Načalnik upraŭleńnia SK Biełarusi pa Homielskaj vobłaści Siarhiej Udavikoŭ raspavioŭ, što ŭviečary 9 žniŭnia małady čałaviek udzielničaŭ u niesankcyjanavanych masavych mierapryjemstvach na płoščy Lenina ŭ Homieli.
«Tut jaho zatrymali. Pry hetym jon sprabavaŭ vyrvacca, tamu supracoŭniki milicyi na zakonnych padstavach užyli fizičnuju siłu. Zatym jaho dastavili ŭ RAUS Čyhunačnaha rajona, potym — u izalatar časovaha ŭtrymańnia, dzie skarhaŭ na stan zdaroŭja nie pradjaŭlaŭ», — cytuje siłavika ANT.
— Padčas ahladu fielčaram u śledčym izalatary byli vyjaŭlenyja prykmiety rasstrojstva psichičnaj dziejnaści, u suviazi z čym małady čałaviek byŭ dastaŭleny ŭ psichijatryčnuju balnicu. U balnicy stan maładoha čałavieka rezka pahoršyŭsia, supracoŭniki milicyi vyklikali chutkuju dapamohu, jakaja dastaviła jaho ŭ bližejšuju miedustanovu, dzie majecca adździaleńnie reanimacyi. Niahledziačy na namahańni daktaroŭ, 12 žniŭnia ŭ 3.35 Alaksandr Vichor pamior.
Pavodle vysnoŭ pieršasnaj i dadatkovaj kompleksnaj kamisijnaj sudova-miedycynskaj ekśpiertyz, śmierć Alaksandra Vichora nastupiła ŭ vyniku vostraj niedastatkovaści krovazvarotu, jakaja raźviłasia z pryčyny zachvorvańniaŭ sardečna-sasudzistaj sistemy.
Na ciele vyjaŭlenyja niepramyja pierałomy rebraŭ, pierałomy hrudziny, jakija ŭtvarylisia pry praviadzieńni reanimacyjnych mierapryjemstvaŭ — niepramoha masažu serca.
Ałkaholu, narkatyčnych srodkaŭ i psichatropnych rečyvaŭ u arhaniźmie nie vyjaŭlena.
Pa vysnovach ekśpiertnaj kamisii, rasstrojstva psichičnaj dziejnaści maskiravała kliničnyja prajavy byli ŭ jaho zachvorvańniaŭ sardečna-sasudzistaj sistemy. Dakładna ŭstanoŭlena, što nieabchodnaść akazańnia chutkaj miedycynskaj dapamohi ŭźnikła ŭ chodzie ahladu jaho psichijatram-narkołaham.
— U skład kamisii ŭvajšli najbolš kvalifikavanyja ekśpierty Dziaržkamiteta sudovych ekśpiertyz i daktary z praktykaj u halinie kardyjałohii, psichijatryi, narkałohii i terapii, jakija majuć vučonyja stupieni i staž pracy ad 10 da 46 hadoŭ. Nie daviarać vysnovam ekśpiertaŭ niama nijakich padstaŭ — kaža načalnik USK pa vobłaści.
U chodzie pravierki, paviedamlaje načalnik USK, ustanoŭlena, što da nastupleńnia śmierci Alaksandra Vichora pryviali zachvorvańni sardečna-sasudzistaj sistemy, jakija raptoŭna abvastrylisia
U SK kažuć, što ŭpieršyniu zachvorvańnie sardečna-sasudzistaj sistemy ŭ Alaksandra Vichora dyjahnastavali ŭ 2017 hodzie padčas prachodžańnia miedycynskaha abśledavańnia pa nakiravańni vajennaha kamisaryjata. Pa jaho vynikach, małady čałaviek byŭ pryznany nieprydatnym da vajskovaj słužby pa chvarobie i zaličany ŭ zapas. U červieni minułaha hoda miedkamisija znoŭ pryznała jaho nieprydatnym da vajskovaj słužby pa chvarobie.
Siamja zahinułaha Alaksandra ab zakančeńni pravierki taksama daviedałasia siońnia.
— Chvilin 40 tamu patelefanavaŭ śledčy i paviedamiŭ, što ŭ zaviadzieńni kryminalnaj spravy pa fakcie jaho śmierci nam admoŭlena. Skazaŭ, što z vynikami pravierki nas aznajomiać, ale nie ciapier — u paniadziełak treba pryjści ŭ SK. Kali ščyra, my pakul u šoku i razhublenaści, — kaža siastra zahinułaha Alaksandra Volha.
Nahadajem, 25-hadovaha Alaksandra Vichora zatrymali ŭviečary 9 žniŭnia na vulicy Savieckaj u Homieli, pa słovach rodnych, jon jechaŭ da svajoj dziaŭčyny. Siamja šukała syna try dni: telefanavali i chadzili ŭ RAUS, dziažuryli da nočy la SIZA i IČU. I tolki kali 12 žniŭnia rodnyja pryjechali ŭ milicyju pisać zajavu ab źniknieńni čałavieka, stała viadoma: Sašy niama ŭ žyvych jašče z 11-ha žniŭnia.
Momant zatrymańnia Alaksandra Vichora. Fota Siarhieja Kamkova
U toj ža dzień u Śledčym kamitecie raspaviali svaju viersiju taho, što adbyłosia. Maŭlaŭ, Alaksandr Vichor byŭ zatrymany supracoŭnikami milicyi za aktyŭny ŭdzieł u niesankcyjanavanym masavym mierapryjemstvie. Pastanovaj suda byŭ pryciahnuty da administracyjnaj adkaznaści ŭ vyhladzie aryštu terminam na 10 sutak. Mužčyna byŭ nakiravany da miesca adbyćcia pakarańnia, dzie ŭ jaho rezka pahoršyłasia samaadčuvańnie. Hamialčuk byŭ dastaŭleny ŭ balnicu, tam pamior. «Padčas pieršasnaha ahladu bačnych cialesnych paškodžańniaŭ, jakija mahli stać pryčynaj śmierci, vyjaŭlena nie było», - kazali ŭ SK.
Jašče praź dzień śledčy paviedamiŭ rodnym, što Saša pamior ad pieradaziroŭki narkotykaŭ. Praŭda, potym, paśla ahałoski ŭ ŚMI, ab hetaj viersii zabylisia, pa spravie pamianiali śledčaha, kazali rodnyja.
Nie raz Vichory źviartalisia ŭ prakuraturu z prośbaj ab raspačynańni kryminalnaj spravy na supracoŭnikaŭ milicyi za niepravamiernyja dziejańni ŭ dačynieńni da ich syna. Pravierku pa fakcie jaho hibieli ŭsio padaŭžali.
Kab adnavić karcinu padziej, rodnyja sami šukali śviedak — takich ža zatrymanych, jakija znachodzilisia z Alaksandram u apošnija dni i hadziny jaho žyćcia. I jany znajšlisia i raspaviali, što bačyli. Ale ŭsie jany stracili suviaź z Sašam prykładna 11 žniŭnia ŭ 10 viečara. U dźvie nočy chłopca pryvieźli ŭ balnicu. Kala čatyroch hadzin ranicy jon pamior.
