Inicyjatyva siłavikoŭ BYPOL sa spasyłkaj na ŭłasnyja krynicy paviedamiła, što nibyta biełaruskija vajskoŭcy majuć adpravicca ŭ Siryju. Zhadvali navat adpraŭku sałdat.
Čytajcie: BYPOL śćviardžaje, što biełaruskich sałdat adpraviać u Siryju dla arhanizacyi patrulavańnia
«Naša Niva» źviarnułasia da Minabarony z prośbaj prakamientavać hetaje paviedamleńnie. Voś jaki adkaz u piśmovym vyhladzie dało viedamstva.
«Miratvorčaść — adzin sa sposabaŭ realizacyi mirnych inicyjatyŭ.
My siońnia ŭdzielničajem u hetym pracesie, nakiravaŭšy aficeraŭ u 2 misii: miratvorčuju ŭ Livanie (pad ehidaj AAN) i manitorynhavuju va Ukrainie (u ramkach ABSIE).
Pastajanna viadziom pošuk novych napramkaŭ, addajučy pryjarytet humanitarnym misijam.
Havorka idzie pra takija zadačy, jak supravadžeńnie humanitarnych hruzaŭ, akazańnie miedycynskaj dapamohi, humanitarnaje raźminiravańnie miascovaści i abjektaŭ, patrulavańnie i zabieśpiačeńnie biaśpieki punktaŭ propusku i transpartnych kamunikacyj, pracy štabnych aficeraŭ.
U žniŭni 2020 my pašyryli svoj udzieł u misii Časovych sił AAN u Livanie. Dadatkova ŭ skład italjanskaha kantynhientu byli nakiravany 2 štabnyja aficery.
Ciapier prapracoŭvajecca mahčymaść dalejšaha pašyreńnia ŭdziełu ŭ misii ŭ Livanie.
Na ŭzroŭni kansultacyj u raspracoŭcy znachodzicca i pytańnie ab udziele našych vajskoŭcaŭ u misijach u inšych dziaržavach.
Vyvučajucca mahčymaści našaha znachodžańnia ŭ składzie tych ci inšych kantynhientaŭ, sposaby vykanańnia zadač, pytańni biaśpieki i inšaje.
Nahadajem, što ŭ adpaviednaści ź biełaruskim zakanadaŭstvam, dla ŭdziełu ŭ dziejnaści pa padtrymcy mižnarodnaha miru i biaśpieki nakiroŭvajucca tolki vajskoŭcy, jakija prachodziać słužbu pa kantrakcie i vyklučna na dobraachvotnaj asnovie.
Akramia taho, biez zaklučeńnia mižnarodnych damoŭlenaściej pamiž dziaržavami adpraŭka vajskoŭcaŭ za miežy Biełarusi niemahčyma», — napisała aficyjny pradstaŭnik Natalla Haŭrusik.
