Padtrymać rasijskich spartoŭcaŭ padčas Druhich Jeŭrapiejskich hulniaŭ možna budzie nie tolki niepasredna na trybunach albo pierad ekranami televizaraŭ, ale i ŭ admysłovym fanackim «domie», jakija pačaŭ pracu na terytoryi «Doma Maskvy». Na adkryćci prysutničaŭ vykanaŭca abaviazkaŭ vice-prezidenta NAK Biełarusi Viktar Alaksandravič Łukašenka.
Što takoje fan-dom? Heta admysłovaja placoŭka, dzie možna pasłuchać muzyku, papić piva ź siabrami. Možna taksama kupić ci atrymać u padarunak atrybutyku zbornaj Rasii. Pahladzieć na artefakty maskoŭskaj Alimpijady i hetak dalej.
U mieniu try nabory «Zołata», «Srebra» i «Bronza». Dziŭna, ale «załataja» ježa kaštuje 14 rubloŭ, a «bronzavaja» ŭsie 20. Što ŭvachodzić u kamplekt? Hamburhier, bulba-fry i koka-koła. Niatannaje zadavalnieńnie — zaŭzieć za rasijskuju kamandu. U bronzavym kamplekcie idzie dvajny hamburhier, smažanyja pielmieni, piražok z bulbaj i piva.
Adkryćcio atrymałasia dastatkova pradstaŭničym. Z Rasii pryjechali kiraŭnik NAK hetaj krainy Stanisłaŭ Pazdniakoŭ, a taksama ministr sportu Pavieł Kałabkoŭ. Biełaruski bok pradstaŭlali Viktar Łukašenka i ministr sportu Siarhiej Kavalčuk.
«Nie sakret, što ŭ našych krainach nadajuć vialikuju ŭvahu nie tolki sportu, ale i fizkultury, dy i zdarovamu ładu žyćcia ŭ cełym. Dziakujučy ŭdziełu vialikaj kolkaści ludziej, narodnych masaŭ, mahčymyja takija maštabnyja prajekty. Usim našym spartsmienam — čystaj i bieskampramisnaj baraćby, jarkich pieramoh. A amataram, napeŭna, atrymać svaju dolu adrenalinu i pieražyvańniaŭ. Sa śviatam!» — skazaŭ Viktar Łukašenka.
Starejšy syn Alaksandra Łukašenki pramaŭlaŭ pa-rasiejsku, ale z šykoŭnym biełaruskim akcentam. I ź dziekańniem i ciekańniem, i ź ćviordym biełaruskim «č».
Viktar Łukašenka pakinuŭ pieršy aŭtohraf na haściavoj ścianie.
Na placoŭcy fan-doma na toj momant było niekalki dziasiatkaŭ ludziej. Mnohija sa ściaham Rasii. Biełaruskaj atrybutyki nie było zusim, tolki paru chłopcaŭ chadzili ŭ majkach z vyjavaj Lesika, ale heta ž nie ličycca. Usim achvotnym davali bieła-sinie-čyrvonyja nalepki, jakija moža prymacavać sabie na ščaku ci plačo, mnohija ŭdziačna hetym karystalisia.
«Dla darahich našych rasijan — zaŭsiody naša haścinnaść», — słovy ministra sportu Siarhieja Kavalčuka.
Ministr sportu Siarhiej Kavalčuk.
Kali aficyjnyja pramovy skončylisia, to viadučy skazaŭ: «Raŭnuj na ściah!». Zahučaŭ himn Rasii. Biełaruskaha nie było.
Paśla hetaha Viktar Łukašenka i Stanisłaŭ Pazdniakoŭ prajšlisia pa inšych abjektach fan-doma. Naprykład, pahladzieli virtualnyja trenažory, nakiravanyja na ŭmacavańnie tryvałaści, chutkaści i reakcyi.
Potym syn kiraŭnika dziaržavy nie abminuŭ mahčymaści sfotkacca z matroškaj u fotazonie. Nie admaŭlaŭ jon i ŭ sełfi, praŭda, takich achvotnych było nie nadta šmat.
U samim «Domie Maskvy» ŭsich sustrakaŭ z chlebam-sollu robat u kiepcy zbornaj Rasii i abarankami na šyi. «Što za pryhažunia pierad mnoj», — kazaŭ robat dziaŭčatam, jakija apynalisia pierad im.
Na dvuboj sambistak nichto asabliva nie źviartaŭ uvahi. Zdajecca, upieršyniu na tvary Viktara Łukašenki źjaviłasia zacikaŭlenaść, kali jon staŭ razmaŭlać z duchoŭnikam zbornaj Rasii protaijerejem Andrejem Alaksiejevym. Baciuška navat pračytaŭ nievialikuju malitvu, a taksama akrapiŭ usich śviatoj vadoj.
Na fonie ŭsiaho było šmat rekłamy «Hazproma» i «Narylskaha nikiela» jak sponsaraŭ hulniaŭ i zbornaj Rasii.
U vyniku jašče było zaklučana pahadnieńnie ab supracoŭnictvie miž biełaruskim NAK i Rasijskim mižnarodnym alimpijskim univiersitetam. Na hetym aficyjnaja častka skončyłasia, prysutnym stali nalivać šampanskaje.
Na scenie fan-doma na 30-hradusnaj śpiocy praciahvaŭ vystupać viadučy. Raskazvaŭ pra Panazijackija hulni. Nivodnaha słuchača nie było, tolki vałanciory hetaha samaha fan-doma vydavali zacikaŭlenaść i entuzijazm.
