U druhi tur, jaki adbudziecca 19 śniežnia, vyjšli ŭltralevy studencki aktyvist Habryjel Boryč i ultrapravy kansiervatar i baćka dzieviaci dziaciej Chase Antonia Kast.
Boryč i Kast, fota Ex-ante.
Pieršy tur vybaraŭ u Čyli prajšoŭ 21 listapada. Ultrapravy Chase Antonia Kast zaniaŭ pieršaje miesca, nabraŭšy kala 27,9% hałasoŭ. Na druhim miescy byŭ 35-hadovy Habryel Boryč, małady ultralevy palityk i były studencki lidar, jaki atrymaŭ prykładna 25,8% hałasoŭ.
Kandydaty ad pravacentrysckich i levacentrysckich partyj, jakija pa čarzie kiravali krainaj 30 hadoŭ z momantu adychodu ad ułady Pinačeta, zaniali niavyjhryšnyja čaćviortaje i piataje miescy adpaviedna. Za tradycyjnyja partyi prahałasavała tolki čverć čylijcaŭ.
U čym ža pryčyny?
Jašče ŭ 2019 hodzie kraina sutyknułasia z masavymi pratestami, vyklikanymi ekanamičnaj niaroŭnaściu i razryvam va ŭzroŭni dachodaŭ bahatych i biednych čylijcaŭ.
Dziakujučy niealibieralnaj ekanamičnaj madeli, Čyli dziesiacihodździami pieražyvała ekanamičny rost, ale tak i nie zmahła pieraadoleć niaroŭnaść.
Akty vandalizmu, uklučajučy padpały stancyj mietro i ŭradavych budynkaŭ, vyklikali žorstkuju reakcyju siłavikoŭ, jakija stralali humavymi kulami ŭ demanstrantaŭ. U adkaz na pratesty levych i biesparadki ŭ krainie pačałosia stvareńnie novaj kanstytucyi. Na heta pahadziŭsia pravy prezident Siebaśćian Pińjera.
Heta pryviało da hłybokaha palityčnaha kryzisu, palaryzacyi palityčnaha žyćcia i žorstkaha supraćstajańnia levych i pravych sił. Heta moža razładzić situacyju ŭ Čyli i pahoršyć situacyju va ŭsim rehijonie.
Chto taki Chase Antonia Kast?
55-hadovy ŭltrakansiervatyŭny baćka dzieviaci dziaciej, vystupaje suprać imihracyi, adnapołych šlubaŭ i palitkarektnaści, za tradycyjnyja siamiejnyja kaštoŭnaści i žorstkuju baraćbu sa złačynnaściu, i navat publična vykazaŭ svajo zachapleńnie dyktaturaj Pinačeta.
Na dumku Kasta, pratesty 2019 hoda byli prablemaj pravaparadku. Kast vystupaje suprać novaj kanstytucyi i abvinavačvaje tradycyjnych pravych u tym, što jany tak lohka pahadzilisia z patrabavańniami levych sił. Kast kaža, što ŭ druhim tury ŭ čylijcaŭ jość vybar pamiž «svabodaj i kamunizmam». Jon prapanuje źnizić padatki, pamienšyć rolu dziaržavy, vyryć pamiežnuju tranšeju, kab nie ŭpuskać mihrantaŭ ź Vieniesueły i inšych krain. Taksama ŭ prahramie palityka prapanujecca całkam zabaranić aborty (chacia jany ŭžo amal całkam zabaronienyja ŭ Čyli, za redkim vyklučeńniem).
Što viadoma pra Habryjela Boryča?
Boryč źjaŭlajecca lidaram ultralevaha kryła. 35-hadovy palityk, jaki nie lubić halštukaŭ, moža stać samym maładym prezidentam Čyli. Jon vystupaje za pryniaćcie novaj kanstytucyi i kaža, što pryjšła para pachavać niealibieralnuju madel kiravańnia krainaj i pačać zmahacca ź niaroŭnaściu.
Boryč prapanuje pavialičyć padatki dla bahatych, skaracić pracoŭny dzień, pavialičyć minimalny zarobak, daravać studenckija daŭhi za apłatu navučańnia, pavysić rolu dziaržavy ŭ ekanomicy, pierahledzieć piensijnuju i sacyjalnuju sistemy Čyli i źviarnuć uvahu na pytańni ekałohii. Taksama Boryč vystupaje za lehalizacyju abortaŭ i adnapołych šlubaŭ. U aljans Boryča ŭvachodzić Kamunistyčnaja partyja Čyli.
Amal usiu kampaniju lidziravaŭ Boryč. Adnak Kast staŭ imkliva skaračać svajo adstavańnie na fonie stomlenaści čylijcaŭ ad palityčnaha nasilla i pratestaŭ levych.
Najbolšaja intryha druhoha tura — za kaho buduć hałasavać umieranyja kansiervatary. Im pryjdziecca vybirać pamiž ultrapravym papulistam z sumnieŭnaj prychilnaściu da demakratyi, abo padtrymlivać ultralevaha Boryča, jaki, mahčyma, i nie pahražaje demakratyi, ale jaho radykalnyja i sprečnyja prapanovy pałochajuć mnohich vybarščykaŭ.
