Fota Nadziei Bužan
Alaksandr Łukašenka prakamientavaŭ namier bałatavacca na vybarach kiraŭnika dziaržavy ŭ 2020 i 2025 hadach. Jon padkreśliŭ, što nie trymajecca za hetu pasadu, ale ličyć dla siabie abaviazkovym prapanavać svaju kandydaturu, a ludzi zrobiać vybar, paviedamlaje pres-słužba.
Kiraŭnik dziaržavy adznačyŭ, što nieadnarazova adkazvaŭ na pytańni z nahody svajho namieru bałatavacca na budučych prezidenckich vybarach. «Kali ludzi mianie nie padtrymajuć na niejkich vybarach, ja na ich nie pakryŭdžusia. Ja ŭžo papracavaŭ prystojnuju kolkaść hadoŭ, — skazaŭ jon. — Heta vy dumajcie, vyłučacca mnie na hetych vybarach ci nie».
Kali hramadzianie ceniać stabilnaść, spakojnaje, upeŭnienaje raźvićcio dziaržavy, jaje suvierenitet — heta značyć, tuju palityku, jakaja pravodzicca ciapierašnim prezidentam, to jany sami pavinny inicyjavać jaho vyłučeńnie.
«Tak, my nie bahatyja. Nie tamu, što Łukašenka kiepski. Bo my drenna časam pracujem i ŭ nas niama taho, što jość u Rasii i inšych krainach (majucca na ŭvazie zapasy pryrodnych enierharesursaŭ). My svajo bahaćcie z mazalom, jak u nas u narodzie kažuć, sami, svaimi rukami stvarajem. Razumiejučy heta, vy pavinny mianie prasić», — skazaŭ Alaksandr Łukašenka.
«Ja svaju kandydaturu prapanuju na hetych vybarach. Ale kali budu adčuvać, što vy kateharyčna suprać, viadoma, budu pieražyvać, ale tym nie mienš vy pavinny maju kandydaturu adkinuć na vybarach. I ja paabiacaŭ, što sinimi palcami za kresła trymacca nie budu. Paviercie, heta nie zusim miakkaje kresła», — zapeŭniŭ jon.
«Nie dumajcie, što ŭ nas prezidenckaja ŭłada - heta caravańnie, jak niekatoryja na vulicach kryčać: «chopić», pacaravaŭ. Jany, mabyć, tak i razumiejuć hetuju pasadu», — dadaŭ kiraŭnik dziaržavy.
Što tyčycca terminaŭ praviadzieńnia vybaraŭ prezidenta, to pa zakonie jany pavinny prajści nie paźniej za žnivień 2020 hoda. I pieranosić hetyja terminy nie płanujecca.
«Uletku hetyja vybary projduć. Tut nikudy nie dzieniešsia.
Uzimku? Durnoje budzie, kali my paśla hetych vybaraŭ (parłamienckich) adrazu pryznačym čarhovyja vybary. I apazicyja nas pačnie dziaŭbci, bo zvyčajna paśla vybaraŭ idzie spad, heta zaŭsiody tak. I apazicyja budzie nie hatovaja da hetych vybaraŭ. Ci skaža, što Łukašenka vyvieŭ nas sa stroju i pravodzić hetyja vybary dla siabie. Tamu treba spad hety pieraadoleć», — skazaŭ Alaksandr Łukašenka.
Pavodle jaho słoŭ, da viasny spad aktyŭnaści vybarščykaŭ projdzie, u krainie ludzi buduć zadziejničany ŭ padrychtoŭcy da śviatkavańnia takich značnych dat, jak 75-hodździe Pieramohi 9 maja 2020 hoda, Dnia Niezaležnaści 3 lipienia. Akramia taho, nieabchodna arhanizavać i pravieści pasiaŭnuju kampaniju, kab harantavać charčovuju biaśpieku. «Voś heta my zrobim pa-haspadarsku, a potym u pieryjad da uborki (ja tak dumaju, ščyra, jašče nie zajmaŭsia hetym pytańniem, dumaŭ pra hetyja vybary) u niejkim pramiežku paznačym (datu prezidenckich vybaraŭ)», - dadaŭ kiraŭnik dziaržavy.
Žurnalisty taksama pacikavilisia, ci maje namier Alaksandr Łukašenka brać udziełu ŭ prezidenckich vybarach paśla 2020 hoda, naprykład, ŭ 2025-m.
«Hospadzi, ja, moža, da 2025 hoda nie dažyvu, nie daj boh, — z humaram adkazaŭ jon. — Chočacca jašče pažyć, dzieci małyja, pahladzieć, jak u ich budzie».
