Žančynu z Čašnickaha rajona pryciahnuli da kryminalnaj adkaznaści za ciažkuju traŭmu, jakuju atrymała jaje dačka z-za padzieńnia, paviedamlaje Čyrvony pramień.
19 śniežnia žančyna jechała na rovary «Aist» i viezła na bahažniku 5-hadovuju dačku. Pry vyjeździe z darohi na pakrytuju lodam abočynu žančyna nie spraviłasia z kiravańniem, straciła raŭnavahu i zvaliłasia, a dziaŭčynka atrymała składany pierałom ściahna.
Paśla pravierki raspačali kryminalnuju spravu, žančynie pradjavili abvinavačańnie ŭ parušeńni praviłaŭ biaśpiečnaha ruchu, što paciahnuła pryčynieńnie ciažkaha cialesnaha paškodžańnia.
Jak ličać śledčyja, maci parušyła dva punkty PDR:
— jaki zabaraniaje viełasipiedystu ruchacca pa darozie va ŭmovach śniehapadu abo hałalodzicy,
— jaki praduhledžvaje pieravozku małaletniaha pasažyra na rovary tolki z dadatkovym siadzieńniem.
Viełasipiedystku mohuć pakarać štrafam abo papraŭčymi rabotami na termin da dvuch hadoŭ, ci abmiežavańniem voli na toj ža termin, abo pazbaŭleńniem voli na termin da dvuch hadoŭ.
