U svaich publičnych vystupach Uładzimir Zialenski časta pavodzić siabie padobna da Alaksandra Łukašenki. Pra heta zajaviŭ hienieralny prakuror Ukrainy Juryj Łucenka ŭ intervju «Cienzor.niet».
Łucenka ličyć, što Łukašenka ŭžo 25 hadoŭ paśpiachova demanstruje papulizm. Na pytańnie žurnalista, ci źjaŭlajecca Zialenski «našym Łukašenkam», hienprakuror Ukrainy adkazaŭ stanoŭča.
«Pa styli tych narad, jakija jon pravodzić, — tak. Nie mahu skazać, što heta 100% drenna, tamu što ludzi vielmi chočuć takich rečaŭ», — dadaŭ Juryj Łucenka.
Adnak hienprakuror Ukrainy adznačyŭ, što aŭtarytaryzm va Ukrainie niemahčymy dziakujučy nacyjanalna-vyzvalenčamu ruchu dvuch Majdanaŭ i praz rasijska-ŭkrainskuju vajnu.
«Na aŭtarytaryzm nie pahodzicca i hramadstva, pryvučanaje da bazavych svabod», — zajaviŭ Łucenka.
