— Vy ź pieršych dzion pracy ŭ Rasii stvarali ŭražańnie vielmi hruntoŭnaha, surjoznaha, niahledziačy na maładość, čałavieka. Byŭ momant u žyćci, kali rezka pastaleli?
— Kali ŭ 16 hadoŭ stračvaješ baćku, atrymlivaješ vialikuju žyćciovuju škołu. Adrazu prychodzić ŭśviedamleńnie: usio, ty sam vyrašaješ. Druhi etap staleńnia — heta internat, u maim vypadku vučylišča alimpijskaha reziervu. Mnie samomu za ŭsio davodziłasia zmahacca — heta zahartoŭvaje.
— Ciapier usie abmiarkoŭvajuć film «Čarnobyl». Hladzieli?
— Navošta mnie hladzieć, kali ja sam tam byŭ?
— Źvieryć ułasnyja ŭspaminy z mastackaj rekanstrukcyjaj padziej.
— Pakul nie hladzieŭ, ale bačyŭ šmat vodhukaŭ, rekłamy. Dumaju, byl była bolš čornaj, čym kino. Baćka na likvidacyi nastupstvaŭ avaryi atrymaŭ samuju surjoznuju stupień apramieńvańnia. Maci płacili piensiju pa 18-m artykule da taho času, pakul my ź siastroj nie stali paŭnaletnimi. Ja dobra pamiataju toje radyjeaktyŭnaje vobłaka, razumieju, kudy baćka jeździŭ, choć jon, mahčyma, hetaha ŭ poŭnaj miery nie ŭśviedamlaŭ. Viartaŭsia, a potym na padušcy plamy kryvi zastavalisia… U adnoj častcy Chojnikaŭ, u bok Rečycy, žyvuć ludzi, a ŭ druhoj, bližej da miažy, pačynajecca zona adčužeńnia. Ja byŭ tam: vysokaja trava, vaŭki vyjuć. Na Prypiaci rybačyŭ.
— Vam 10 hadoŭ, irvanuŭ Čarnobyl. Samy mocny ŭspamin taho času?
— Parady — u honar Kastryčnickaj revalucyi, Pieršaha maja. Jak ludzi dastavali i razhortvali čyrvonyja ściahi. Užo padčas demanstracyi pa šerahach išoŭ šept: niešta adbyłosia. Heta adčuvańnie tryvohi dobra pamiataju.
— Nasielnictva nie apaviaščali ab avaryi na ČAES.
— Infarmacyja pieradavałasia pa «sarafannym radyjo». Kali reaktar irvanuŭ 26 krasavika, atrymlivajecca, na 1 maja piać dzion prajšło. Jak u «Haradku» žartavali: u časy našaha dziacinstva byli dobryja filmy i indyjskija. Toje ž samaje z televizijnymi kanałami — ich było dva: BT i Pieršy. Usio. Zrazumieła, što źvierchu pastupiŭ zahad nie raspaŭsiudžvacca ab avaryi, — skazaŭ Hančarenka.