Za 180 chvilin čverćfinała «Atletyka» tak i nie zdoleŭ prabić Edersana i «Man Sici». Fota: Uefa.com
Sioletniaja Liha čempijonaŭ admietnaja tym, što ŭžo ŭ čverćfinale baraćbu za trafiej spynili pieramožcy dvuch apošnich rozyhryšaŭ, «Čełsi» dy «Bavaryja». U sieradu da ich moh dałučycca finalist-2021 z «Mančestera». Adnak kamanda Piepa Hvardyjoły zdoleła ŭtrymać nulavuju ničyju na poli ispanskaha «Atletyka».
U dvuboi lepšych kamandaŭ Ła Lihi dy APŁ pieravaha była na baku haspadaroŭ «Vanda Mietrapalitana». Adnak z 14 udaraŭ tolki try padnačalenyja Dyjeha Simiaone skiravali ŭ stvor. Tam ža, na ich biadu, biezdakorna dziejničaŭ Edersan.
«Man Sici» pravioŭ sotuju hulniu ŭ Lizie čempijonaŭ. Fota: Uefa.com
Adznačym, što ispancy naprykancy sustrečy ŭzmacnili nie tolki futbolny, ale i psichałahičny cisk. Adnak sami jaho nie vytrymali: na 90-j chvilinie za paŭtornuju žoŭtuju kartku Fielipie byŭ vydaleny z pola.
Dziakujučy chatniaj pieramozie 1:0 tydzień tamu, «Sici» razam z nastaŭnikam patrapiŭ u paŭfinał.
Dla Hvardyjoły heta ŭžo dziaviaty raz takoj doŭhaj vandroŭki pa turniry, što jość rekordam spabornictva. Da taho ž nulavaja ničyja ŭ Ispanii dazvoliła «haradžanam» davieści svaju sieryju biez paraz va ŭsich turnirach da 10 sustreč.
«Livierpul» prabiŭsia ŭ paŭfinał ŁČ dvanaccaty raz — i paŭtaryŭ rekord «Mančester Junajted» dla anhlijskich kłubaŭ. Fota: Uefa.com
«Livierpul» za košt haściavoj pieramohi napačatku miesiaca moh asabliva nie turbavacca adnosna vynikaŭ hulni ŭ adkaz. Lik 3:1 harantavaŭ padnačalenym Jurhiena Kłopa istotnuju pieravahu nad «Bienfikaj». Tamu nastaŭnik anhličan napiaredadni matča pravioŭ masavuju ratacyju.
Zaduma apraŭdałasia: «čyrvonyja» vyhladali značna šparčejšymi za partuhalcaŭ — i dziakujučy dublu Firmina ŭžo da 65-j chviliny mieli pieravahu 3:1.
Za čas, što zastavaŭsia da finalnaha śvistka, lisaboncy raŭnavahu adnavili. Adnak tym samym nie zdoleli ni prabicca ŭ paŭfinał, ni pierarvać łancužok «Livierpula» ź siami matčaŭ biez paraz.
«Bienfika» zdoleła adyhracca z 1:3 na «Enfiłdzie». Fota: Uefa.com
Takim čynam, u paŭfinale sustrenucca «Reał» dy «Mančester Sici», a taksama «Livierpul» i «Viljareał». Pieršyja matčy adbuducca 26 i 27 krasavika. Hulni ŭ adkaz — 3 i 4 traŭnia.
«Naša Niva» adnaŭlaje zbor danataŭ — padtrymać prosta
Siensacyi Lihi čempijonaŭ: «Bavaryja» sastupaje «Viljareału» i pakidaje turnir, «Reał» ratujecca na 80-j chvilinie i ŭ dadatkovy čas bje «Čełsi»!
