Uładam Bałharyi pryjdziecca abviaścić rasijskich dypłamataŭ piersonami non hrata z-za spravy ab špijanažy. Pra heta zajaviŭ bałharski premjer-ministar Bojka Barysaŭ.
«U čarhovy raz nam davodzicca abjaŭlać rasijskich dypłamataŭ niepažadanymi piersonami», — skazaŭ jon.
Pavodle jaho słoŭ, Safija nieadnarazova demanstravała siabroŭskija adnosiny z Maskvoj, u tym liku ŭ pytańni budaŭnictva hazapravoda «Bałkanski patok», adnak špijonić na terytoryi krainy nikomu nie dazvolena. «Znoŭ chaču zaklikać ich kiraŭnikoŭ: pierastańcie špijonić u Bałharyi», — cytuje kiraŭnika ŭrada «Bałharskaje Nacyjanalnaje radyjo».
Ab zatrymańni ŭ Safii niekalkich padazravanych u špijanažy na karyść Rasii stała viadoma ŭ noč na 19 sakavika. Pa niekalkich adrasach u paŭdniovych rajonach bałharskaj stalicy i ŭ vakolicach horada Piernika prajšli pieratrusy.
Paźniej Minabarony Bałharyi paviedamiła, što pa padazreńni ŭ pieradačy sakretnych źviestak zamiežnaj dziaržavie byli zatrymanyja dvoje bałharskich vajskoŭcaŭ. U hienprakuratury patłumačyli, što zatrymanyja i ich saŭdzielniki pracavali ŭ intaresach Rasii.
Usiaho pa spravie prachodziać šaściora padazravanych. U pracy špijonskaj hrupy ŭdzielničała taksama žonka adnaho z zatrymanych, jakaja maje bałharskaje i rasijskaje hramadzianstva, paviedamili ŭ prakuratury.
