Telegram-kanał «Biełaruski hajun» paviedamiŭ, što 85% rasijskaj techniki ŭžo vyvieziena ź Biełarusi.
«Raniej kožnyja try chviliny prajazdžała pa horadzie siudy-tudy ich technika. Ciapier mo za 20 chvilin prajedzie adna mašyna, i ŭsio. Kałonaŭ bolš niama», — raskazaŭ žychar Naroŭli.
Pavodle jaho, pałamanuju rasijskuju techniku «ciahnuć» z Naroŭli ŭ Jelsk. Tam jaje hruziać na čyhunačnyja płatformy dla adpraŭki ŭ Rasiju.
Vizualna mała rasijskich vajskoŭcaŭ u Mazyry.
«Dzie-nidzie jany jašče badziajucca pa horadzie. Cikava, što jašče haniaje pa horadzie i ich PAZ z čyrvonym kryžam. Na takich raniej pryvozili ŭ mazyrski špital paranienych», — zaŭvažyŭ žychar Mazyra.
U Rečycy i rajonie rasijskija vajskoŭcy i vajskovaja palicyja dniami šukali «svaich», jakija źnikli.
«Jany musili być u łahiery ŭ lesie, a sami razbrylisia chto kudy. Adny — u Rečycu pajechali, časta taksi vyklikali tudy. Inšyja — pa navakolnych vioskach badzialisia, pa chatach pjanstvavali. Voś jeździli, šukali ich, źbirali da kučy», — raskazaŭ žychar Rečycy.
U rečyckaj supołcy «Riečica. Avtopomoŝ» 18 krasavika była raźmieščanaja abviestka pra pošuk vajskoŭca RF Alaksandra Dašypyłava. «Apranuty ŭ formu. Kali ŭ kaho majecca infarmacyja — paviedamić u milicyju», — napisali ŭ abviestcy. U kamientaryjach paźniej paviedamili, što vajskoviec znajšoŭsia, i dziakavali ŭsim za dapamohu.
Žychary Homla kažuć, što nie zaŭvažajuć ciapier na svaich vulicach rasijskich vajskoŭcaŭ.