Sietka aptek ADEL biaspłatna navučyła i pracaŭładkavała ŭ Minsku piensijanieraŭ. Ciapier jany pracujuć administratarami z mahčymaściu atrymlivać 1000 rubloŭ i spraŭlajucca nie horš za maładych. Inicyjatyva «Starejšy śpiecyjalist» zaklikana dapamahčy ludziam znajści pracu, niahledziačy na ŭzrost.
Prajekt startavaŭ u studzieni. Zajaŭki na ŭdzieł padali 486 suiskalnikaŭ va ŭzroście ad 55 da 74 hadoŭ. Siaredni ŭzrost suiskalnikaŭ — 65 hadoŭ, a samaj stałaj udzielnicy — 74 hady. Prajści navučalny kurs zaprasili 15 suiskalnikaŭ, jakija pa jaho zaviaršeńni mahli atrymać zaprašeńnie na pracu. U aptečnaj sietcy raźličvali, kab chacia b treć ź ich była hatovaja «paviarnuć piensiju nazad».
Da vypusknoha ispytu dajšli 12 studentaŭ, piać ź jakich atrymali pracu. Zaraz vypuskniki pieršaha prajekta pracujuć administratarami handlovaj zały aptek i kansultujuć pakupnikoŭ. Starejšyja śpiecyjalisty mohuć atrymlivać da 1000 rubloŭ, ale pakul vybirajuć paŭstaŭki.
Što cikava, žančyny akazalisia macniejšyja. Adziny mužčyna ŭ hrupie prapracavaŭ u aptecy tolki dva dni, paśla čaho admoviŭsia ad zadumy. Pryčyna — nie raźličyŭ siły: śpiecyjalistam patrabujecca zapomnić bolš za 1500 najmieńniaŭ nialekavych tavaraŭ i nadać uvahu sotniam pakupnikoŭ u dzień.
Prajekt dla Biełarusi ŭnikalny, choć na Zachadzie takaja praktyka raspaŭsiudžana. Asnoŭnaja ideja — pakazać, što piensijaniery mohuć pracavać nie horš za astatnich. Ich bahaty asabisty dośvied, hnutkaść u znosinach i vysokuju matyvacyju paličyli karysnymi ŭ aptečnaj spravie. Piłotny prajekt realizavali ŭ Minsku, kab potym achapić i rehijony.
«Mnohija navat u našaj kamandzie stavilisia skieptyčna da prajektu na stadyi zapusku. Ale vyniki pieršych troch miesiacaŭ pracy starejšych śpiecyjalistaŭ pakazali, što biełarusy hatovyja złamać stereatypy, źviazanyja z uzrostam. My rady tamu, što dziaržaŭnyja i pryvatnyja kampanii padtrymali inicyjatyvu. Razam my stvorym novyja mahčymaści dla ludziej, jakija žadajuć zachavać aktyŭnaść u tym pieryjadzie žyćcia, jaki na samaj spravie moža być vielmi praduktyŭnym, — adznačaje inicyjatar prajekta staršynia rady dyrektaraŭ chołdynhu «Apteka hrup» Leanid Tomčyn. — Dziakujučy padobnym prajektam z boku biełaruskaha biznesu i padtrymcy ich dziaržavaj kožny z nas zmoža raźličvać na šyrokija pierśpiektyvy niezaležna ad taho, kolki hadoŭ nam budzie zaŭtra. Heta važny pakazčyk uzroŭniu raźvićcia rynku pracy i sacyjalnaj śfiery ŭ sučasnaj dziaržavie».
Ale byli i ciažkaści, u tym liku psichałahičny barjer, niaŭpeŭnienaść va ŭłasnych siłach, bojaź znoŭ viarnucca ŭ pracoŭnyja budni. Adnak arhanizatary taksama źviarnuli ŭvahu na vysokuju matyvacyju vučycca i atrymlivać novyja viedy. Kandydaty «mudraha ŭzrostu» akazalisia hnutkimi i adkrytymi ŭsiamu novamu.
Inicyjatyva «Starejšy śpiecyjalist» zaklikanaja dakazać, što z uzrostam aktyŭnaja žyćcio nie zakančvajecca. A taksama — zmahacca z uzrostavaj dyskryminacyjaj na rynku pracy i stereatypami, z-za jakich ludziam starejšaha ŭzrostu admaŭlajuć u pracaŭładkavańni.
«Kab razumieć, jak budzie raźvivacca rynak pracy ŭ budučyni, my ŭvažliva sočym za tendencyjami. Pa prahnozach, da 2025 hoda ludzi, starejšyja za 60 hadoŭ, składuć 30% nasielnictva ŭ krainach z raźvitoj ekanomikaj i 13% — tych, jakija tolki raźvivajucca. Na dolu «mudrych» pryjdziecca 51% suśvietnaha spažyvańnia, abo 4,4 trłn dalaraŭ da 2030 hoda», — tłumačać u chołdynhu «Apteka hrup».
Da inicyjatyvy dałučylisia jašče niekalki biełaruskich kampanij. Cikavaść prajaŭlajuć bujny biełaruski bank i łahistyčnaja kampanija. Aptečnaja sietka abviaściła ab hatoŭnaści praciahvać prajekt, u tym liku i ŭ rehijonach Biełarusi.
