Rečyčanin Aleś Zdaraviennaŭ prymacavaŭ da vientylacyjnaj truby na svajoj chacie ŭ pryvatnym siektary nacyjanalny bieł-čyrvona-bieły ściah jašče ŭ listapadzie. Z taho času ściah visieŭ i nikomu nie zaminaŭ. Bolš taho, u pačatku śniežnia jaho zaŭvažyli milicyjaniery, apytali Alesia i niekalkich susiedziaŭ, i na tym sprava ścichła.
Ale 23 studzienia da Alesia znoŭ pryjšoŭ milicyjanier. Im akazaŭsia ŭčastkovy Vadzim Pinkin. Aleś sprabavaŭ dakazać, što haspadaryć va ŭłasnym padvorku i ŭpryhožvaje jaho tak, jak ličyć patrebnym, i padvorak nie jość publičnaje miesca, dzie b jon pravodziŭ niejkija masavyja mierapryjemstvy. Pinkin navat mieraŭ adlehłaść ad płota vulicy da miesca, dzie staić ściah, i namieraŭ ažno 6 mietraŭ. Ale heta nie pieraškodziła skłaści na Alesia Zdaraviennaha pratakoł ab administracyjnym pravaparušeńni z abvinavačvańniem u praviadzieńni adzinočnaha pikietavańnia «z metaj publičnaha vykazvańnia svaich hramadska-palityčnych intaresaŭ».
U sudzie Rečyckaha rajona administracyjnuju spravu Alesia Zdaraviennaha razhladaŭ sudździa Vadzim Bobyraŭ. Padčas apytańnia Aleś patłumačyŭ, što na svajoj ułasnaj chacie paviesiŭ ściah dla siabie, a nie dla niejkich masavych mierapryjemstvaŭ.
«Mnie hety ściah padabajecca. Jon pryhožy. Heta naša historyja. Z hetym ściaham Biełaruś stała niezaležnaju. Z tym, što ja takim čynam pravodziŭ pikietavańnie, ja kateharyčna nie zhodny», — skazaŭ Aleś Zdaraviennaŭ.
Sudździa Vadzim Bobyraŭ vynies prysud, u jakim pryznaŭ Alesia Zdaraviennaha vinavatym u niesankcyjanavanym pikietavańni i prysudziŭ jamu štraf u 40 bazavych vieličyń (1160 rubloŭ).
Aleś Zdaraviennaŭ skazaŭ, što nie zhodny z takim rašeńniem i budzie jaho abskardžvać.
