Fota ilustracyjnaje

Fota ilustracyjnaje

Represii na radzimie, vajna va Ukrainie, ekanamičnyja prablemy — usio heta vymušaje biełarusaŭ źjazdžać z krainy. Ale nie tak prosta atrymać vizu. Pasiaredniki biaruć da tysiačy rubloŭ tolki za zapis u polski vizavy centr.

Situacyja pahoršyłasia jašče i tym, što litoŭskaja ambasada nie robić ciapier vizy dla biełarusaŭ. Polskaja i litoŭskaja ambasady ŭ Hruzii nie dajuć vizy biełarusam, jakija nie majuć hruzinskaha dazvołu na žycharstva. Vyklučeńni — dla aktyvistaŭ i pravaabaroncaŭ.

Abviestka na ambasadzie Litvy ŭ Tbilisi

Abviestka na ambasadzie Litvy ŭ Tbilisi

«Zdajecca, my ź dziećmi trapili ŭ apošni vahon»

Biełaruska Kaciaryna (imia źmienienaje. — RS) jašče ŭ vieraśni 2021 hoda atrymała polskuju humanitarnuju vizu.

«Kali pačałasia vajna va Ukrainie, my pabiehli rabić vizy mužu i dzieciam. Chutka zrabili ŭsie dakumienty, i 2 sakavika ŭdałosia zapisać dziaciej na pryjom u vizavy centr. Ale na humanitarnyja vizy ŭžo zapisu nie było, tamu zapisali dziaciej na pracoŭnyja. Darečy, dakumienty dziaciej biez prablem pryniali na humanitarnyja vizy, choć jany byli zapisanyja na pracoŭnyja. Muža ŭžo nie paśpieli zapisać. Z toj pary — bolš za miesiac minuła — muž tak i nie zdoleŭ zapisacca na vizu. Miescaŭ niama — ni na humanitarnyja, ni na pracoŭnyja. Zdajecca, my trapili ŭ apošni vahon», — raskazała Kaciaryna.

Jana škaduje, što ciapier niama zapisu na vizu ŭ žyvoj čarzie.

«Ciapier ludzi musiać płacić pasiarednikam da tysiačy rubloŭ. Vychodzić, što źjechać ciapier mohuć tolki bahatyja? Kali zapis kaštuje 300 rubloŭ — heta jašče pa-bosku», — kaža jana.

«Jość kamplekt dakumientaŭ na biznes-vizu ad palakaŭ, ale ŭ čarhu trapić nie mahu»

Alaksiej (imia źmienienaje. — RS) chacieŭ padavać dakumienty na vizu ŭ Polšču. Jon maje kamplekt dakumientaŭ na biznes-vizu ad palakaŭ, ale trapić u čarhu pakul nie zdoleŭ. Adnak jamu ŭdałosia zrabić italjanskuju vizu.

«Jaje zrabiŭ pavodle zaprašeńnia ad italjanskaha fondu, pa pracy. Zaprašeńnie było na dva tydni. Ale supracoŭnica ambasady, jakaja prymała papiery, skazała pasprabavać paprasić na hod. I ŭdałosia — dali vizu na hod, šenhienskuju. Ale maim kaleham, jakija taksama padavali zaprašeńnie ad fondu, dali tolki na try miesiacy. Z čym heta źviazana, nie viedaju», — raskazaŭ Alaksiej.

Jon padavaŭ dakumienty na vizu 31 sakavika, atrymaŭ jaje 11 krasavika.

«Znajomy zdoleŭ padacca na polskuju biznes-vizu ŭ Horadni. Ale znoŭ ža — nie sam, «pa błatu», praz znajomych», — dadaŭ Alaksiej.

«Zrabiŭ ispanskuju vizu z terapieŭtyčnych mierkavańniaŭ»

Siarhiej (imia źmienienaje. — RS) nie planuje vyjazdžać ź Biełarusi. Ale pra vizu pakłapaciŭsia — «z terapieŭtyčnych mierkavańniaŭ, jak niapeŭny płan na mahčymy adpačynak», — tłumačyć jon.

Rabiŭ u ispanskim vizavym centry. Ale ciapier centr užo nie pracuje, padać dakumienty na vizu niemahčyma.

«Zapisacca było ciažka — paru hadzin na tydzień zapis byŭ. Ja rabiŭ try tydni tamu. Zdavaŭ dakumienty ŭ dzień, kali ŭsie dumali, što pryjom zakryjuć. Nas u siamji čatyry čałavieki, adziny prybytak — moj zarobak. Tamu nam dali tolki na čatyry miesiacy, bo treba, kab było 800 jeŭra na čałavieka. Ispanskuju paśpieli atrymać i maje kalehi, ale ciapier užo ŭsio — nie vydajuć vizaŭ», — kaža Siarhiej.

«Kiraŭnictva vizavaha centra dziejničała biezadkazna»

Žycharka Minska Aksana (imia źmienienaje) padała dakumienty na šenhienskuju vizu praź ispanski vizavy centr. 18 krasavika jana daviedałasia, što centr začyniajecca. Ludziam prapanavali šukać svaje pašparty ci va ŭłaśnika pamiaškańnia, ci ŭ «dziaržaŭnych orhanach». Jany aburylisia i pajšli raźbiracca da vizavaha centra. Aksana kaža, što takich było kala 50 čałaviek.

Sama jana padavałasia na vizu 29 sakavika.

«Ludzi ŭžo nie pra vizu dumali, a jak zabrać svoj pašpart. Telefony vizavaha centra nie adkazvali. Na sajcie status pašpartoŭ byŭ «u darozie», bo vizy staviać u Maskvie. Praz ułaśnika pamiaškańnia źviazalisia z supracoŭnikami vizavaha centra. Damovilisia, što niekalki hadzin jany buduć vydavać dakumienty. Vydali pašparty tym, chto padavaŭsia 28 sakavika. Tym, chto 29 i 31 padavaŭsia, skazali, što ich pašpartoŭ niama, prychodźcie zaŭtra. Ale ludzi nie syšli, byli nastrojenyja rašuča. Pačali źviazvacca z kurjerskaj słužbaj. Pa vyniku «dabilisia» — pašparty pryvieźli, addali», — raskazała Aksana.

Inšyja biełarusy pajšli ŭ vizavy centr raźbiracca siońnia, 19 krasavika. «Inšyja naohuł, musić, nikudy nie chadzili i čakajuć ci SMS, ci paviedamleńnia ad vizavaha centra. Ja liču, što kiraŭnictva vizavaha centra dziejničała biezadkazna, bo heta ž biznes, ludzi hrošy zapłacili», — ličyć žycharka Minska.

«Siastra addała pasiarednikam 800 rubloŭ za dapamohu»

Anžeła (imia źmienienaje. — RS) niekalki dzion tamu pierajechała ź dziećmi, siastroj i maci ź Biełarusi ŭ Polšču.

«Siastra znajšła pasiarednikaŭ u Minsku, jany dapamahali joj z zaprašeńniem na pracu ŭ Polšču i z čarhoj na padaču papieraŭ. Addała 800 rubloŭ. Bo sama jana miesiac nie mahła zapisacca. Ja prosta cudam zdoleła zapisacca sama, praŭda, u Homieli. Zapisałasia z dačkoj, pryčym biaspłatna. Pašancavała», — raspaviała Anžeła.

Jana kaža, što vielmi stamiłasia ad častych vizitaŭ milicyjantaŭ i sudoŭ za «ekstremizm».

«Prychodzili jak da siabie dachaty. Pakazvaj im telefon, padpiski ŭ sacyjalnych sietkach. Usio vyšukvali «ekstremizm». Niešta znachodzili — bo kolki ja ni čyściła telefon, usiaho nie mahu zaŭvažyć, dyj za stolki hadoŭ, kolki maju sacyjalnyja sietki… Pierad vyjezdam u Polšču byŭ čarhovy sud, čarhovy štraf. Jašče i vajna va Ukrainie… Vyrašyli źjazdžać», — patłumačyła Anžeła.

«Čakać vizu možna i tydzień, i piać tydniaŭ, heta łatareja»

U telegram-čatach jość šmat prapanoŭ «zapisać na vizu». Ceny roznyja — da tysiačy rubloŭ. Traplajucca i machlary, jakija patrabujuć «terminovaj pieradapłaty». Paśla pieravodu hrošaj źnikajuć.

Karespandent Svabody pahutaryŭ ź biełarusam, jaki prapanuje zapisać na padaču dakumientaŭ dla polskaj vizy za 300 rubloŭ.

«Pieradapłaty jak takoj my nie biarom, apłata — pa fakcie zapisu. Najbližejšy zapis — na 20 krasavika. Čakać vizu možna i tydzień, i piać tydniaŭ, heta łatareja. Dniami źmianiŭsia sajt konsulstva, ciapier prahramisty adaptujuć prahramy, skrypty pad novyja ŭmovy. U nas niadoraha jašče. Kali biaruć 900 rubloŭ, ja takoje čuŭ, to heta šalonyja hrošy, viadoma. Moža, u ich chutčej atrymlivajecca, moža, prahramisty bolš prasunutyja», — patłumačyŭ pasiarednik.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?