Dziŭnyja rečy ŭžo kolki miesiacaŭ adbyvajucca vakoł najstarejšaha spartyŭnaha vydańnia krainy «Presboł». Na tym tydni «PB» uznačaliŭ žurnalist ANT Siarhiej Lisičkin, jaki da haziety nie mieŭ nijakaha dačynieńnia.
Jaho kandydaturu prałabiravała Biełaruskaja fiederacyja futboła, choć kalektyŭ byŭ suprać. Reč u tym, što ABFF naležyć 50% akcyj «Presboła». Jašče pałova znachodzicca pad kantrolem starych aŭtaraŭ vydańnia: Juryja Arłova (30%), Alaksandra Dabryjana (10%) i Dźmitryja Bieleńkaha (10%).
U znak niazhody z redakcyjnaj palitykaj hazietu pakinuli namieśnik hałoŭnaha redaktara Uładzimir Piroh i žurnalist Siarhiej Mardasievič. Mabyć, heta buduć nie apošnija sychody z vydańnia.
Nu a 20 śniežnia adbyvałasia ŭvohule aniekdatyčnaja situacyja — kali na sajcie spačatku źjaviłasia navina pra vyzvaleńnie Volhi Chižynkovaj z žodzinskaha SIZA, a potym źnikła. I tak paŭtarałasia niekalki razoŭ. Adkaznaść za źniaćcio ŭziaŭ na siabie dyrektar AAT «Presboł-91» Juryj Arłoŭ. «NN» zadała jamu niekalki pytańniaŭ.
Juryj Arłoŭ. Fota pressball.by
«Naša Niva»: Žurnalist Siarhiej Ščurko nazyvaje vas hałoŭnym cenzaram siońniašniaha «Presboła». Heta adpaviadaje praŭdzie?
Juryj Arłoŭ: Ja dyrektar «Presboła». Što tyčycca cenzara, to heta pryvatnaje mierkavańnie Siarhieja Ščurko.
«NN»: Materyjał pra vyzvaleńnie z turmy byłoj pres-sakratarki bresckaha «Dynama» Volhi Chižynkovaj z sajta zdymali vy? Jakaja była matyvacyja?
JUA: Jašče 1 lipienia, kali pryjšoŭ novy hałoŭny redaktar Dźmitryj Hierčykaŭ, usim była daviedzienaja novaja redakcyjnaja palityka, što nijakich materyjałaŭ z palityčnym padtekstam, palityčnaj afarboŭki, być nie pavinna. I nie budzie. Ułasna, niavažna, što ciaham hetaha času adbyvałasia, ale ŭstanoŭka zastałasia raniejšaj — nijakaj palityki. Heta ŭsio, što ja mahu skazać. A navina pra Chižynkovu jakraz maje palityčnaje adcieńnie.
«NN»: Nu heta ž były pres-sakratar bresckaha «Dynama» vyjšła ź izalatara časovaha ŭtrymańnia. Niaŭžo spartyŭnamu sajtu niecikava takoje?
JUA: Heta vaša asabistaje mierkavańnie. Nasamreč toje, što jana kaliści była pres-sakratarom, da sportu nijakaha dačynieńnia nie maje. Voś takaja prostaja pazicyja.
«NN»: Mnohim cikavaja tema «Čałavieka hoda» pa viersii «Presboła». U apytańni čytačoŭ upeŭniena lidziruje baskietbalistka Alena Leŭčanka, jakuju taksama sadžali na sutki.
JUA: Adrazu skažu, nie budziem my vyznačać «Čałavieka hoda». Bo ŭ ciapierašniaj situacyi heta budzie źviazana z palityčnaj afarboŭkaj. Niavažna, kaho my abiarom, ci tych, chto «za», ci tych, chto «suprać». I ni tym my nie spadabajemsia, ni druhim.
«NN»: Vy nie dumajecie, zajmajučy takuju pazicyju, «Presboł» zdradžvaje šmathadovaj historyi vydańnia? Raniej vy nie bajalisia nijakich čynoŭnikaŭ.
JUA: Kaho bajaŭsia? Kali vy ŭsio čytajecie, to pavinny viedać, što dva razy my nie vyznačali «Čałavieka hoda». Nas ciapier usie paprakajuć, što «voś raniej vy ministraŭ zdymali, takimi śmiełymi byli», ale jany zabyvajucca, što heta było raniej. Heta było da 9 žniŭnia 2020. Paśla 9 žniŭnia rabić takoje — sabie ŭ stratu.
«NN»: Dyk ludzi lubili toj biasstrašny «Presboł».
JUA: My raźbiaromsia. U dadzienym vypadku my abirajem nie kłaści hałavu na płachu, a praciahnuć žyć.
«NN»: A jak vy staviciesia da taho, što stolki žurnalistaŭ sychodzić?
JUA: Sychodziać i sychodziać. Na ich miescy pryjduć inšyja. Nam treba abirać, ci zastacca žyć, ci pamirać.
«NN»: Dyk vy ž možacie stać druhoj «Spartyŭnaj panaramaj».
JUA: Ja ŭpeŭnieny, što nie staniem druhoj «Spartyŭnaj panaramaj». Prosta ŭpeŭnieny.
«NN»: To-bok vy ličycie, što ludzi nie adviernucca ad siońniašniaha «Presboła»?
JUA: Moža, niechta i advierniecca. Ale chtości zastaniecca. A potym źjaviacca novyja zamiest tych, chto adviarnuŭsia.
«NN»: Vy tak i nie pryznalisia: pra Chižynkovu zdymali vy?
JUA: Ja. Heta ja. Na moj pohlad, nijakaha dačynieńnia da sportu heta nie maje.
