U ofisie telekanała «Biełsat» u Minsku, na vulicy Kastryčnickaj, siońnia prajšoŭ pieratrus. CK paćvierdziŭ, što jaho praviali ŭ ramkach rasśledavańnia spravy pa artykule «Paklop», piša Tut.by.
«Śledčym kamitetam rasśledujecca kryminalnaja sprava pa č. 2 art. 188 (paklop) KK, raspačataja prakuraturaj horada Minska, pra raspaŭsiud na sajcie telekanała «Biełsat» vydumak paklopnickaha charaktaru», — raspavioŭ kiraŭnik pres-słužby SK Siarhiej Kabakovič. Chto mienavita paskardziŭsia na «vydumki paklopnickaha charaktaru», SK nie paviedamlaje. Na Biełsacie ličać, što havorka idzie pra Andreja Švieda.
Uletku žurnalist telekanała Aleś Zaleŭski padrychtavaŭ videasiužet pra karupcyju ŭ achovie zdaroŭja, dzie paviedamlałasia pra toje, što nibyta zatrymali kiraŭnika dziaržpradpryjemstva «Miedtechnacentr» Aleha Švieda. Tekstavaja viersija na sajcie telekanała nie adpaviadała videa. U tekście paviedamlałasia, što zatrymany nie tolki Aleh Švied, ale i jaho brat Andrej, kiraŭnik Dziaržkamiteta sudovych ekśpiertyz.
— My adrazu, jak zaŭvažyli, dali abviaržeńnie, vypravili pamyłku. Ale Andrej Švied napisaŭ zajaviŭ na imia Šunieviča — pryciahnuć mianie dy adkaznaści pa dvuch kryminalnych artykułach — paklop i dyskredytacyja dziaržaŭnych orhanaŭ, - śćviardžaje žurnalist.
A ci padavaŭ zajavu Aleh Švied, pra jakoha išła havorka ŭ siužecie?
TUT.BY datelefanavaŭsia da kiraŭnika respublikanskaha ŭnitarnaha pradpryjemstva «Miedtechnacentr» pa pracoŭnym haradskim telefonie.
Aleh Švied raspavioŭ, što letam minułaha hoda pisaŭ zajavu ŭ RUUS Minskaha rajona i prasiŭ pravieści pravierku ŭ suviazi paklopu ŭ jaho adras z boku telekanała «Biełsat». Ci padavaŭ takuju zajavu jaho brat — staršynia Dziaržaŭnaha kamiteta sudovych ekśpiertyz Andrej Švied, jon nie viedaje.
— Źviartaŭsia z zajavaj, prykładvaŭ skrynšot videa, u zajavie prasiŭ pravieści pravierku pa pakazanaj infarmacyi pa paklopie. Paśla čaho było abviaržeńnie, byŭ niejki list z RUUS, ale ja nie pamiataju, što pisali.
Pa słovach Aleha Švieda, heta ŭsio było jašče ŭ minułym hodzie, bolš nijakich zajaŭ z nahody telekanała «Biełsat» jon nie padavaŭ.
— Toje, što siońnia adbyvajecca, źviazana z vašaj zajavaj? — pytajemsia.
— Ščyra kažučy, ja nie viedaju.
Aleh Švied adznačyŭ, što pravaachoŭnyja orhany jaho nie zatrymlivali, a kali telekanał rychtavaŭ siužet, žurnalisty sprabavali ź im źviazacca.
— Sakratar dałažyła, što z boku telekanała byli zvanki, chacieli pahavaryć z dyrektaram. Na toj momant ja byŭ u kamandziroŭcy ŭ Homieli pa budaŭnictvie abjekta, potym Viciebsk pa-mojmu byŭ. I ja tak zrazumieŭ, što na padstavie hetych niaŭdałych kantaktaŭ takuju infarmacyju vydali. Nijakich zatrymańniaŭ nie było nikoli.
