Fota Depositphotos.com
Płanujecca, što pieršymi, chto musić atrymać vakcynu ŭ Hiermanii, buduć ludzi, starejšyja za 80 hadoŭ. Zatym u čarzie iduć chvoryja na demiencyju, a potym ludzi z zachvorvańniami piečani ci ź VIČ, piša niamieckaje vydańnie Die Welt.
Normy budzie detalova raśpisvać pryjarytetnaść, bo šmat pažyłych ludziej majuć adrazu niekalki zachvorvańniaŭ. A źviestki miedycynskaj strachavoj kampanii Barmer ciapier pakazvajuć, u kambinacyi ź jakimi zachvorvańniami kavid čaściej za ŭsio pryvodzić da śmierci.
Naprykład, infikavany karanavirusam pacyjent sa złajakasnaj puchlinaj i chvarobaj Alchiejmiera maje ŭ 16 razoŭ pavyšanuju ryzyku śmierci ad kavidu ŭ paraŭnańni z adnahodkami taho ž połu.
U ludziej ź psichičnymi zachvorvańniami i ŭ chvorych na ŚNID ryzyka śmierci ad virusa vyšejšaja ŭ 7 razoŭ. A tyja, chto adnačasova chvareje na demiencyju, maje mietastazy ŭ lohkich i piačonačnuju niedastatkovaść, majuć u 50 razoŭ pavyšanuju ryzyku latalnaha sychodu.
Ahułam kampanija Barmer vyjaviła 66 zachvorvańniaŭ, jakija mohuć vyklikać ciažkuju formu kavidu. Śpis uznačalvajuć trysomija, demiencyja i mietastazy ŭ lohkich. Akramia hetaha, śmiarotna niebiaśpiečnym kavid moža być u kambinacyi ź psichičnymi zachvorvańniami, ŚNIDam, multyrezistentnymi infiekcyjami.
Takim čynam, pierš za ŭsio ŭ Hiermanii vakcynu atrymajuć ludzi, starejšyja za 80, i miedrabotniki. U druhoj hrupie iduć pažyłyja, starejšyja za 70, pacyjenty z takimi chraničnymi zachvorvańniami, jak trysomija i demiencyja, a taksama ludzi, jakija pieranieśli transpłantacyju orhanaŭ. U treciuju hrupu traplajuć pacyjenty z chraničnymi zachvorvańniami piečani abo nyrak, chvoryja na ankałohiju abo ŚNID.
Tym nie mienš, miedycynskaja strachavaja kampanija Barmer zaklikaje ŭłady Niamieččyny pierahledzieć hety śpis. U dadzienaj pastanovie zusim nie ŭličvajucca ludzi ź psichičnymi zachvorvańniami, a ryzyki hrupy ludziej paśla transpłantacyi orhanaŭ aceńvajucca vyšej, čym jany jość na samoj spravie pa źviestkach kampanii. Taksama pradstaŭniki Barmer adznačajuć, što nieabchodna ŭličvać stadyi chraničnych zachvorvańniaŭ, papiarednija mietady lekavańnia i vypadki, kali ŭ čałavieka niekalki chraničnych chvarob. Tamu pryviedzieny vyšej śpis budzie dapracoŭvacca.
