Viktar Taŭhień znachodzicca pad padpiskaj ab niavyjeździe. Za ŭdzieł u toj ža akcyi jon užo adbyŭ administracyjny aryšt z 12 pa 16 žniŭnia pa artykule 23.34 KaAP.
Jaho abvinavačvajuć u tym, što ŭviečary 9 žniŭnia jon hruba parušaŭ hramadski paradak, a mienavita «machaŭ rukami, uklučaŭ hučna muzyku na mahnitafonie, stvaraŭ štučnaje aśviatleńnie lichtarykam». Padčas dopytu na pasiadžeńni 16 lutaha Taŭhień svajoj viny nie pryznaŭ i nie ličyć, što jon parušaŭ hramadski paradak. Zaŭvah jak z boku milicyi, tak i z boku hramadzian nie było.
Zatym byŭ dapytany śviedka — milicyjant Buračonak. Jon raspavioŭ, što ŭ toj viečar u horadzie sabraŭsia natoŭp ludziej, stajaŭ šum. Ludzi kryčali. Z kałonki hrała «Pieriemien» Coja i inšyja pieśni. Siarod ludziej jon bačyŭ Taŭhienia, ale nie čuŭ, što kankretna toj vykrykvaŭ. Jon bačyŭ, što Taŭhień u sčepcy nie stajaŭ. Na pytańnie advakata, što supracoŭniki milicyi rabili padčas niesankcyjanavanaha masavaha mierapryjemstva, jon adkazaŭ, što «stajali».
— Što milicyja pavinna była rabić, kali bačyć pravaparušeńnie?
— Nie viedaju, ja zabłytaŭsia. Kali pryjechaŭ AMAP, ludzi pabiehli, nam dali kamandu źjazdžać.
Abviaścili pakazańni Buračonka, dadzienyja padčas śledstva i na vočnaj staŭcy. Tam byli niekatoryja supiarečnaści. Spačatku jon kazaŭ, što Taŭhień nie vykrykvaŭ łozunhi, a padpiavaŭ muzycy, zatym kazaŭ, što časam vykrykvaŭ, na sudzie znoŭ skazaŭ, što nie vykrykvaŭ.
Druhim dapytali śviedku milicyjanta Siniaŭskaha. Jon skazaŭ, što bačyŭ abvinavačanaha z adlehłaści nie mienš za 30 mietraŭ. Bačyŭ, što toj uklučaŭ muzyku, ale nie čuŭ jaho vykazvańniaŭ. Adznačyŭ, što «hramadzianie jaho padtrymlivali vopleskami, padpiavali». Na navodnaje pytańnie prakurora Bałocinaj pra toje, ci nie stanaviłasia pavodziny hramadzian ahresiŭnym, jon adkazaŭ śćviardžalna.
— Jakaja zadača była pastaŭlena vam asabista? — spytaŭ advakat.
— Była ahulnaja zadača nie dapuścić prachodu hramadzian da rajvykankamu.
— Chto-niebudź ź ich sprabavaŭ tudy prajści?
— Nie, nichto.
— Što adbyvałasia na płoščy?
— Administracyjnaje pravaparušeńnie, niesankcyjanavanaje mierapryjemstva.
— Što pavinny rabić supracoŭniki milicyi pry pravaparušeńni?
— Byŭ načalnik, bieź jaho kamandy nie moh ničoha.
Śviedka — inśpiektar pa spravach niepaŭnaletnich Stankievič — byŭ na płoščy ź miehafonam.
«Taŭhień vyznačaŭsia tym, što mieŭ pry sabie kałonku, čym zavodziŭ natoŭp. Niešta vykrykvaŭ, ale što mienavita — nie čuŭ. Adzin raz padychodziŭ da mianie na adzin mietr. Kali ja pačynaŭ havaryć u miehafon, jon uzmacniaŭ huk kałonki».
Pry hetym śviedka skazaŭ, što nie bačyŭ, jak Taŭhień uzmacniaŭ huk.
Taksama jon apisaŭ toje, što adbyvałasia na płoščy, apisaŭ traich aktyŭnych udzielnikaŭ, ale Taŭhienia nie zhadaŭ.
Śviedka — milicyjant Alaksandr Siańko — taksama bačyŭ abvinavačanaha z kałonkaj na płoščy z adlehłaści ŭ 30 mietraŭ. Jon nie pamiataje, Taŭhień «kryčaŭ, padpiavaŭ ci maliŭsia». Ničoha ahresiŭnaha ŭ jaho dziejańniach nie było i ničym, akramia kałonki, z natoŭpu nie vydzialaŭsia.
Jon taksama raspavioŭ, što, akramia Taŭhienia, na płoščy byli jašče try ci čatyry čałavieki z kałonkami i mahnitołami. I ŭzdoŭž šarenhi milicyi chadziŭ nie Taŭhień, a inšy čałaviek.
Śviedka — milicyjant Filistovič — śćviardžaŭ, što Taŭhienia zaŭvažyŭ nie adrazu i tolki dziakujučy muzyčnaj kałoncy. Hety śviedka śćviardžaŭ, što Taŭhień ŭsio-taki padychodziŭ da milicyjantaŭ i niešta im havaryŭ. «Narod na jaho muzyku naohuł nie reahavaŭ. Samyja aktyŭnyja stali ŭ łancužok, sčapiŭšysia rukami łokciami. Taŭhienia siarod ich nie było. Liču jaho dziejańni aktyŭnymi, jon chadziŭ i machaŭ rukami».
— Łozunhi « Žyvie Biełaruś!», «Milicyja z narodam» ahresiŭnyja?
— Tak, ahresiŭnyja.
Na hetym dopyt śviedak zaviaršyŭsia. Na nastupnym pasiadžeńni, 17 lutaha, demanstravalisia videamateryjały sa spravy — a mienavita videa z płoščy 9 žniŭnia. Daloka nie adrazu prysutnyja ŭ zale zmahli razhledzieć na ich Viktara Taŭhienia. Pa videa bačna, što na płoščy było bolš aktyŭnych ludziej, čym Taŭhień, taksama vidać, što kali mnohija inšyja ŭklučyli lichtaryki na telefonie, abvinavačany jašče hetaha nie zrabiŭ. Na pasiadžeńni 18 lutaha pradoŭžyŭsia prahlad videa, na jakich praktyčna nie vidać Taŭhienia.
