Fota Depositphotos.com
Šmat restaranaŭ u śviecie źviarnulisia da technałohii, jakaja dazvalaje klijentam apłačvać zamovu praz smartfon: varta prosta padnieści telefon da čornaha kvadrata, padobnaha da štrych-koda. U takim razie klijentam nie treba čakać rachunku, a kantakt ź inšymi ludźmi zvodzicca da minimumu. Paśla pačatku pandemii šmat hramadskich ustanoŭ pierajšli da vykarystańnia QR-sistemy, piša BBC.
QR-kody mohuć utrymlivać vialikuju kolkaść źviestak u paraŭnańni sa standartnymi štrych-kodami. Heta značyć, što ŭ adnym maleńkim kvadracie moža źmiaščacca ŭsia karysnaja infarmacyja: imiony, miesca znachodžańnia, veb-sajty i inšaje.
Hrošy za pasłuhu ci tavar, apłačanyja z dapamohaj QR-kodaŭ, śpisvajucca z rachunka klijenta ŭ PayPal abo ź jaho bankaŭskaj kartki, pa anałohii sa zvyčajnymi anłajn-tranzakcyjami.
QR-kody stali asabliva karysnymi ŭ śfiery achovy zdaroŭja. Naprykład, u miedycynskich ustanovach Brytanii kožnamu naviedvalniku prysvojvajecca indyvidualny QR-kod, kab takim čynam jany aŭtamatyčna rehistravalisia biez nadańnia piersanału svaich kantaktnych źviestak. A kali vyjavicca, što ŭ niekaha stanoŭčy test na karanavirus, sistema aŭtamatyčna prainfarmuje ŭsich, chto naviedvaŭ ustanovu razam z hetym pacyjentam.
QR-kody vykarystoŭvajucca dla adsočvańnia kantaktaŭ nośbitaŭ virusa ŭ Aŭstralii, Sinhapury i Paŭdniovaj Karei.
Pašyrajecca i apłata praduktaŭ z dapamohaj QR-kodaŭ. Hetuju technałohiju aktyŭna vykarystoŭvaje Amazon. Ciapier možna prosta ŭziać usio nieabchodnaje z palic kramy i prajści mima kasy paśla skanavańnia QR-koda na vychadzie.
U niekatorych supiermarkietach užo pačali źjaŭlacca «razumnyja» vazki, jakija raspačynajuć novuju epochu bieskantaktnaha handlu. Sistema Veeve's Smart Cart zabiaśpiečvaje karystalnika indyvidualnym QR-kodam, jaki zachoŭvajecca ŭ jaho telefonie i dapamahaje imhnienna apaznać naviednika. Kožny tavar u «razumnym» vazku dadajecca da rachunka. Na vychadzie pakupnik padnosić svoj telefon da skaniera, i hrošy śpisvajucca aŭtamatyčna. U takim vypadku ŭ kamunikacyi ź piersanałam niama patreby.
Niekatorych chvaluje prablema zachavańnia pryvatnaści karystalnikaŭ. Pa mierkavańni pravaabaroncaŭ, pavinny ŭvodzicca zakony, jakija b zabiaśpiečvali ludziam achovu ad zboru infarmacyi pra ich praz QR-kody.