭ, jakija nie chočuć ačarnić imia svajho syna kryminalnym pieraśledam — niachaj užo i paśmiarotna».
Dzie ciapier biełarusy-vahneraŭcy?
Jak vynikaje z adkazu SBU, ukrainskija śpiecsłužby nie viedajuć, dzie ciapier znachodziacca biełarusy-vahneraŭcy. Źviestak pra toje, što biełaruskija pravaachoŭniki raspačali suprać ich kryminalnyja spravy — niama. Pry hetym, pavodle dadzienych belsat.eu, 5 čałaviek sa śpisu SBU da niadaŭniaha času žyli abo rehularna naviedvali Biełaruś.
Alaksandr i Anastasija Stupnickija. Fota — VK
Hetak Alaksandr Stupnicki pražyvaŭ razam z žonkaju Anastasijaj (uradženkaju Daniecku) u Voršy, na vulicy 1-j Maładziožnaj, prynamsi da kanca lipienia. Pra heta nam raspaviała susiedka Stupnickich. Pavodle jaje, maładaja para žyła tam nie mienš za hod, prablemaŭ z pravaachoŭnymi orhanami nie mieła. Susiedka nie viedaje, ci byŭ Alaksandr na Danbasie, ale čuła, što niekalki hadoŭ tamu jon źjazdžaŭ za miažu «pa pracy».
Paśla publikacyi dakładu SBU Stupnickija pajechali adpačyvać u Krym i dahetul nie viarnulisia. Miarkujučy pa akaŭntu žonki — ciapier jana ŭ Daniecku razam z synam. Dzie Alaksandr — nieviadoma.
Dačka byłoha milicyjanta Siarhieja Sazanava Lera raspaviała belsat.eu, što baćka ciapier žyvie ŭ Rasiei, ale rehularna pryjazdžaje ŭ Biełarusi, kab naviedvać dziaciej. Pavodle dački, śpiecsłužby nie prajaŭlali nijakaj cikaŭnaści da Siarhieja — da svajakoŭ nie prychodzili ni ź pieratrusami, ni z pytańniami. U toje, što baćka najmit «PK Vahnera» — Lera naohuł nie vieryć:
«Usie viedajuć, što ŭ 2014 hodzie jon jeździŭ na Danbas, pieravoziŭ humanitarnuju dapamohu. Mahčyma, praz heta i pajšli čutki».
Hazieta «Dniaproviec» u 1998 hodzie pryśviaciła artykuł milicyjantu Siarhieju Sazanavu
Uradžency Navapołacku Kanstancin Hirs i Vadzim Juškievič taksama nijakich prablemaŭ u Biełarusi dahetul nie mieli.
Vadzim Juškievič, fota — VK
Pavodle siabroŭ Juškieviča, jašče ŭ žniŭni jon dakładna byŭ u Navapołacku. Susiedzi baćkoŭ Hirsa kažuć, što čas ad času bačać Kanstancina razam z žonkaju. Pra toje, što Hirs vajavaŭ — čujuć upieršyniu (nahadajem, raniej jon u razmovie z belsat.eu źniapraŭdžvaŭ infarmacyju SBU). Sami baćki razmaŭlać sa ŚMI kateharyčna admovilisia.
Kanstancin Hirs, fota — VK
Pieryjadyčna naviedvaje rodnaje Ivanava i 27-hadovy Edvard Davydaŭ, chacia sam daŭno pracuje i žyvie ŭ Rasiei, śćviardžajuć jahonyja siabry.
- Akramia 11 asobaŭ, pieraličanych SBU, jość źviestki, što ŭ šerahach «PVK Vahnera» vajavaŭ minimum jašče adzin biełarus — 42-hadovy hamialčuk Alaksiej Jaraševič. Jon zahinuŭ u Siryi ŭ vieraśni 2017 hoda.
- «PVK Vahnera» de-fakta źjaŭlajecca sakretnym padraździaleńniem rasiejskaha vojsku i nieaficyjna padnačalena Hienštabu RF. Śpiecsłužby Ukrainy śćviardžajuć, što vahneraŭcy datyčnyja da źniščeńnia ŭkrainskaha samalota Ił-76 na Danbasie, udzielničali ŭ šturmie Łuhanskaha aeraportu i bajach za Debalcava. U Siryi vahneraŭcy adznačylisia pry šturmie Palmiry ŭ sakaviku 2016 hodu i šerahu inšych apieracyj. Pavodle ŚMI, minimalnaja staŭka dla šarahoŭca ŭ «PVK Vahnera» — kala 250 tys. rasiejskich rubloŭ (bolš za 4.300 USD), ale z roznymi bonusami hetaja ličba moža dasiahać 450 tys. (bolš za 7.800 USD). Asobna praduhledžany vypłaty paranienym i svajakam zabitych.
- Padraździaleńnie atrymała nazvu praz pazyŭny jaje kamandzira — byłoha padpałkoŭnika 2-j asobnaj bryhady śpiecnazu HRU Dźmitryja Utkina. Pavodle rasiejskich ŚMI, pazyŭny «Vahner» Utkina ŭziaŭ siabie, bo ŭ svoj čas zachapiŭsia historyjaj Treciaha Rajchu (Rychard Vahner — lubimy kampazitar Adolfa Hitlera).
