Dzie ciapier znachodzicca kum rasijskaha prezidenta Miedviadčuk —nieviadoma, jon uciok z-pad chatniaha aryštu ŭ pieršyja dni vajny. Jaho žonka Aksana Marčanka, miarkujučy pa apošnim apublikavanym joju videa, ciapier u Maskvie.
Stancyja «Dalokaja»
Na čyhunačnym pieronie jość rejki, łaŭki dla čakańnia i navat hadzińnik i lichtary. Nad pieronam visić nazva stancyi — «Dalokaja».
Na rejkach staić sini vahon-restaran z nadpisam zahałoŭnymi załatymi litarami — Pullman. Heta nazva kampanii, jakaja vyrablaje luksavyja aŭtamabili i čyhunačnyja vahony. Takija vahony-restarany Pullman byli papularnyja ŭ minułym stahodździ, kali zamožnyja jeŭrapiejcy padarožničali pa čyhuncy.
Spačatku žurnalisty padumali, što siamja Miedviedčukoŭ zamoviła hety vahon u kampanii Pullman, i pravieryli canu na jaho — luksavyja vahony pad zakaz kaštujuć da $2,5 miljona dalaraŭ. Paźniej stała viadoma, što vahon byŭ zrobleny rukami sotni ŭkrainskich majstroŭ, dyzajniery prosta «pazyčyli» eskizy ŭ luksavaj marki.
Aktyvist Piotr, jaki pravodzić ekskursiju pa terytoryi majontka Miedviedčuka, adkryvaje dźviery vahona i prosić nadzieć bachiły, kab nie zapeckać darahija dyvany na padłozie.
Unutry raźbiahajucca vočy ad kolkaści pazałoty, punsovaha aksamitu i biełych abrusaŭ. Heta bolš padobna na muziej, čym na vahon.
U ciahniku jość asnoŭnaja zała na 40 čałaviek, a taksama niekalki asobnych pakojaŭ: kuchnia, vip-kupe i tualet. La ŭvachodu staić barnaja stojka. Na niekalkich šklankach bačny pazałočany hierb Rasijskaj Fiederacyi.
Źleva la barnaj stojki staić nastolnaja lampa. Heta ekskluziŭny vyrab ad francuzskaha brenda Bronze D'art Français, madel nazyvajecca «Napaleon lll». Nožka zroblenaja ź zialonaha marmuru, a ŭpryhožvańnie vykananaje z čystaha zołata. Hetaja lampa kaštuje bolš za 100 tysiač hryŭniaŭ ($3400), ale heta košt biez abažura.
Sprava na bary staić kavamašyna. Heta taksama italjanski luksavy brend Elektra. Bazavaja madel takoha typu kavavarki kaštuje ad 220 tysiač hryŭniaŭ ($7500). Adnak hetuju madel, vierahodna, rabili śpiecyjalna pa zamovie Miedviedčukoŭ — jana ŭpryhožanaja bronzavymi malunkami i inšymi elemientami dekoru. Takim čynam, realny košt kavamašyny moža być značna bolšym.
U vahonie mebla ŭpryhožanaja aksamitam, inšymi darahimi tkaninami, a ŭklučajucca śviacilniki ad nacisku na sensarnyja knopki. Nad hałavoj — vitražy.
Załaty samavar?
U kucie vahona staić niešta padobnaje na ruski samavar. Niekatoryja elemienty vyhladajuć, jak pazałota.
Kala samavara — uvachod u vip-kupe. Jano padobnaje na tradycyjnyja kupe ciahnikoŭ «Ukrzaliźnici», tolki značna bolš raskošnaje. Pry nacisku na draŭlanuju panel sa stała vyjazdžaje televizar.
U tualecie taksama šmat załatych elemientaŭ — jak na samim unitazie, tak i na knopkach źlivu vady i navat na šłanhu dla bide.
Zaviaršajecca ekskursija pa hetym vahonie raskošy i biezhustoŭščyny na nievialikaj kuchni. Šafy i palicy zastaŭlenyja stałovymi naborami ad francuzskaha luksavaha brenda Cristofle Paris. Tolki kufar dla zachoŭvańnia srebranych videlcaŭ, łyžak i nažoŭ kaštuje 14 tysiač hryŭniaŭ ($480).
Kožny srebrany videlec i łyžka hetaha brenda kaštuje ad troch da dzieviaci tysiač hryŭniaŭ ($100-300). U kuchonnych šafach dziasiatki skrynak z naborami srebranych stałovych pryboraŭ ad hetaha brenda. Takim čynam, ich ahulny košt u hetym vahonie-restaranie moža dasiahać sotni tysiač hryŭniaŭ.
Padarunak ad žonki, jakaja kachaje
U žurnalistaŭ «Śledstva.Info» atrymałasia znajści čałavieka, datyčnaha da stvareńnia hetaha vahona-restarana. Pa słovach mužčyny, hety vahon Miedviedčuku padaryła jaho žonka Aksana Marčanka na minuły dzień naradžeńnia.
«Praca praciahvałasia kala hoda. Dyzajniery skapijavali hety vahon z eskizaŭ niekalkich vahonaŭ Pullman, Aksana Marčanka zaćvierdziła prajekt, i ŭsio źbirałasia ŭručnuju. Było pryciahnuta bolš za sotniu rabotnikaŭ. Adna firma vyrablała dach, inšaja —bakavyja paneli, treciaja zajmałasia azdableńniem», — raspaviadaje budaŭnik Alaksiej.
Pa jaho słovach, pad vahonam pabudavali vialikuju kuchniu i pamiaškańni dla zachoŭvańnia praduktaŭ.
«Usie budaŭniki zdavali pracu Aksanie Marčanka 1 žniŭnia 2021, za šeść dzion da dnia naradžeńnia Miedviedčuka — heta jamu byŭ padarunak ad žonki. Dapuskaju, što takija pracy kaštujuć sotni tysiač dalaraŭ, ale dakładnaj sumy nie viedaju», — zaznačaje budaŭnik Alaksiej.
Ciažka padličyć dakładny košt vahona, ale ab im moža śviedčyć adzin cikavy elemient. Na vahonie jość niekalki žaleznych emblem Compagnie Internationale des Wagons-Lits, jakija ŭstaloŭvali na takoha typu vahony Pullman. My znajšli aryhinalnuju detal hetaj emblemy na Ebay — jana kaštuje amal dva miljony hryŭniaŭ ($68 000).
Tak što tolki na emblemy dla vahona Miedviedčuki vydatkavali miljony hryŭniaŭ, kali, viadoma, heta nie padrobki, zroblenyja ukrainskimi ŭmielcami pa zamovie Aksany Marčanki.
