Biełaruski fond spartyŭnaj salidarnaści atrymaŭ adkaz ad IICHF na list adnosna pieranosu čempijanatu śvietu pa chakiei 2021 hoda. Baki praviaduć pracoŭnuju sustreču paśla čaćviortaha studzienia, paviedamlaje BFSS.
U liście ad IICHF taksama paviedamlajecca, što dyscyplinarnaja kamisija Mižnarodnaj fiederacyi pačała rasśledavańnie adnosna staršyni Fiederacyi chakieja Biełarusi Dźmitryja Baskava.
Raniej fond zaklikaŭ IICHF razhledzieć pytańnie ab pryciahnieńni da dyscyplinarnaj adkaznaści Baskava ŭ suviazi ź dziejańniami, jakija hruba hańbiać reputacyju chakieja jak vidu sportu, adznačaje Tut.by.
Nahadajem, što čałaviek, padobny da Dźmitryja Baskava, znachodziŭsia na płoščy Pieramien padčas kanfliktu, paśla jakoha trapiŭ u balnicu, a paźniej pamior ad atrymanych traŭmaŭ Raman Bandarenka.
Paźniej byŭ apublikavany aŭdyjazapis telefonnaj razmovy, padčas jakoj abmiarkoŭvalisia detali kanfliktu. Fanaskapičnaja ekśpiertyza paćvierdziła, što hałasy na aŭdyjazapisie naležać Dźmitryju Baskavu i kikbaksioru Dźmitryju Šakucie.
Taksama BFSS u svaim liście da IICHF raspavioŭ pra «ŭdzieł Baskava ŭ ahitacyjnych akcyjach u padtrymku Łukašenki z vykarystańniem alimpijskaj simvoliki, demanstratyŭnaje raśpićcio im mocnaha ałkaholu na fonie alimpijskaj simvoliki i cisk na spartoŭcaŭ i supracoŭnikaŭ, jakija vykazvajuć svaju hramadzianskuju pazicyju».
