vancouversun.com
Pa słovach aficyjnych asob, tempieratura pavietra ŭ Litanie ŭ Brytanskaj Kałumbii ŭ niadzielu padniałasia da 46,6 hradusaŭ Celsija, pabiŭšy 84-hadovy rekord, piša Bi-bi-si.
Tak zvany «ciepłavy kupał» — nieruchomaja zona vysokaha cisku, jakaja dziejničaje niby nakryŭka nad rondalem, — abnaviŭ rekordy i ŭ inšych rajonach.
Ułady ZŠA i Kanady papiaredzili hramadzian ab niebiaśpiečnaj śpiocy, jakaja moža zachoŭvacca až da vychodnych.
Zona vysokaha cisku raskinułasia ad Kalifornii da arktyčnych terytoryj Kanady i raspaścirajecca ŭhłyb kantynienta da Ajdacha.
U haradach na ŭsiu moc pracujuć kandycyjaniery i vientylatary, źjavilisia śpiecyjalnyja zony dla achaładžeńnia.
Niekatoryja bary i restarany — i navat adzin basiejn — časova začynilisia, bo ŭnutry zanadta horača.
Litan, jaki znachodzicca prykładna ŭ 250 km na paŭnočny ŭschod ad Vankuviera, na paŭtara hradusa pabiŭ papiaredni kanadski rekord: u lipieni 1937 hoda ŭ hetych krajach stajała 45-hradusnaja śpioka.
Bolš za 40 inšych miescaŭ u Brytanskaj Kałumbii taksama abnavili tempieraturnyja rekordy.
Staršy klimatołah Ministerstva achovy navakolnaha asiarodździa Kanady Devid Filips skazaŭ u intervju telekampanii CTV: «Zaŭsiody pryjemna pabić rekord, ale hety rekord nie prosta pabity — jon raźbity daščentu. U niekatorych častkach Zachodniaj Kanady haračej, čym u Dubai».
Filips ličyć, što i 47 hradusaŭ — nie miaža.
Elektraenierhietyčnyja kampanii Brytanskaj Kałumbii kažuć ab rezkim roście spažyvańnia enierhii, što niadziŭna, pakolki adnačasova pracujuć usie kandycyjaniery, jakija jašče mohuć funkcyjanavać.
Ministerstva navakolnaha asiarodździa Kanady zajaviła, što Albierta i niekatoryja častki Saskačavana, Jukona i Paŭnočna-Zachodnich terytoryj taksama pavinny rychtavacca da anamalnaj śpioki.
Sinoptyki Ministerstva prahnazujuć, što «na hetym tydni zachavajecca praciahłaje, niebiaśpiečnaje haračaje nadvorje» z tempieraturami na 10-15 hradusaŭ vyšej za normu, a ŭ mnohich miescach — kala +40.
Paŭnočny zachad Cichaha akijana — štaty Vašynhton i Arehon u ZŠA — taksama bje rekordy.
Nacyjanalnaja mietearałahičnaja słužba ZŠA nazvała anamalnuju śpioku «histaryčnaj» i zajaviła, što jana prastaić na praciahu tydnia, pry hetym, vierahodna, buduć ustanoŭleny šmatlikija novyja tempieraturnyja rekordy dnia, miesiaca, a mahčyma, i absalutnyja.
Sietł i Portlend — niaźmiennyja abjekty žartaŭ pra daždžlivaje nadvorje, — mohuć akazacca siarod hetych rekardsmienaŭ: u abodvuch haradach tempieratura ŭžo dasiahnuła adznaki ŭ 40 hradusaŭ Celsija.
Arehon asłabiŭ abmiežavańni ŭ suviazi z karanavirusam, adkryŭšy basiejny i zony z kandycyjanavańniem pavietra, u pryvatnaści niekatoryja handlovyja centry. U toj ža čas u Sietle pryjšłosia zakryć adzin basiejn z-za «niebiaśpiečnych» tempieratur unutry.
