Kalehija hramadzianskich spraŭ Viarchoŭnaha suda pakinuła bieź źmieny rašeńnie Minskaha haradskoha suda, jaki ŭ sakaviku nie staŭ rehistravać «Nieśmiarotny połk», piša Radyjo Svaboda.
«Heta jaŭna palityčnaje rašeńnie. Našy pravy znoŭ parušanyja. Budziem abskardžvać», — zajaviŭ paśla suda Valery Drako, adzin z suzasnavalnikaŭ «Nieśmiarotnaha pałka» ŭ Biełarusi.
Čamu hetyja ludzi vychodziać na «Nieśmiarotny połk» — repartaž
Letaś hałoŭnaje ŭpraŭleńnie justycyi Mienharvykankamu dvojčy admoviła ŭ rehistracyi haradzkomu hramadzkamu abjadnańniu «Nieśmiarotny połk». Čynoŭniki znajšli šerah parušeńniaŭ u rehistracyjnych dakumentach i statucie abjadnańnia, jakija vyznačyli jak «nievypraŭlalnyja».
Prykładam, nia ŭkazany zvarotny adras zajaŭnikaŭ, a ŭ paradku dnia ŭstanoŭčaha schodu adsutničaŭ punkt ab abmierkavańni nazvy arhanizacyi — adpaviedna, nie było i abmierkavańnia.
Veterany-aktyvisty, siarod ich viadomy ŭ Biełarusi kamunist Leanid Školnikaŭ, davodzili, što heta farmalnyja pamyłki. Pavodle Školnikava, abmierkavańnie nazvy arhanizacyi na schodzie adbyłosia, što paznačana i ŭ pratakole, i adras dla adkazu zajaŭnikam čynoŭniki znajšli — praŭda, u inšym raździele dakumentaŭ na rehistracyju.
«Hałoŭnaje ŭpraŭleńnie justycyi Mienharvykankamu vykonvaje palityčny zahad — ni ŭ jakim razie nie rehistravać u Biełarusi «Nieśmiarotny połk»», — zajaviŭ sudu Leanid Školnikaŭ, i ź im pahadzilisia inšyja aktyvisty, jakija padavali apelacyju.
«U čynoŭnikaŭ takaja taktyka: adny parušeńni nazyvajuć, a druhija prybierahajuć na potym. Kab ciahnuć z rehistracyjaj biaskonca. Tamu treba, kab prakuratura razhledzieła ich dziejańni na pradmiet niadobrasumlennaha vykanańnia słužbovych abaviazkaŭ», — prapanavaŭ na pasiedžańni aktyvist Hienrych Simanoŭski.
Adnak pradstaŭnica prakuratury Iryna Kavalčuk na prapanovy razabracca z čynoŭnikami Mienharvykankamu nijak nie adreahavała. Jana padtrymała rašeńnie ab nierehistracyi «Nieśmiarotnaha pałka», taksama paličyŭšy, što zaŭvahi da rehistracyjnych dakumentaŭ arhanizacyi istotnyja i nia mohuć być chutka vypraŭlenyja.
«Nieabchodna admović u zadavalnieńni apelacyjnaj skarhi i pakinuć rašeńnie Mienskaha haradzkoha sudu biaź źmienaŭ», — zajaviła Iryna Kavalčuk.
Paraiŭšysia 2,5 hadziny, kalehija Viarchoŭnaha sudu ź jaje arhumentami pahadziłasia.
Na razhlad skarhi «Nieśmiarotnaha pałka» ŭ Viarchoŭnym sudzie pryjšli zvyš dziasiatka aktyvistaŭ arhanizacyi. Napiaredadni jany kazali, što tolki na 1% vierać u pośpiech i hety pracent źviazvajuć z tym, što sprava razhladajecca ŭ novym budynku sudovaj ustanovy.
«Moža, choć tut usio budzie na-novamu», — kazali ludzi pažyłoha vieku.
Jašče adnym z arhumentaŭ zasnavalnikaŭ biełaruskaha «Nieśmiarotnaha pałka» było toje, što Biełaruś i Rasieja budujuć sajuznuju dziaržavu.
«Jak ža tak? My sajuźniki, a tut placiemsia ŭ chvaście, nia chočuć rehistravać arhanizacyju z takoj papularnaj u Rasiei nazvaj? Ciapier my pastavim na abmierkavańnie takoje pytańnie: kali nas nie rehistrujuć jak mienskuju haradzkuju arhanizacyju, dyk budziem sprabavać zarehistravacca jak respublikanskaje abjadnańnie. Albo zarehistrujemsia za miažoj, u Rasiei. Adstupać nie źbirajemsia», — skazaŭ Svabodzie lider arhanizacyi Valery Drako.
