Na bryfinhu dla žurnalistaŭ pa vynikach pasiedžańnia praŭleńnia Nacbanka pa hrašova-kredytnaj palitycy staršynia Nacbanka Pavieł Kałaŭr adkazaŭ na pytańnie «Našaj Nivy»
«Naša Niva»: U rejtynhu S&P pa pazicyi «hnutkaść hrašova-kredytnaj palityki» Biełaruś maje 5 bałaŭ pry minimalnych 6 i maksimalnym — 1. Mižnarodnyja ekśpierty ličać, što Nacbank nadta zaležny ad centralnych uładaŭ, ad prezidenta, a značyć, što i kredyty dla Biełarusi zastajucca darahimi. Jak prapanujecie vyrašać prablemu?
Pavieł Kałaŭr: Ja b nie chacieŭ kamientavać mietadałohiju pavažanaj ahiencyi, ale zaŭvažu, što svaboda pryniaćcia rašeńniaŭ Nacbankam Biełarusi vyznačajecca, miakka kažučy, farmalna, a nie pa realnych spravach.
Tak, u nas isnuje paradak, pry jakim hrašova-kredytnaja palityka zaćviaržajecca prezidentam na roŭni ź inšymi dakumientami, jak biudžet, naprykład. Ale ŭ toj ža čas Nacbank, u pryvatnaści — praŭleńnie, samastojna vyznačaje ŭsie svaje dziejańni źviazanyja z pracentnaj i valutnaj palitykaj: vy viedajecie, daŭno ŭžo pryniataje rašeńnie, što ŭ nas płavajučy kurs. I my płanujem pierachod da režymu tarhietavanaj inflacyi, što dazvolić pavažanaj ahiencyi vystaŭlać nam lepšyja rejtynhi, bo hety režym bolš adpaviadaje sučasnamu ŭjaŭleńniu ab pravilnaj manietarnaj palitycy.
Pierachod my płanujem z 1 studzienia 2021 hoda z umovaj, što paśpiejem unieści karekciroŭki ŭ zakanadaŭstva, i našy dziejańni padtrymlivajucca našymi kalehami ź inšych centralnych bankaŭ, heta ž padtrymlivajuć i mižnarodnyja arhanizacyi.
