Kiraŭniki kampanii «Havary praŭdu» Andrej Dźmitryjeŭ i Taćciana Karatkievič praviali 1,5-hadzinnuju sustreču z pasłom Rasii Michaiłam Babičam. Sustreča adbyvałasia pa prapanovie kiraŭnictva «Havary praŭdu».
Andrej Dźmitryjeŭ, Michaił Babič, Taćciana Karatkievič. Fota z facebook.com.
Andrej Dźmitryjeŭ kaža, što jany sustrakajucca z pasłami roznych krain, u hetym šerahu adbyłosia spatkańnie i z pradstaŭnikom Rasii. Dźmitryjeŭ kaža, što važnym źjaŭlajecca toj faktar, kab dyjałoh išoŭ nie tolki z pradstaŭnikami ŭłady, ale svajo mierkavańnie mahli vykazvać i pradstaŭniki hramadzianskaj supolnaści.
Pa słovach spadara Dźmitryjeva, havorka viałasia pra ekanamičnaje supracoŭnictva miž našymi krainami, budučyniu sajuznaj dziaržavy, sproby Biełarusi palepšyć adnosiny ź Jeŭrasajuzam i ZŠA.
Važnaj častkaj razmovy stała pytańnie niezaležnaści Biełarusi. Kiraŭniki «Havary praŭdu» danieśli, što ŭ Biełarusi niehatyŭna ŭsprymajucca lubyja napadki na suvierenitet krainy. Pasoł Babič zapeŭniŭ, što havorka nie viadziecca pra pahłynańnie Biełarusi.
Andrej Dźmitryjeŭ zapeŭniŭ, što jany nie šukali padtrymki ŭ rasijskim pasolstvie. «Naša meta — danieści svaju pazicyju, a taksama lepš razumieć pazicyju surazmoŭcaŭ», — zapeŭniŭ Dźmitryjeŭ.