Anhielina Siebik.
Naprykancy navučalnaha hoda, 23 maja, dziesiać školnikaŭ z usioj krainy pradstaviać svaje idei na moładzievaj kanfierencyi TEDxYouth@Minsk. Kožnaja z prapanoŭ — adkaz sučasnych padletkaŭ na pytańnie, jak źmianić da lepšaha navakolny śviet. Dziesiacikłaśnica z Homiela Anhielina Siebik prapanuje pačać z vyvučeńnia biełaruskaj movy.
Anhielina Siebik — vučanica homielskaj himnazii №10. Školnica cikavicca biełaruskaj kulturaj, papularyzuje rodnuju movu, a taksama vyvučaje zamiežnyja — anhlijskuju i kitajskuju.
«Ja karystajusia biełaruskaj movaj štodzień užo bolš za paŭhoda — doma, u horadzie i navat u škole, chacia tam heta nie zaŭsiody prosta. Časta naviedvaju Centr biełaruskaj movy i kursy «Mova Nanova», — raskazvaje dziaŭčyna. — Rodnyja ŭ mianie ruskamoŭnyja, ale mnie heta nie nadta zaminaje.
U maim kłasie biełaruskamoŭnych ludziej taksama niama, ale ŭ himnazii, naturalna, jość ludzi, jakija časta adkazvajuć pa-biełarusku, kali da ich źviarnucca. I chacia, pa maich nazirańniach, staŭleńnie da rodnaj movy zbolšaha stanoŭčaje, ja ŭsio adno liču, što jaje brakuje ŭ samych roznych śfierach žyćcia. Asabista mnie chaciełasia b čuć jaje čaściej siarod svaich adnahodkaŭ».
Anhielina ŭpeŭniena, što ciapier, kali bolšaść ludziej pravodzić šmat času ŭ siecivie, mienavita tam varta rabić štości dla papularyzacyi biełaruskaj movy. Naprykład, adukacyjnyja majstar-kłasy ad biełaruskamoŭnych błohieraŭ u Homieli, ale z tranślacyjaj u pramym efiry na ŭsiu krainu.
Videaprezientacyju svajoj idei jana adpraviła na konkurs «Pieršyja», abvieščany dla školnikaŭ kampanijaj A1 pry padtrymcy Ministerstva adukacyi. U vyniku Anhielina trapiła ŭ dziasiatku finalistaŭ i dapracoŭvaje svaju zadumu, kab prezientavać jaje na vialikuju aŭdytoryju.
«Samy čas pakazać, što biełaruskaja mova — takaja ž, jak i inšyja, tamu pa-biełarusku možna havaryć pra ŭsio. Błohinh — vydatnaja mahčymaść heta davieści, bo majem i strymieraŭ, i vłohieraŭ, i ŭrbanistaŭ, i prosta aktyŭnych ludziej, što aśviatlajuć aktualnyja naviny ŭ svaich sacsietkach», — kaža staršakłaśnica.
Dziaŭčyna płanuje arhanizavać pieršuju imprezu ŭ Homieli z udziełam 2-3 śpikieraŭ i žyvoj tranślacyjaj na niekalki sacsietak. Jaje meta — pakazać z dapamohaj viadomych u miedyjaprastory ludziej, jakija publična karystajucca rodnaj movaj i za dziejnaściu jakich sočać sučasnyja padletki, što havaryć pa-biełarusku — heta sučasna i pryhoža.
U jakaści vystupoŭcaŭ Anhielina bačyć błohieraŭ Rejni, Tutejšaha šlachciča, Jaŭhiena Mierkisa, TVAR TVAR (YouTube), Jahora Tubialeviča (Instagram) dy inšych. Na jaje dumku, navat niekalki majstar-kłasaŭ na temy kštałtu «Jak raskrucić ułasny Instagram», «Kolki času treba vydatkoŭvać na błoh», «Razynki błohu pa-biełarusku» mohuć zaachvocić mnohich padletkaŭ zrabić chacia b pieršy krok da taho, kab adčuć siabie biełarusam i havaryć na rodnaj movie.
«Ja chaču, kab dziakujučy majmu prajektu ludzi zrazumieli, što stan i ŭsprymańnie biełaruskaj movy zaležyć tolki ad nas samich. I navat prosta padpiska na biełaruskamoŭny Tik-Tok ci adzin post moža paŭpłyvać z časam na ahulnuju situacyju», — ličyć Anhielina.
