© Genocido aukų muziejus
U aŭtorak Jeŭrapiejski sud pa pravach čałavieka (JESPČ) zajaviŭ, što sudy Litvy abhruntavana pryznajuć hienacydam savieckija represii suprać litoŭskich partyzan, paviedamlaje Delfi.lt
Strasburhski sud adchiliŭ skarhu byłoha supracoŭnika KDB Stanisłavasa Drelinhasa, pryznanaha vinavatym u hienacydzie za ŭdzieł u apieracyi pa zatrymańni kamandzira litoŭskich partyzan, jakija zmahalisia z savieckaj uładaj, Adołfasa Ramanaŭskasa-Vanahasa.
Jeŭrapiejski sud pahadziŭsia z tłumačeńniami Viarchoŭnaha suda Litvy ab tym, što sistemnaje źniščeńnie litoŭskich partyzan, jakoje ažyćciaŭlałasia savieckimi akupantami, moža ličycca hienacydam litoŭskaha naroda.
Sudździ pryznali, što savieckija represii stavili za metu ŭździejničać na demahrafičnaje stanovišča litoŭskaha naroda, a partyzany i ich suviaznyja «vykonvali istotnuju rolu ŭ zachavańni nacyjanalnaj identyčnaści, kultury i nacyjanalnaj samaśviadomaści». Strasburhski sud padkreśliŭ, što, choć S. Drelinhas sam nie prymaŭ rašeńnia ab ažyćciaŭleńni ekzekucyi A. Ramanaŭskasa-Vanahasa, «ale navat šarahovy vajskoviec nie moža całkam, ślepa vykonvać zakony, jakija hruba parušajuć pryznanyja na mižnarodnym uzroŭni pravy čałavieka, asabliva prava na žyćcio».
Za takoje rašeńnie prahałasavali piać sudździaŭ Strasburhskaha suda, dvoje byli «suprać».
88-hadovy S. Drelinhas byŭ asudžany za toje, što ŭ kastryčniku 1956 hoda ŭdzielničaŭ u tajnaj apieracyi ŭ Kaŭnasie pa zatrymańni A. Ramanaŭskasa-Vanahasa. Z ulikam słaboha zdaroŭja i druharadnaj roli ŭ hetaj apieracyi Viarchoŭny sud skaraciŭ piacihadovy termin pakarańnia, i asudžany faktyčna adbyŭ u źniavoleńni 5 miesiacaŭ i 6 dzion.
S. Drelinhas i jaho advakaty śćviardžajuć, što partyzanski ruch pavinien aceńvacca jak dziejnaść palityčnaj hrupy, tamu dziejańni suprać partyzan nie mohuć ličycca hienacydam.
U paślavajennym ŭzbrojenym supracivie ŭ Litvie ŭdzielničali minimum 50 000 čałaviek.
