«Jak ja trapiła ŭ CIP — historyja na asobny post, a ŭ hetym ja prosta chacieła b nahadać, što razam z palitźniavolenymi pa kryminałcy našych praciahvajuć katavać na Akreścina. 30 sutak tam u siońniašnich umovach mnie chapiła, kab vyjści z bukietam novych chvarob — ad farynhatrachieitu da cystytu i karony (darečy, mienavita pryščepka dapamahła pieranieści apošniuju dosyć lohka ŭ paraŭnańni z maimi sukamiernicami). A ludzi siadziać tam pa 60 sutak i bolš, u zaležnaści ad taho, kolki pratakołaŭ im zachočuć nakinuć.
Siadziać u antysanitaryi — ich nikoli nie vodziać u duš i nie vydajuć navat ščotak z asabistych rečaŭ. Tualetnuju papieru časam prychodziłasia vybivać pa santymietry.
Siadziać miesiacami biez špacyraŭ (pavietra ŭ kamieru №15 mahło pastupać da nas tolki z kalidora praz «karmušku», ale jaje śpiecyjalna ŭvieś čas začyniali).
Siadziać biez matracaŭ (paduškaj nam słužyŭ splaśnieły chleb, a na hołaj padłozie ci škoncy spać było b jašče mahčyma, ale nočy daŭno dzika chałodnyja — navat abdymajučy adna adnu i zaciskajučy pamiž noh butelku z haračaj vadoj my nie mahli supakoić dryžyki. Nočy pieratvaralisia ŭ cykł fizičnych praktykavańniaŭ — prysiadać, paadciskacca, pastajać u płancy — niejak pahrecca i zasnuć).
Siadziać biez snoŭ (u dva i čatyry nočy nas padymali na pieraklički; pra toje, što tam sutkami haryć jarkaje štučnaje aśviatleńnie, i nahadvać nie treba).
Siadziać bieź pieradač (mnohich žančyn zabirali z pracy ci lecišč u spadnicach, sukienkach, i jany tak i lažali načami na chałodnaj padłozie, pakul niechta z tych, chto vychodziŭ na volu, nie zdymaŭ ź siabie bajku ci trusy-škarpetki. Ščotkaj, jakaja ŭ spadčynu dastałasia mnie, karystałasia jašče čałaviek piać da hetaha, zdajecca. A ŭ majcy chadziła sama maci «Chłopotnoho dielca»).
Siadziać na pałovu hałodnyja (za miesiac charčavańnia ja musiła zapłacić bolš 400 rubloŭ (kala 150 jeŭra), i za hetyja hrošy na abied atrymlivała pusty sup — vadkaść z paraj bulbin i łupinaj ad jaje, splaśnieły chleb i dva kubki harbaty ci kisiel, jakija zapaŭniali tolki pałovu kubka. Jak miascovych porcyj chapaje našym chłopcam, ja nie ŭjaŭlaju).
Siadziać biez adekvatnaj miedycynskaj dapamohi (u pikavy momant u dvuchmiesnaj kamiery №15 utrymlivałasia 20 žančyn — u choładzie i duchacie ŭsie chutka pačynali chvareć. Usich atakoŭvaŭ karanavirus, jaki, jak i inšyja chvaroby, lečycca tam z bolšaha paracetamołam. Biez mahčymaści ruchacca ŭ chacie 3 na 4 mietry, z drennym charčavańniem usie rezka pierastavali chadzić u tualet. Užo prabačcie za padrabiaznaści, ale za 30 sutak ja zmahła zrabić heta tolki try razy).
Siadziać jak paddoślednyja. Mnie navat niejak nie pa sabie raskazvać, jak darosłyja ciotki i dziadźki ź CIP kajfujuć, nazirajučy ŭ vočki i kamiery za tym, jak my budziem zmahacca z novym prydumanym vyprabavańniem. Spačatku da vas padsialajuć Ału Iljinišnu i Marynku z vošami, čakajučy, što ŭ vas pačniecca isteryka. Ale my znachodzim ź imi ahulnuju movu, i praź niekalki dzion «isteryka» zdarajecca ŭ dziažurnych, jakija ŭsio ž viaduć tak zvanych marhinałaŭ z našych kamier na «pražarku», bo situacyja blizkaja da epidemii piedykulozu. Supracoŭniki vielmi pieražyvajuć za stan svajoj formy — jany vymušanyja dva razy na sutki pravodzić šmon u našych kamierach i praščupvać nas, a tak lohka padčapić jak minimum adziežnych nasiakomych.
Paśla da vas padsialajuć novuju Marynu — u jaje rasstrojstva kišečnika, jana ŭsia ŭ haŭnie, a jašče ŭ jazvach, jakija ściakajuć kryvioju, u hrybku. A jašče ŭ jaje žorstki abstynientny sindrom. Supracoŭniki CIP nazirajuć i čakajuć, što my sarviemsia. Ale my prosta biarom i pačynam myć Marynku nad dzirkaj u padłozie i vybivajem u miedsupracoŭnika zialonku, kab apracavać jaje rany. Nam zabaraniajuć siadzieć i spać, abražajuć, ale my praciahvajem žartavać i z kamier čujecca śmiech — usio heta vielmi razdražniaje supracoŭnikaŭ CIP.
Mnie jość jašče što zhadać, ale bolš padrabiazna ja apišu ŭsie katavańni i pramyja złačynstvy ŭ dačynieńni da biełarusaŭ u skarhach u dziaržustanovy (choć jany paśla i skažuć, što dadzienyja fakty nie paćvierdzilisia, Azaronku ž u nas padabałasia). Ale pakul prosta koratka nahadaju, za što ŭ Biełarusi tak ździekvajucca ź ludziej u statusie pravaparušalnikaŭ:
- Była na vulicy ŭ čyrvonaj sukiency ź biełaj nakidkaj.
- Pryjšła padtrymać tatu Maryi Kaleśnikavaj na sud (u pratakole napisali «chacieła vyzvalić Maryju Kaleśnikavu»).
- Pryniesła kvietku da miesca zabojstva Tarajkoŭskaha.
- Pierasłała mužu ŭ asabistyja naviny z «ekstremisckich» telehram-kanałaŭ.
- Źniała na videa dvarovy marš u Łošycy.
- Skazała vajskoŭcu «Naša voźmie».
- Čytała ŭ elektryčcy knižki biełaruskich piśmieńnikaŭ.
- Była niepažadanaj novamu kiraŭnictvu Akademii kiravańnia.
- Pierapisvałasia ŭ čacie Lebiadzinaha z susiedziami.
- Viarnułasia z Francyi, dzie vyjšła zamuž za francuza.
- Pracavała ŭ «Korpusie», a kali tudy pryjechaŭ HUBAZIK, «akazała» im niepadparadkavańnie (nasamreč, viadoma, nie).
- Ajcišnica, jakaja moža viedać kibierpartyzanaŭ…»
